تعارف سورۃ العلق

اس کو سورۂ العلق اور سورہ اقرأ دونوں ناموں سے یاد کیا جاتا ہے ’العلق‘ دوسری آیت مذکور ہے اور ’اقرأ‘ سے اس کا آغاز کیا گیا ہے۔ اس میں ایک رکوع، انیس آیتیں، بانوے کلمے اور دو اسی حروف ہیں۔

نزول

صحابۂ کرام رضی اللہ عنہم کی ایک کثیر تعداد جن میں ام المؤمنین حضرت عائشہ صدیقہ، ابن عباس، ابو موسی اشعری رضی اللہ عنہم کے اسماء سر فہرست ہیں اور بےشمار علمائے تفسیر کا یہ قول ہے کہ نزول قرآن کا آغاز اسی سورہ کی پہلی پانچ آیتوں سے ہوا، بقیہ آیات بعد میں نازل ہوئیں۔

مضامین

جس طرح اوپر بتایا گیا ہے۔ یہ سورہ دو حصوں پر مشتمل ہے۔ پہلی پانچ آیتیں جبریل امین علیہ السلام کو لے کر پہلی مرتبہ غار حرا میں تشریف لائے اور پہلی وحی آکر تعلیم کی۔ سورہ کا دوسرا حصہ بعد میں اس وقت نازل ہوا جب حضور صلی اللہ علیہ وآلہ وسلم نے حرم شریف میں نماز پڑھنی شروع کی۔ حضور کا انداز عبادت اہل مکہ کے لیے بالکل انوکھا تھا۔ لوگ دیکھ کر حیران ہوتے اور گزر جاتے۔ لیکن ابوجہل جو جہالت اور اجڈ پن میں اپنی مثال آپ تھا، وہ اس انداز عبادت کو دیکھ کر ضبط نہ کرسکا اور دھمکیاں دینی شروع کردیں۔ اس کی حماقت اور حرماں نصیبی پر ناراضگی کا اظہار فرمایا جارہا ہے۔