تعارف سورۃ الانفال

اس سورہ کا نام الانفال ہے کیونکہ اس کا آغاز انفال (اموال غنمیت) کے احکام بیان کرنے سے کیا گیا ہے۔ اس کی آیتوں کی تعداد پچھتر اور کلمات کی تعداد ایک ہزار پچتھر ہے۔ اگرچہ حضرت ابن عباس رضی اللہ عنہما سے ایک روایت یہ بھی ہے کی اس کی سات آیتیں مکی ہیں، لیکن صحیح قول یہی ہے کہ یہ سورہ مدینہ طیبہ میں نازل ہوئی۔

زمانہ نزول

سورہ کے مضامین میں غور کرنے سے بھی واضح ہو جاتا ہے کہ اس کا نزول سنہ 6 ہجری غزوہ بدر کے فوراً بعد ہوا کیونکہ اس سورہ کا بیشتر حصہ غزوہ بدر سے متعلق ہے۔ اس کو پوری طرح سمجھنے کے لیے ضروری ہے کہ غزوہ بدر کے محرکات و اسباب اور اس سے پیدا ہونے والے نتائج کا جائزہ لیا جائے۔

اللہ تعالی کا پیارا حبیب صلی اللہ تعالی علیہ وآلہ وسلم اور اس کے جاں نثار غلام بارہ تیرہ سال تک کفار مکہ کے ظلم و ستم کو صبر و سکون سے برداشت کرتے رہے اور ان کے دل کی دنیا میں نور حق سے اجالا کرنے میں کوشاں رہے۔ لیکن اسلام کا پودا ان کے دوں کی سیگلاخ سرزمین میں جڑ نہ پکڑ سکا۔ اللہ تعالی نے اپنی قدرتِ کاملہ سے مکہ سے اڑھائی سو میل دور یثرب نامی ایک بستی کے رہنے والوں کو اسلام کی طرف مائل کر دیا۔ حج کے ایام میں وہاں کے کچھ لوگ حاضر ہوئے اور مشرف بہ اسلام ہوئے نبوت کے بارھویں سال قبیلہ خزرج کا ایک قافلہ جو پچتھر افراد پر مشتمل تھا مکہ آیا اور حضور کے دست حق پرست پر بیعت کی اور یہ بھی درخواست کی کہ حضور مکہ سے ہجرت کرکے مدینہ میں رونق افروز ہوں۔ انھیں ان خطرات اور مشکلات کا پورا احساس تھا جن سے انہیں دوچار ہونا تھا لیکن وہ ان کا سامنا کرنے کے لیے بخوشی تیار تھے۔ ہجرت کے بعد صورت حال بالکل بدل گئی۔ مکہ کے مظلوم و ستم رسیدہ مسلمان مدینہ طیبہ میں جمع ہوگئے۔ وہاں کےدو بڑے قبیلوں اوس و خزرج میں اسلام کی روشنی بڑی تیزی سے پھلینے لگی قلیل مدت میں مسلمانوں کی ایک مضبوط جمیعت معرضِ وجود میں آگئی۔ اسلام کی اشاعت کا کام جو تیرہ سالہ مکی زندگی میں نہ ہو سکا وہ یہاں آکر چند ماہ میں ہوگیا۔

غزوہ بدر کے محرکات: حضور نبی کریم صلی اللہ تعالی علیہ وآلہ وسلم نے مدینہ منورہ پہنچتے ہی مہاجرین و انصار کو اخوت کے رشتہ میں پرو دیا، ہر مہاجر کا کسی انصاری کے ساتھ بھائی چارہ قائم کرکے اسلامی سوسائٹی کو نہایت استوار بنیادوں پر کھڑا کر دیا۔ یہودی قبائل جو مدینہ اور اس کے گرد و نواح میں اقامت پذیر تھے ان کے ساتھ دوستی کے معاہدے کیے جس میں ہر ایک کو مکمل مذہبی آزادی دینے کے ساتھ یہ بھی طے پایا کہ اگر کسی طرف سے مدینہ پر حملہ کیا جئے تو سب مل کر اس حملہ آور کا مقا بلہ کریں گے۔

