تعارف سورۃ ص

اس کا نام ص ہے جو پہلی آیت میں مذکور ہے۔ اس کی آیات کی تعداد اٹھاسی اور کلمات کی تعداد سات سو بتیس اور حروف کی تعداد تین ہزار سڑسٹھ ہے۔ اس کے پانچ رکوع ہیں۔

زمانہ نزول

اس میں تو سب کا اتفاق ہے کہ یہ مکہ مکرمہ میں نازل ہوئی، لیکن مکی زندگی کے کس دور میں اس کا نزول ہوا، اس بارے میں کوئی صراحت تو نہیں ملتی البتہ مفسرین کرام نے اس کے شان نزول کے بارے میں جو روایت لکھی ہے، اس سے قیاس کیا جا سکتا ہے۔

روایت یہ ہے کہ جناب ابو طالب بیمار ہوگئے۔ بیماری نے شدت اختیار کر لی۔ مکہ کے رئیسوں نے سوچا کہ ایسا نہ ہو کہ وہ اس بیماری میں وفات پاجائیں۔ ان کی وفات کے بعد اگر ہم نے نبی مکرم پر سختی کی تو عرب ہمیں عار دلائیں گے کہ کل تک ابو طالب زندہ تھے تو تم نے انہیں کچھ نہ کہا۔ اب ان کی آنکھیں بند ہوتے ہی تم نے تشدد شروع کر دیا۔ اس لئے بہتر ہے کہ ہمارا ایک وفد ان کے پاس جائے شاید باہمی مصالحت کی کوئی صورت نکل آئے۔ چنانچہ ابوجہل، عاص بن وائل، اسود بن مطلب، اسود بن یغوث چند دوسرے رؤسا کے ساتھ ابو طالب کے پاس گئے اور کہا: ’یا ابا طالب انت کبیرنا وسیدنا فانصفنا من ابن اخیک فمره فلیکف عن شتم الهتنا وندعه والهه‘ (اے ابو طالب! آپ ہم سب سے بڑے اور ہمارے سردار ہیں۔ اپنے بھتیجے اور ہمارے درمیان انصاف سے فیصلہ کردیں آپ انہیں حکم دیں کہ ہمارے خداؤں کو برا بھلا کہنے سے رک جائیں ہم انہیں اور ان کے خدا کو کچھ نہیں کہیں گے۔)

چنانچہ آپ نے حضور (صلی اللہ علیہ وآلہ وسلم) بلا بھیجا۔ حضور (صلی اللہ علیہ وآلہ وسلم) جب تشریف لائے تو ابو طالب نے کہا کہ یہ آپ کی قوم کے شیوخ اور سردار ہیں اور ان کا یہ مطالبہ ہے۔ حضور (صلی اللہ علیہ وآلہ وسلم) نے فرمایا چچا جان! کیا میں ان کو ایسی بات کی دعوت نہ دوں جو ان کے لئے سراپا خیر ہے۔ پوچھا کیا بات ہے: حضور (صلی اللہ علیہ وآلہ وسلم) نے فرمایا: ’ادعوهم ان یتکلموا بکلمة تدین لهم بها العرب ویملکون بها العجم‘ یعنی میں ان کو دعوت دیتا ہوں کہ وہ ایک کلمہ کہیں، اس کی برکت سے سارا عرب بھی ان کا باجگزار بن جائے گا اور عجم کے بھی وہ مالک بن جائیں گے۔

ابوجہل کہنے لگا ہم ایک نہیں، ایسے دس کلمے بھی کہنے کے لئے تیار ہیں۔ بتاؤ وہ کلمہ کونسا ہے۔ حضور (صلی اللہ علیہ وآلہ وسلم) نے فرمایا تم کہو لا الہ الا اللہ۔ یہ سن کر وہ بھڑک اٹھے اور جھاگ بہاتے ہوئے اس محفل سے چلے گئے۔ اس وقت یہ سورہ نازل ہوئی۔

اگر یہ واقعہ جناب ابو طالب کے مرض وفات کا ہے تو پھر اس سورہ کا سال نزول نبوت کا دسواں سال ہوگا، لیکن طبقات میں ابن سعد نے تصریح کی ہے کہ یہ واقعہ کسی دوسری بیماری کا ہے۔ بہرحا ل اس سے بھی اتنا اندازہ تو لگایا جا سکتا ہے کہ یہ ان دنوں کا واقعہ ہے جب اسلام کی شمع بجھانے کے لئے تمسخر اور استہزاء کے حیلے ناکام ہوچکے تھے بلکہ کفار مکہ کا جوروستم اور جبر وتشدد بھی اسلام کی ترقی کو روکنے سے عاجز آچکا تھا، اسی لئے تو وہ اس کمزور شرط پر بھی مصالحت کرنے کے لئے تیار تھے کہ حضور (صلی اللہ علیہ وآلہ وسلم) ان کے بتوں کو کچھ نہ کہیں، خود بےشک اپنے خدا کی عبادت کرتے رہیں، اس قیامت کے مطابق مکی زندگی کا درمیانی دور اس سورہ کا زمانہ نزول ہو سکتا ہے۔

مضامین

اس سورہ میں انہی تین بیماریوں کا علاج فرمایا جا رہا ہے جن میں اہل مکہ بری طرح مبتلا تھے:

