تعارف سورۃ الانبیاء

اس سورہ میں بہت سے انبیاء کرام کا تذکرہ ہے۔ اسی مناسبت سے اس سورہ کا نام سورہ الانبیاء رکھا گیا ہے۔ یہ سورہ بتمام مکی ہے۔ اس میں سات رکوع، ایک ہزار ایک سو بارہ آیتیں، ایک ہزار ایک سو چھیاسی کلے اور چار ہزار آٹھ سو نوے حروف ہیں۔

مضامین

جہاں بھی کفر و شرک کی ظلمت چھا جاتی ہے وہاں زندگی کے متعلق انسان کا تصور ہی مسخ ہو کر رہ جاتا ہے۔ اس کے غور و فکر کی قوتیں اپاہج ہو جاتی ہیں۔ وہ اپنی ان اپاہج قوتوں کے سہارے فقط وہاں تک ہی قدم بڑھا سکتا ہے جہاں تک اس کے حواس ظاہرہ کی رسائی اور مشاہدہ کی سرحد ہے وہ کسی آنے والی زندگی کا تصور تک نہیں کر سکتا۔ اسے لاکھ سمجھایا جائے۔ اس کے سامنے سلائل کے انبار لگا دئیے جائیں وہ اس حقیقت کو باور کرنے کے لیے تیار نہیں ہوتا۔ کیونکہ اخروی زندگی پر اس کا ایمان نہیں ہوتا۔ اس لیے اس کی ساری کوششیں اس زندگی سے زیادہ سے زیادہ لطف اندوز ہونے، دولت سمیٹنے اور عزت و اقتدار حاصل کرنے میں صرف ہو جاتی ہیں۔ صواب و ناصواب، جائز و ناجائز اور حلال و حرام کی تمیز بھی اٹھ جاتی ہے۔ خواہشات نفسانی کی تسکین کے لیے وہ دوسروں کی عزت و ناموس کو پامال کرنے میں کوئی قباحت محسوس نہیں کرتا۔ اپنے خزانوں کو بھرنے کی خاطر وہ بڑے اطمینان قلب سے لوٹ کھسوٹ میں سرگرم ہو جاتا ہے۔ اگر مسند اقتدار پر قبضہ کرنے کے لیے انسانی جانوں کی، اخلاقی قدروں کی ارشادات خداوندی کی قربانی دینا پڑے تو وہ اس سے بھی باز نہیں آتا۔

یہی حالت عہد نبوت کے کفار ومشرکین کی تھی اور آج بھی جہاں اللہ تعالیٰ کی ذات پر ایمان نہیں رہا۔ وہاں یہی حال ہے خواہ وہاں کے لوگ اپنی سائنسی اور صنعتی ترقی سے قدم قدم پر نئے کرشمے دکھا رہے ہوں۔

اس لیے اس سورہ پاک کے آغاز میں پوری قوت سے ان کے اس فکری افلاس اور زہنی بےراہ روی کا ازالہ کرنے کی کوشش فرمائی جا رہی ہے۔ انہیں بتایا جا رہا ہے کہ تم سے پہلے جن قوموں نے یہ روش اختیار کی تھی ان کے دردناک انجام کی داستان تم ان کھنڈرات کے شکستہ ورد دیوار سے پوچھ سکتے ہو جو تمہاری تجارتی شاہراہوں کے اردگرد کھڑے ہیں وہ تمہیں بتائیں گے کہ یہاں بسنے والے بھی تمہاری طرح قیامت پر ایمان نہیں رکھتے تھے۔ اس لیے وہ دنیا کی لذتوں میں مگن ہوگئے۔ انہیں سمجھانے والوں نے بہتیرا سمجھایا لیکن وہ نہ سمجھے۔ آخر کار غضب الٰہی کی آگ بھڑکی اور اس نے انہیں چاروں طرف سے جب اپنی لپیٹ میں لے لیا تو وہ بہت کودے، بہت بھاگے، بہت چیخے، بہت چلائے لیکن وہ اپنے انجام بد سے بچ نہ سکے، اے کفار تم ان کے حالات سے عبرت پکڑو۔ ایسا نہ ہو کہ مہلت کی گھڑیاں گزر جانے کے بعد تم بھی اسی ہولناک انجام سے دوچار کر دئیے جاؤ۔

2۔ اس کے بعد توحید باری کے ثبوت کے لیے تکوینی دلائل کے ساتھ ساتھ عقلی دلیلیں بھی پیش کر دیں تاکہ انہیں راہ راست پر لانے کی کوشش ادھوری اور ناتمام نہ رہے۔

3۔ فرشتوں کے متعلق ان کے غلط عقیدہ کا بطلان کر دیا کہ وہ خدا کی اولاد نہیں بلکہ اس کے معزز بندے ہیں جو ہمہ وقت اس کی جاد، اس کی بندگی اور اس کی تسبیح و تقدیس میں مشغول رہتے ہیں۔ نہ تھکتے ہیں نہ اکتاتے ہیں۔

4۔ اسی ضمن میں توحید، نبوت اور آخرت کے بارے میں مشرکین کے شکوک و شبہات کو بیان کیا اور بڑے حکیمانہ انداز میں ان کی تردید بھی کر دی۔

5۔ اس کے بعد چند جلیل القدر انبیاء اور اولو العزم رسولوں کی سیرتیں بیان فرمائیں تاکہ واہ نور و منزل تسلیم و رضا اگر کسی مشکل سے دو چار ہوتو حوصلہ ہار نہ دے۔ شکستہ پا ہو کر بیٹھ نہ جائے بلکہ ان پاکیزہ ہستیوں کی سیرت کے مطالعہ سے تقویت حاصل کرتا ہوا آگے بڑھتا جائے۔

6۔ سورہ کے آخری رکوع میں ایک بار پھر اس حقیقت کو بیان فرما دیا کہ جو شخص نیکی اور راستی کی راہ پر صدق و اخلاص سے گامزن ہوگا۔ وہ بامراد اور کامیاب ہوگا۔ اس کی کوئی کوششں رائیگاں نہیں جائے گی۔ یہ لوگ روز محشر کی ہولناکیوں سے بھی خوفزدہ نہیں ہوں گے۔ اس روز فرشتے مرحبا! خوش آمدید! کہتے ہوئے ان کا استقبال کرینگے۔ اور جو بدبخت اپنی غلط کاریوں پر بضد رہے اور سمجھانے کے باوجود نہ سمجھے تو انہیں ان کے معبودوں سمیت دوزخ کا ایندھن بنا دیا جائے گا۔

اختتام سورت سے پہلے قرآن کی شان اور صاحب قرآن کی عظمت کا ذکر فرمایا۔ ارشاد ہے: ’إِنَّ فِي هَذَا لَبَلَاغًا لِّقَوْمٍ عَابِدِينَ‘ یعنی یہ وہ کتاب ہے جس میں دین و دنیا میں فلاح و کامرانی حاصل کرنے کے قاعدے مذکور ہیں جس کے ماننے والے کو کسی اور نظام حیات کی دریوزہ گری کی ذلت نہیں اٹھانی پڑتی۔ یہ کتاب ہی تمام ضروریات کے لیے کافی ہے اور صاحب قرآن کے متعلق فرما دیا۔ وما ارسلنک الا رحمۃ للعلمین کہ ہم نے آپ کو سب جہانوں کے لیے سراپا رحمت بنا کر بھیجا ہے۔ خوش نصیب ہے وہ قوم جس کی یہ شان ہے اور جس کے نبی کا یہ مقام ہے۔