اہل مکہ ان حالات سے بےخبرنہ تھے۔ اسلام کی روز افزوں ترقی اور آس پاس بسنے والے قبائل سے مسلمانوں کے دوستانہ معاہدے ان کے لیے بڑی بےچینی اور اضطراب کا سبب تھے۔ وہ خوب جانتے تھے کہ اسلام کا عروج ان کے مشرکانہ عقائد اور جاہلانہ نظام حیات کے لیے موت کا پیغام ہے۔ اس لیے انھوں نے مدینہ کی فضاء کو بھی اسلام اور اہل اسلام کے لیے ناساز کار بنانے کی تاگ و دوشروع کردی۔ مدینہ میں دو عنصر ایسے تھے جنہیں بڑی آسانی سے اسلام کے خلاف استعمال کر سکتے تھے؛ عبداللہ بن ابئ اور یہود۔ حضور کی تشریف آوری سے پہلے عبداللہ بن ابئی کیلئے حالات اتنے سازگار ہوگئے تھے کہہ اس کی بادشاہت کا اعلان کیا جانے والا تھا۔ ایک زرگرکے پاس اس کے لیے تاج شاہی تیار ہورہا تھا۔ حضور علیہ الصلوۃ و السلام کے قدم رنجہ فرمانے کے بعد اس کی امیدیں خاک میں مل گئیں اس لیے اس کے دل میں اسلام کے خلاف بعض و عناد کا ایک انمٹ جذبہ پیدا ہوگیا۔ اب اسے اور اس کے حواریوں کو اہل مکہ بڑی آسمانی سے اپنا آلہ کاربنا سکتے تھے۔ اس کے علاوہ یہود کے دلوں میں بھی حسد کی آگ بھڑکنے لگی تھی۔ ان بیچاروں نے تو اس خیال سے حضور کے استقبال میں بڑھ چڑھ کر حصہ لیا تھا اور اس مقصد کے لیے مسلمانوں سے یارانہ گانٹھا تھا کہ یہ مصیبت زدہ جلاوطن لوگ ہیں جن کی مالی حالت بھی سخت ناگفتہ بہ ہے‘ ان کو بآسانی اپنا حلقہ بگوش بنا لیں گے اور انہیں اپنے اغراض و مقاصد کے لیے استعمال کریں گے۔ لیکن جب پیغمبر اسلام اور اس کے فداکاروں کی مضبوط الگ شخصیت اور اسلام سے ان کی بےپناہ عقیدت و محبت کا تجربہ ہوا اور ان کی توقعات بر آتی دکھائی نہ دیں تو ان کے تیور بھی بدل گئے اور وہ بھی ایسے موقع کی تاک میں رہنے لگے جب وہ مسلمانوں کی جمعیت کو پراگندہ کر کے پھر اپنی برتری کا سکہ یثربی کسانوں کے دلوں پر جماسکیں۔ چنانچہ اہل مکہ نے ان لوگوں سے اسلام کے خلاف سازباز شروع کردی اور مسلمانوں کو اپنی قوت سے مرعوب کرنے کے لیے وقتاً فوقتاً جتھے بھیجنے شروع کر دیئے جو مدینہ کی چراگاہوں سے مسلمانوں کے مویشی ہانک کر لے جاتے۔ اگر اکاد کا کوئی مسلمان ہتھ آجاتا تو اس پر حملہ کرنے سے بھی باز نہ آتے۔

ان حالات میں کیا مسلمان ہاتھ پر ہاتھ دھر کر بیٹھے رہتے؟ اپنی آنکھوں سے دیکھا کرتے تھے کہ کس طرح مخالفت کی تند آندھیاں اٹھتی ہیں اور شمع اسلام کو گل کر کے چلی جاتی ہیں، کس طرح طوفان امند کر آتے ہیں اور ان کے نخل آرزو کو جڑوں سے اکھیڑ کر پھینک دیتے ہیں۔ مسلمان اس طبعیت کے لوگ نہ تھے۔ انھیں زندہ رہنا تھا صرف اپنے لیے نہیں بلکہ ساری گم کردہ راہ اولادِ آدم کے لیے تاکہ دنیا کا گوشہ گوشہ نورِ محمدی صلی اللہ علیہ وآلہ وسلم سے منور ہو جائے۔ اس لیے صورت حال سے نمٹنے کے لیے حضورکریم رحمۃ للعالمین علیہ الصلوۃ و اسلام نے ضروری اقدامات فرمائے۔