1۔ وہ حضور علیہ السلام کو نبی ماننے کے لئے ہرگز تیار نہ تھے انہیں اس انتخاب میں کوئی حکمت نظر نہ آتی تھی کہ جزیرہ عرب کے بڑے بڑے رؤسا کو تو نظر انداز کر دیا جائے اور منصب نبوت کے لئے ایک ایسی ہستی کو چنا جائے جس کے پاس نہ مال ودولت ہے نہ اعوان وانصار کے جھتے۔ اللہ تعالیٰ فرماتے ہیں کہ نبوت تو میرا انعام ہے جس کو میں اس کے قابل سمجھتا ہوں سرفراز کرتا ہوں۔ کیا میری رحمت کے خزانوں کے کنجی بردار یہ لوگ ہیں کہ جس کو چاہیں دیں اور جس کو چاہیں نہ دیں۔

2۔ حضور (صلی اللہ علیہ وآلہ وسلم) کو نبی نہ ماننے کی ان کے پاس ایک اور دلیل بھی تھی۔ یہ کہتے ہیں کہ سارے جہانوں کا ایک خدا ہے، بھلا خود سوچو کارخانہ کائنات کے وسیع وعریض نظام کو کیا ایک خدا چلا سکتا ہے؟ جو شخص ایسی خلاف عقل باتیں کرے ہم اس کو نبی کیسے مان لیں۔ لیکن عقیدہ توحید کو قرآن کریم نے ایسے زور دار دلائل سے ثابت کر دیا تھا جن کا کفار کے پاس کوئی جواب نہ تھا۔ بجز اس کے کہ وہ لوگوں کی اندھی عصبیت کو بھڑکائیں اور انہیں کہیں کہ اپنے آباؤ اجداد کے خداؤں سے چمٹے رہو، اور آفتاب سے روشن تر دلیلیں کیوں نہ تمہارے سامنے پیش کی جائیں ان کو ماننے سے صاف انکار کردو۔

3۔ حضور نبی کریم (صلی اللہ علیہ وآلہ وسلم) کو ان کی اس نادانی اور ان کے اس احمقانہ رویے سے کتنا دکھ ہوتا ہوگا، اللہ تعالیٰ حضور (صلی اللہ علیہ وآلہ وسلم) کو صبر کرنے کا حکم دیتا ہے اور اپنے جلیل القدر انبیاء کے حالات اور انہیں پیش آنے والی مشکلات کا تذکرہ کر کے حضور (صلی اللہ علیہ وآلہ وسلم) کی دلجوئی فرماتا ہے۔

ایک بات غور طلب ہے۔ یہاں اولین مقصد اہل عرب کے مشرکانہ عقائد کا بطلان ہے۔ اسی سلسلہ میں انبیاء کرام کے حالات بیان کئے گئے ساتھ ہی ان کے بےمثل کمالات، بےپایاں انعامات اور غیر محدود اختیارات کا ذکر بھی بڑے موثر پیرایہ میں کیا جا رہا ہے۔ معلوم ہوا کہ انبیاء کرام کے کمالات واختیارات بیان کرنے سے عقیدہ توحید کمزور نہیں ہوتا بلکہ مضبوط اور قوی ہوتا ہے۔ وہ لوگ بھی ان آیات کو چشم ہوش کھول کر پڑھیں جو حضور پر نور (صلی اللہ علیہ وآلہ وسلم) کے کمالات اور حضور (صلی اللہ علیہ وآلہ وسلم) پر آپ کے رب کریم کے بےپایا احسانات بیان کرنے میں اس لئے بخل سے کام لیتے ہیں کہ عقیدہ توحید کو ضعف نہ پہنچے۔ حقیقت یہ ہے کہ جتنی شان مصطفی علیہ التحیۃ والثنا زیادہ آشکارا کی جائے گی اسی قدر اس کو بھیجنے والے خدا کی عظمت و کبریائی کا نقش لوح قلب پر ثبت ہوتا جائے گا۔ سورہ کے اختتام سے پہلے تخلیق آدم کا تذکرہ فرمایا اور نفخت فیہ من روحی فرما کر ان انگنت صلاحیتوں اور بیکراں استعدادوں کی طرف اشارہ کر دیا جن کا آدم کو امین بنایا گیا ہے۔ ساتھ ہی بتا دیا کہ شیطان نے آدم کی بےادبی کر کے اپنے آپ کو ابدی لعنتوں کا مستحق قرار دے دیا۔ خود سوچو جو شخص محبوب رب العلمین کی شان رفیع کا انکار کرے گا اور بےادبی کا مرتکب ہوگا اس کی تباہی وبربادی کا کیا حال ہوگا۔ آخر میں فرمایا کہ یہ کتاب ذکری للعالمین ہے کسی مخصوص قوم کے لئے، کسی محدود زمانہ کے لئے یہ پیغام ہدایت نہیں بلکہ سارے جہان اس کے نور سے تاباں ودرخشاں ہیں۔ جب یہ کتاب ذکری للعالمین ہے، اس کو لانے والا رحمۃ للعالمین ہے اور اس کو نازل فرمانے والا رب العلمین ہے تو سارے نوع انسانی کا ایک دین اگر کوئی ہو سکتا ہے تو وہ دین اسلام ہے۔