تعارف سورۃ الجاثیہ

اس کا نام جاثیہ ہے۔ یہ لفظ آیت نمبر 28 میں مذکور ہے۔ اس سورہ میں چار رکوع، سینتیس آیات، چار سو اٹھاسی کلمات اور دو ہزار ایک سو اکیانوے حروف ہیں۔

زمانہ نزول

ان سات سورتوں میں سے ایک ہے جن کا آغاز حم سے کیا گیا ہے۔ مضامین ومطالب میں یکسانیت اس بات پر بھی دلالت کر رہی ہے کہ ان کا نزول یکساں حالات میں ہوا۔

مضامین

1۔ عقیدۂ توحید کو تسلیم کرنا ان کے لئے بڑا دشوار تھا۔ اسی دشواری کی دیوار کو منہدم کرنے کے لئے عالم رنگ وبو کی بلندیوں اور پستیوں میں بکھری ہوئی ان روشن نشانیوں کی طرف قارئین کی توجہ مبذول کرائی جو پکار پکار کر اپنے بنانے والے کی حکمت بالغہ، قدرت کاملہ اور علم محیط کی شہادت دے رہی ہیں۔ چشم خرد کھول کر زمین وآسمان کی پہنائیوں کو دیکھو، خود اپنے وجود اور اس کی بو قلمونیوں کی سیر کرو، حیوانات کے بےشمار انواع واقسام پر نگاہ ڈالو، گردش لیل ونہار کے دقیق نظام میں غورو فکر کرو، ہر چیز تمہیں اس خالق علیم کا پتہ دے گی جو قدیر وحکیم بھی ہے اور وحدہ لا شریک بھی ؛ البتہ کذاب اور بدکار لوگ قدم قدم پر فروزاں روشن قندیلوں کو نہ دیکھ سکتے ہیں اور نہ ان سے فائدہ اٹھا سکتے ہیں۔ اس کے بعد ان مزید احسانات کا ذکر فرمایا جن سے انسان کو بہرہ ور کیا گیا ہے۔ ساتھ ہی بتا دیا کہ ان کی قدرو منزلت وہی لوگ جان سکتے ہیں جو فکر اور تدبر کے خوگر ہیں۔

2۔ بنی اسرائیل پر جو بےپایاں الطاف کئے گئے، انہیں بیان کیا۔ بتایا کہ ہم نے اس قوم کو کتاب، حکومت اور نبوت کی گراں بہا نعمتیں ارزانی فرمائیں۔ انہیں عنایات کے باعث اس زمانے کی تمام اقوام عالم پر انہیں فضیلت اور بزرگی بخشی، لیکن کچھ عرصہ بعد ان میں باہمی حسدو عداوت کی وبا پھوٹ پڑی۔ وہ ایک دوسرے کو نیچا دکھانے کے لئے مختلف دھڑوں میں بٹ گئے اور اس آسمانی دین کو انہوں نے اس طرح پارہ پارہ کر دیا کہ وہ ان کی اجتماعی زندگی میں رہنمائی کی قوت سے محروم ہو گیا۔

اپنے حبیب کریم (صلی اللہ علیہ وآلہ وسلم) کو ارشاد فرمایا کہ ہم نے آپ کو بھی ایک شریعت، ایک جامع نظام حیات عطا فرمایا ہے۔ آپ پر لازم ہے کہ اس کا اتباع کریں اور ان جاہلوں اور نادانوں کی اطاعت نہ کریں جو اپنے نفسوں کی خواہشات کے بندے بن کر رہ گئے ہیں۔ اگر آپ نے (بفرض محال) ایسا کیا تو پھر دنیا کی کوئی طاقت ہماری گرفت سے آپ کو نہ بچا سکے گی۔

اے غلامان مصطفی! اے سر زمین پاکستان میں بسنے والے فرزندان اسلام! اپنے خالق ومالک کا فرمان سن رہے ہو! کیا اس کے بعد بھی ہمارے سربراہان مملکت کو، ہمارے قانون ساز اداروں کو اور ان کے مقرر کردہ کمشنوں کے اراکین کو مزید کسی تنبیہہ اور سرزنش کی ضرورت ہے۔ صاف صاف بتا دیا کہ ہماری دی ہوئی شریعت پر عمل کرو، ورنہ عذاب الٰہی سے تمہاری نجات کی سب راہیں بند ہو جائیں گی

آیت نمبر 23 میں بھی غور فرمائیے۔ ارشاد ہے جو ہمارے قانون پر عمل نہیں کرتا گویا وہ ہمیں خدا نہیں مانتا اور جو نفس کی ہر فرمائش کو پورا کرتا ہے گویا اس نے اسے اپنا خدا اور معبود بنا لیا ہے۔ ایسا شخص علم وفضل کا پتلا ہی کیوں نہ ہو، وہ راہ راست سے بہک جاتا ہے۔ ایسے بدبخت سے فہم وتدبر کی قوتیں سلب کر لی جاتی ہیں اور اس کے ہدایت قبول کرنے کا امکان ہی باقی نہیں رہتا۔

کفار کا عقیدہ تھا کہ بس یہی زندگی ہے۔ گردش زمانہ ان کی موت کا پیغام لاتی ہے۔ نہ قیامت برپا ہوگی اور نہ دوبارہ جی اٹھنے کا سوال پیدا ہوگا۔ یہ عقیدہ انہیں اپنے آباء واجداد سے ورثے میں ملا تھا۔ وہ کسی قیمت پر اس سے دستبردار ہونے کے لئے تیار نہ تھے۔

سورہ کے اختتام سے پہلے ان کو اس دلدل سے نکالنے کی طرف توجہ فرمائی گئی اور ارشاد ہوا کہ قیامت کا برپا ہونا خلاف عقل نہیں، بلکہ عین حکمت ہے اور عقل کے تقاضوں سے کلیۃ ہم آہنگ ہے۔ یہ کیسے ہو سکتا ہے کہ ایک شخص جس نے عمر بھر تقویٰ کو اپنا شعار بنائے رکھا وہ اور ایک داد عیش دینے والا شخص دونوں یکساں ہوں۔ دنیاوی عیش وعشرت نے ان کی آنکھوں پر پٹی باندھ دی ہے، ورنہ وہ اس روشن حقیقت سے انکار نہ کرتے۔