کفار مکہ کو ان کے معاندانہ رویہ سے بازرکھنے اور انہیں اسلام اور اہل اسلام کے خلاف سازشوں اور ریشہ دوانیوں سے روکنے کا آسان طریق یہ تھا کہ ان کی تجارتی شاہ راہ پر اپنی گرفت مضبوط کی جائے جو بحر احمر کے کنارے کنارے یمن سے شام کی طرف جاتی تھی اور جس پر اہل مکہ، طائف اور دوسرے قبائل کے تجارتی کاروان اپنے بیش قمیت سامان سے لدے ہوئے دو دو ہزار اونٹوں کے قافلے بیک وقت چلتے تھے۔ مشہور متشرق سپرنجر کے اندازے کے مطابق اڑھائی لاکھ پاؤنڈ کی تجارت تو صرف اہل مکہ کی تھی اور ان کی تمام ترمعیشت کا انحصار اسی پر تھا۔ چنانچہ نبی اکرم صلی اللہ علیہ وآلہ وسلم نے سب سے پہلے جہینہ، بنی ضمرہ، بنی مدلج وغیرہ قبائل سے معاہدے کیے جو اس شاہراہ کے اردگرد سکونت پذیر تھے۔ ان قبائل کو اپنے ساتھ ملانے کے بعد کفار مکہ کو مرعوب کرنے اور ان کو اپنی بالادستی کا احساس دلانے کے لیے گاہے گاہے چھوٹے چھوٹے دستے بھیجے شروع کر دیئے۔

غزوہ بدر کا تاریخی پس منظر: ہجرت کا دوسرا سال تھا اور شعبان کا مہینہ تھا (فروری یا مارچ 623 عیسوی) جب ابوسفیان کی قیادت میں اہل مکہ کا ایک تجارتی کاروان جس میں پچاس ہزار پونڈ کی مالیت کا سامان تھا‘ شام سے مکہ کی طرف لوٹ رہا تھا۔ اس کے ساتھ محافظ دستہ کی تعداد بہت کم تھی۔ اس خوف سے کہ کہیں مسلمان اس کاروان کی اطلاع پا کراس پر حملہ نہ کردیں‘ ابوسفیان نے ضمضم بن عمروالغفاری کو اجرت دی اور اسے دوڑایا کہ جاکر اہل مکہ کو اطلاع دے کہ وہ اس قافلہ کو مسلمانوں کی دست برد سے بچانے کے لیے نکلیں۔ جب وہ مکہ پہنچا تو اس نے (حسب دستورِ جاہلیت) اپنے اونٹ کے کان کاٹ ڈالے، اس کی ناک چیردی۔ اپنے پالان کو الٹا ڈال دیا، اپنی قمیص کو آگے پیچھے سے پھاڑ ڈالا اور زور زور سے چلانا شروع کو دیا ’یامعشرالقریش! اللطیمۃ! اموالکم مع ابی سفیان قد عرض لہا محمد فی اصحابہ لااری ان تدرکوھا. الغوث! الغوث! اے گروہِ قریش! تمہارا مال و اسباب، تمہارا سازو سامان اور تمہارے اموال جو ابوسفیان کے قافلے میں تھے ان پر محمد (علیہ السلام) نے اپنے یاروں سمیت حملہ دیا ہے۔ میں نہیں خیال کرتا کہ تم اس کی حفاظت کر سکو گے۔ فریاد کو پہنچو، فریاد کو پہنچو۔

یہ سنتے ہی ابوجہل نے لوگوں کو جنگ پر ابھارنا شروع کر دیا۔ تقریباً مکہ کا ہر گھر اس تجارت میں حصہ دارتھا اس لیے اس مہم میں حصہ لینا ہر شخص کے ذاتی مفاد میں بھی تھا۔ تھوڑی دیر میں ایک ہزار آزمودہ کار سپاہیوں کا لشکرِ جرار تیار ہوگیا جس میں 200 زرہ پوش تھے اور سو سواروں کا دستہ بھی تھا۔ بڑے کر و فر سے یہ لشکر اپنے قافلہ کی حفاظت کے لیے نکلا۔ راستہ میں انہیں اطلاع ملی کہ قافلہ صحیح سلامت مسلمانوں کی زد سے بچ کر نکل آیا ہے۔ اس پر کئی لوگوں نے یہ رائے دی کہ اس مہم کا مقصد پورا ہو گیا ہے اس لیے اب ہمیں واپس لوٹ جانا چاہیے لیکن ابوجہل اور لشکر کی بھاری اکثریت اس پر رضامند نہ ہوئی۔ ان کا ارادہ یہ تھا کہ مسلمانوں کی اس مختصر جمعیت کو آج ہی ٹھکانے لگا دیا جائے تاکہ ان کا مذہب اور ان کی تجارتی شاہراہ جو ان کی رگ حیات ہے اس مہیب خطرہ سے ہمیشہ کے لیے محفوظ ہوجائے اور اس کے اردگرد بسنےوالےقبائل بھی اتنے ہراساں اور خوفزدہ ہوجائیں کہ وہ ان کی طرف آنکھ اٹھانے کی جرات نہ کر سکیں۔

