تعارف سورۃ حم السجدۃ

متعدد سورتیں ہیں جن کی ابتدا حم سے ہوتی ہے۔ اس سورہ کی ابتدا بھی حم سے ہوئی، لیکن اس قسم کی دوسری سورتوں سے جو چیز اسے ممتاز کرتی ہے وہ یہ ہے کہ اس کی آیت 38 آیت سجدہ ہے اس لئے اس کو حم السجدہ سے موسوم کیا گیا۔ اس کا دوسرا نام فصلت بھی ہے۔ یہ کلمہ تیسری آیت میں موجود ہے۔ یہ چھ رکوعوں اور چو ن آیات پر مشتمل ہے اس کے کلمات کی تعداد سات سو چھیانوے اور حروف کی تعداد تین ہزار سو پچاس ہے۔

زمانہ نزول

یہ سورہ مکہ مکرمہ میں نازل ہوئی، اس کے زمانہ نزول کا تعین علماء تفسیر نے یوں کیا ہے کہ یہ سورہ حضرت حمزہ (رض) کے مشرف باسلام ہونے کے بعد اور حضرت فاروق اعظم (رض) کے اسلام قبول کرنے سے پہلے درمیانی وقفہ میں نازل ہوئی۔

مضامین

قریش مکہ کی شدید مخالفت اور مزاحمت کے باوجود آہستہ آہستہ مگر مضبوطی سے اسلام اپنے قدم آگے بڑھاتا چلا جا رہا تھا۔ آئے روز کوئی نہ کوئی ایسی ہستی اسلام قبول کر لیتی جس کے باعث کفار پر کوہ الم ٹوٹ پڑتا۔ اور اسلام کے خلاف ان کی انتقامی کارروائیوں میں بڑی شدت پیدا ہوجاتی۔ حضرت حمزہ جو اپنی شجاعت اور ناموری میں بےنظیر تھے چند روز ہوئے انہوں نے اسلام قبول کر لیا تھا۔ ان کے مشرف باسلام ہونے سے وہ شدید ذہنی صدمہ سے دوچار ہو گئے۔ اس مشکل کا حل سوچنے کے لئے ان کی ایک میٹنگ حرم میں منعقد ہوئی۔ قریش کے دوسرے روسا کے علاوہ عتبہ بن ربیعہ بھی وہاں موجود تھا۔ اثنائے گفتگو اس نے اپنے آپ کو پیش کیا کہ وہ حضور (صلی اللہ علیہ وآلہ وسلم) کے پاس جاتا ہے اور انہیں سمجھا کر راہ راست پر لاتا ہے۔ جب اس نے اپنی لمبی چوڑی تقریر ختم کی، تو اس کے جواب میں حضور (صلی اللہ علیہ وآلہ وسلم) نے یہی سورہ تلاوت فرمائی جسے سن کر وہ دم بخود ہو گیا اور اپنا سا منہ لے کرو اپس آگیا۔

نبی کریم (صلی اللہ علیہ وآلہ وسلم) پر کفار کے وہی سابقہ اعتراضات تھے جنہیں وہ ہر موقع پر بڑی شد ومد سے دہرادیا کرتے۔ ان کا پہلا اعتراض اس پر تھا کہ قرآن کلام الٰہی ہے۔ یہ بات ان کے ذہن میں آتی ہی نہ تھی۔ کبھی کہتے یہ خود گھڑ کر ہمیں سناتا ہے، کبھی کہتے کسی سے سیکھ کر آتا ہے اور پھر ہمیں سکھاتا ہے۔ یہ شبہ اتنا لغو تھا کہ اس کو ذکر کرنا بھی مناسب نہیں سمجھا گیا بلکہ بڑے حتمی اور قطعی انداز میں یہ فرما دیا کہ یہ اس رب کا کلام ہے جو رحمن ورحیم ہے۔ اس ارشاد الٰہی سے وہ شکوک وشبہات خود بخود ختم ہو گئے جو کفار کے ذہنوں میں پیدا ہوتے رہتے تھے۔ دوسرا اعتراض توحید باری پر تھا وہ اس بات کو تسلیم ہی نہیں کرتے تھے کہ خدا ایک ہے، بلکہ بہت سے بتوں کو انہوں نے اپنا معبود بنا رکھا تھا۔ یہاں بھی ان کے اس خیال باطل کی تردید کرنے کے لئے دلائل تکوینیہ کا ذکر کیا گیا جس کے آئینہ میں اللہ تعالیٰ کی قدرت کاملہ، علم محیط اور کبریائی کے جلوے جھلک رہے ہیں۔

نیز انہیں متنبہ کیا کہ میرے محبوب کے خلاف جوروش تم نے اختیار کر رکھی ہے اس کا نتیجہ بڑا ہولناک ہوگا۔ تم سے پہلے بھی بڑی بڑی طاقتور اور زور قومیں گزر چکی ہیں۔ جن کی مادی ترقی اور معاشی خوشحالی سن کر آج بھی تم حیران وششد رہو جاتے ہو۔ انہوں نے اپنے انبیاء کے ساتھ جب اس قسم کا سلوک کیا تو انہیں تباہ وبرباد کر دیا گیا۔ اگر تم باز نہ آئے تو تمہیں بھی اسی قسم کے عذاب سے دوچار کر دیا جائے گا۔

قیامت کا ذکر کرتے ہوئے انہیں بتایا کہ تم جو کچھ کر رہے ہو تمہارے اعضاء عینی اور سلطانی گواہ کی حیثیت سے تمہارے خلاف شہادت دیں گے، اس وقت تم اپنے جرائم پر کیسے پردہ ڈال سکو گے۔

کفار اپنے تمام حیلے برائے کار لا چکے تھے تاکہ اسلام کی پیش قدمی کو وہ روک دیں۔ لیکن کلام الٰہی کی اثر انگیزی نے ان کے تمام منصوبوں کو خاک میں ملادیا۔ اب انہوں نے یہ طے کیا کہ جب بھی قرآن کریم کی تلاوت کی جائے اس محفل میں غوغا آرائی شروع کر دو تاکہ شوروشغب میں کوئی قرآن نہ سن سکے۔ لیکن ان کی یہ تدبیر بھی ناکام ثابت ہوئی۔

اس سورہ میں اہل حق کی شان استقامت کو بیان فرمایا اور اس کے بعد ان انعامات وعنایات کا تذکرہ کیا جو اللہ تعالیٰ اپنے ایسے بندوں پر فرماتا ہے۔ ساتھ ہی ان مکارم اخلاق کا ذکر کیا جن سے ان کی سیرت مزین وآراستہ ہے۔

آخر میں بتا دیا کہ اللہ تعالیٰ اپنے کلام کا خود محافظ ونگہبان ہے باطل کی یہ مجال نہیں کہ اس میں کسی جانب سے بھی گھسنے کی جرات کر سکے۔