حضور نبی کریم تین سو تیرہ مسلمانوں کی معیت میں مدینہ سے نکلے جن میں 83 مہاجر، 61 قبیلہ اوس اور باقی (170 کے قریب) قبیلہ خزرج کے انصار تھے۔ حضور جب وادی ذفران میں پہنچے تو اطلاع ملی کہ ابو جہل ایک لشکر جرار لے کر مکہ سے مدینہ کی طرف بڑھا چلا آرہا ہے۔ اب مسلمانوں کا مد مقابل وہ تجارتی قافلہ نہ تھا جس کے محافظوں کی تعداد تیس چالیس کے لگ بھگ تھی بلکہ جنگجو اور تجربہ کار بہادروں کا ایک لشکر عظیم تھا جس کی قیادت مکہ کا مشہور سردار ابو جہل کر دہا تھا جو تعداد میں مسلمانوں کی اس مختصر جماعت سے تین گنا تھا اور سازوسامان اور اسلحہ میں مسلمانوں کو ان سے کوئی نسبت ہی نہ تھی۔ حضور رحمت عالم بھی حالات کا گہری نظر سے مطالعہ فرمارہے تھے۔ حضور (صلی اللہ علیہ وآلہ وسلم) کو یہ معلوم تھا کہ اگر آج کمزودی دکھائی گئی تو صرف یہی نہیں کہ کفار مکہ کے حوصلہ بڑھ جائیں گے اور وہ مسلمانوں کے خلاف اپنی مساعی کو تیز تر کر دیں گے بلکہ خود مدینہ میں مسلمانوں کے لیے زندہ رہنا مشکل ہو جائے گا۔ یہودی اور منافق جو ابھی تک سہمے سہمے رہتے ہیں وہ بھی دلیر ہو جائیں گے۔ اور داخلی امن بھی خطرہ کی نذر ہو جائے گا۔ اس لیے اب موقع تھا کہ جرأت و ہمت سے کام لے کر سرفروشانہ طور پر کفار کی طاقت سے ٹکر لی جائے۔

لیکن کوئی قدم اٹھانے سے پہلے ایک مجلس مشاورت منعقد کی گئی جس میں مہاجرین اور انصار نے شرکت کی۔ ان کے سامنے حضور (صلی اللہ علیہ وآلہ وسلم) نے ساری صورت حال پیش فرما دی۔ حضرت صدیق و فاروق رضی اللہ تعالیٰ عنہما نے اپنے جذبہ جانفروشی کا اظہار کیا۔ حضرت مقداد بن عمرو کھڑے ہوئے اور عرض کی: ’یا رسول اللہ! امض لما اراک اللہ فنحن معک واللہ لانقول لک کما قال بنوا اسرائیل لموسیٰ اذھب انت وربک فقاتلا اناھھنا قاعدون ولکن اذھب انت وربک فقاتلا انا معکما مقاتلون‘ یارسول اللہ! جیسے اللہ کا حکم ہے تشریف لے چلیے ہم آپ (صلی اللہ علیہ وآلہ وسلم) کے ساتھ ہیں۔ بخدا ہم آپ (صلی اللہ علیہ وآلہ وسلم) کی خدمت میں وہ بات نہیں عرض کریں گے جو بنی اسرائیل نے حضرت موسیٰ سے کہی تھی کہ تم اور تمہارا خدا جاکر لڑو ہم تو یہاں بیٹھے ہیں بلکہ ہم تو یہ عرض کریں گے کہ آپ اور آپ کا رب کریم دشمن سے نبرد آزما ہوں، ہم سب آپ کے ساتھ ہیں۔ پھر حضور صلی اللہ علیہ وآلہ وسلم نے فرمایا: ’استروا علی ایھا الناس!‘ اے لوگو! بتاؤ تمہاری کیا رائے ہے؟ اب انصار کو خیال گزرا کہ شاید روئے سخن ہماری طرف ہے تو انصار کے علمبردار سعد بن معاذ رضی اللہ عنہ اٹھے اور عرض کی: ’کانت تریدنا یا رسول اللہ! قال اجل۔ قال سعد: لقد آمنابک وصدقناک وشہدنا ان ما جئت بہ ھو الحق واعطیناک علی ذالک عھودنا ومواثیقنا علی السمع و الطاعۃ فامض لما اردت فنحن معک فو الذی بمثک لو استعرضت بنا ھذا لبحر فخضتہ لخضناہ معک وما تخلف منارجل واحد ...... لعل اللہ یریک منا ما تقربہ عینک فسر بنا علی برکۃ اللہ‘ اے اللہ کے رسول! آپ ہماری رائے پوچھ رہے ہیں؟ حضور صلی اللہ علیہ وآلہ وسلم نے فرمایا: ہاں۔ تو سعد نے عرض کی: ہم آپ پر ایمان لائے آپ کی تصدیق کی۔ اور اس بات کی گواہی دی کہ جو کچھ آپ لائے ہیں وہ حق ہے اور آپ کی کامل اطاعت کا پختہ وعدہ کیا۔ جدھر کا قصد ہے تشریف لے چلیے ہم آپ کے ساتھ ہیں۔ اللہ کی قسم جس نے آپ کو نبی برحق بنا کر مبعوث فرمایا اگر آپ سمندر میں کودنے کا حکم دیں تو سب آپ کے ساتھ اس میں چھلانگ لگا دیں اور کوئی ایک بھی پیچھے نہ رہے۔ میدان جہاد میں ہماری جانفروشیوں سے اللہ تعالیٰ آپ کی آنکھوں کو ٹھنڈا کرے گا۔ اللہ کی برکت پر چلیے ہم سب بستگان فتراک نیاز حضور کے ہمرکاب ہیں۔

اس طرح سرفروشوں کا یہ گروہ اپنے رب کے نام کو بلند کرنے کا عزم صمیم کرکے آگے بڑھا اور بدرکے مقام پر خیمہ زن ہوا۔ وہاں ایک طرف حضور علیہ الصلوٰہ والسلام کے ٹہرنے کے لیے ایک چھپر (عریش) بنا دیا گیا۔ جنگ سے ایک روز پیشتر حضور صلی اللہ علیہ وآلہ وسلم اپنے صحابہ کی معیت میں میدان جنگ کے نشیب و فراز کا جائزہ لینے کے لئے نکلے۔ سارے میدان کا چکر لگایا اور اسی اثناء میں ان مقامات کی نشاندہی بھی فرماتے گئے جہاں کل ہونے والی جنگ میں مکہ کے سرداروں کی لاشیں گرنے والی تھیں ’ھذا مصرع فلان‘ یہ فلاں کے گرنے کی جگہ ہے، ’ھذا مصرع فلان‘ یہ فلاں کے گرنے کی جگہ ہے۔

رات کو سب لوگ محو خواب تھے لیکن چشم مصطفی علیہ التحیۃ والثناء بیدار تھی۔ ساری رات اسلام کی نصرت اور مسلمانوں کی فتح مندی کے لیے دعائیں فرماتے رہے۔ صبح ہوئی مسلمانوں کی صفوں کو درست کیا، سامنے کفار کا لشکر جنگ کی تیاریوں میں مصروف تھا۔ ان کی سہ گنا قوت کو دیکھا اور مسلمانوں کی بےبسی کو ملاحظہ فرمایا۔ اپنے عریش میں واپس تشریف لائے اور بارگاہ خداوندی میں انتہائی عجز و نیاز سے عرض کی: ’’اللہم ھذا قریش قد اتت بخیلاءھا تحاول ان تکذب رسولک. اللہم فنصرک الذی وعدتنی اللہم ان تہلک ھذہ العصابۃ الیوم لاتعبد‘‘۔ اے اللہ! یہ سامنے قریش ہیں جو نخوت و غرور کے سب سامان سے لیس ہوکر آئے ہیں تاکہ تیرے رسول کو جھٹلائیں۔ اے اللہ! اب آجائے تیری وہ مدد جس کا تو نے وعدہ فرمایا ہے۔ اے اللہ! اگر ان مٹھی بھر مسلمانوں کو تونے ہلاک ہونے دیا تو پھر تیری بھی عبادت نہیں کی جائے گی۔

رمضان کی سترہ تاریخ تھی اور جمعہ کا دن تھا۔ جب چشم آفتاب نے اور وادی بدر کے سنگریزوں نے اس انوکھی جنگ کا مشاہدہ کیا جس میں باطل اپنی نوری قوت و جبروت سے مسلح ہوکر حق کو کچلنے کے لیے نکلا تھا اور حق نے اپنی بےسر و سامانی کے باوجود باطل کو پاش پاش کرکے رکھ دیا۔ اگر اس روز اللہ تعالیٰ کی تائید اور مسلمانوں کی جانفروشی کے باعث حق کا بول بالا نہ ہوتا تو آج آفتاب صداقت کی یہ جلوہ سامانیاں نہ ہوتیں بلکہ یہ کائنات کفرو شرک کی اتھاہ گہرائیوں میں ڈوبی ہوئی ہوتی۔ اسی لیے قرآن حکیم نے اس روز سعید کو ’یوم الفرقان‘ فرمایا ہے۔ یعنی وہ دن جس نے حق و باطل کو الگ الگ کر دیا۔

احکام

اس سورت میں مسلمانوں کو ان کی اپنی کوتاہیوں پر بھی آگاہ کر دیا تاکہ وہ اپنی پہلی فرصت میں ان کی اصلاح کی طرف متوجہ ہوں۔ یہ بھی واضح کر دیا کہ یہ فتح و کامرانی محض اللہ تعالیٰ کی تائید و نصرت کا نتیجہ ہے اسلیے اس کی اور اس کے رسول کریم کی اطاعت میں کوشاں رہو تاکہ تائید غیبی ہمیشہ ہمیشہ تمہارے شامل حال رہے ایسا نہ ہو کہ تم اپنی بہادری اور شجاعت پر مغرور ہوکر احکام الٰہی اور ارشادات مصطفوی (صلی اللہ علیہ وآلہ وسلم) سے سرتابی کرنے لگو۔

مال غنیمت کی تقسیم کا طریقہ بھی واضح طور پر بیان کر دیا تاکہ اس کے متعلق بھی کسی قسم کا تنازع پیدا نہ ہو۔ اس کے ضمن میں صلح و جنگ کے متعلق معاہدوں کی پابندی کا حکم بھی فرمایا تاکہ یہ امت جس کے نبی کی بعث کی ایک بڑی غرض مکارم اخلاق کی تکمیل ہے وہ صلح و جنگ ہر حالت میں ان مکارم اخلاق کی علمبردار ہو۔

سورہ کے آخری حصہ میں حضور کریم علیہ الصلوٰۃ والتسلیم کے صحابہ کرام کی شان بھی بیان فرما دی جن کی سرفروشیوں قربانیوں، جانبازیوں، پیہم جدوجہد اور مسلسل سعی و عمل سے دین اسلام کو کامیابی اور عروج نصیب ہوا۔ تاکہ آئندہ آنے والی نسلیں ان کے اسوہ حسنہ پر عمل پیرا رہ کر اسی اخلاص، اسی للہیت، اسی ایثار اور اسی جانفروشی سے پرچم اسلام کو بلند سے بلند تر کرنے کے لیے ہمہ تن مصروف جہاد رہیں۔ ’اولئک ہم المؤمنون حقا‘ (یہی لوگ سچے ایماندار ہیں)۔ کے کلمات سے ان حضرات قدسی صفات کے سچے اور کامل ایماندار ہونے کی خودخداوند علیم و خبیر نے شہادت دے دی اور پہلے ہی ان تمام شکوک و شبہات کا ازالہ کر دیا جو یاران مصطفی علیہ اطیب التحیۃ واجمل الثنا کے متعلق اسلام کے ظاہری اور باطنی دشمن قیامت تک اٹھانے والے تھے۔ تاکہ کوئی جان بوجھ کر ان شکوک و شبہات کا شکار بننا چاہتا ہے تو بڑے شوق سے لیکن بےعلمی اور بےخبری کی وجہ سے کوئی ان میں مبتلا نہ ہو۔