تعارف سورۃ آلِ عمران

سورہ آلِ عمران باتفاقِ علماء مدینہ منورہ میں نازل ہوئی۔ اس کے بیس رکوع، دو سو آیتیں، تین ہزار پانچ سو بیالیس الفاظ اور پانچ ہزار تین سو چھتیس حروف ہیں۔

مضامین

1۔ اس سورہ میں بڑے واضح انداز سے اس امر کی تصریح کی گئی ہے کہ انسان کی ہدایت کے لیے اس کے خالق نے جو ضابطہ عطاء فرمایا وہ ایک ہی ہے اور اس کا نام ہے دین اسلام۔ اس دین کے اساسی عقائد اور بنیادی اصول زمان ومکان کے اختلاف و تعدد کے باوجود ازلی و ابدی ہیں۔ اس کی وجہ یہ ہے کہ یہ دین انسانی عقل و خرد کی اختراع نہیں بلکہ اللہ کا دین ہے جو حق ہے اور حق ایک ہی ہوا کرتا ہے۔ ہر زمانہ میں، ہر حال میں اسلام کے نام سے بدکنے والے اہل کتاب کو صاف صاف بتا دیا کہ جن انبیائے کرام کے نام پر تم اپنے الگ الگ مذہبوں کی بنیادیں استوار کر رہے ہو ان سب کا دین تو اسلام تھا۔ تمہارے جدا مجد حضرت ابراہیم علیہ اسلام بھی دین اسلام کے علمبردار تھے۔

اس طرح قرآن حکیم نے دین و مذہب کے نام پر انسانیت کی وحدت کو پارہ پارہ کرنے والے محرکات پر کاری ضرب لگائی اور وحدت انسانیت کے لیے ایک ایسی محکم اساس مہیا کردی کہ جب انسان اپنی ذاتی، وطنی اور قومی خود غرضیوں سے رہائی حاصل کرنے میں کامیاب ہوگیا تو وہ اتحاد و محبت کے رشتہ میں منسلک ہو جائے گا۔

تمام انبیاء ایک ہی دین کے داعی اور مبلغ تھے اس لیے ہر نبی نے اپنے سے پہلے گزرے ہوئے انبیاء و رسل کی تصدیق کی اور اپنی اپنی امتوں کو بعد میں آنے والے انبیاء پر ایمان لانے کی ہدایت کی۔ اسی سنت پر حضورکریم صلی اللہ تعالی علیہ وآلہ وسلم نےعمل فرمایا اور تمام انبیاء و رسلِ سابقین کی تصدیق کی۔ لیکن حضور علیہ الصلوۃ والسلام کے بعد کیونکہ کوئی اور نبی مبعوث ہونے والا نہیں تھا۔ اس لیے کسی نئے نبی پر ایمان لانے کا حکم نہیں دیا۔ ختم نبوت کی یہ بھی بڑی واضح دلیل ہے۔

وہ ختم الرسل مولائے کل جس کی ذات قدسی صفات کو مشیت الہی نے انسانیت کے بکھرے ہوئے اوراق کی شیرازہ بندی کے لیے تجویز فرمایا تھا اس کے متعلق تمام انبیاء کو حکم دیا کہ اس پر ایمان لائیں اور اس کی نصرت و تاتید کا پختہ وعدہ کریں تاکہ ان کی امتوں کو مجالِ انکار نہ رہے۔

اس سورت میں ان تمام امورکا ذکر کر کے یہ بتادیا کہ انسانوں کی ان برسر پیکار جماعتوں کا اتحاد و اتفاق اگر ہوسکتا ہے تو صرف اسلام کے جھنڈے کے نیچے اور حضور رحمتہ للعٰمین صلی اللہ تعالیٰ علیہ وآلہ وسلم کی قیادت میں ہی ہو سکتا ہے۔

2۔ سورہ بقرہ میں یہود کی اصلاح کی بھرپور کوشش کی گئی تھی۔ کیونکہ یہود مدینہ کے باشندے تھے اور صبح وشام مسلمانوں کو ان سے سابقہ پڑتا تھا۔ اس سورہ میں عیسائیوں کے عقائد کی درستی کی طرف خاص توجہ فرمائی گئی ہے اور ان کے عقیدہ تثلیث کا ایسا سخت محاسبہ کیا گیا ہے جس کا جواب میسح کے پرستاروں کے پاس تب تھا نہ اب ہے۔ اس سررہ کا بہت سا حصہ اس وقت نازل ہوا جب نجران کے عسیائیوں کے علماء و رؤسا کا ایک وفد بارگاہِ رسالت میں حاضر ہوا اور اپنے عقائد کے متعلق حضورصلی اللہ تعالی علیہ وآلہ وسلم سے مناظرہ شروع کیا۔

3۔ سورہ البقرہ میں مسلمانوں کو کفار سے جہاد کرنے کی اجازت دی گئی تھی۔ اس کے بعد کفر و اسلام کی جنگوں کا سلسلہ شروع ہو گیا۔ پہلی جنگ بدر کے میدان میں لڑی گئی جس میں مٹھی بھر مسلمانوں نے اپںی بےسر و سامانی کے باوجود کفار کو شکست فاش دی۔ لیکن اس شکست نے کفار کو آتشِ زیرپا کر دیا، انتقام کے شعلے بھڑک اٹھے۔ یہود نے بھی اپنی سازشوں کو تیز تر کر دیا۔ ایک سال بھی گزرنے نہ پایا تھا کہ پورے ساز و سامان کے ساتھ مشرکینِ مکہ نے مدینہ پر چڑھائی کردی۔ احد کے پہاڑ کے دامن میں مقابلہ ہوا۔ ابتداء میں مسلمانوں کو سخت جانی نقصان ہوا۔ اس سورہ میں دشمنوں (یہود اور منافقین) کی سازشوں کا پردہ چاک کیا گیا اور مسلمانوں کو ان کی اپنی فروگزاشتوں سے آئندہ بچنے کی تلقین کی گئی۔ اسی تربیت الہی اور تادیبِ خداوندی کا نتیجہ تھا کہ مسلمانوں کا یہ مختصر سا لشکر قیصر و کسریٰ کی فوجوں کو روندتا ہوا، لتاڑتا ہوا گزر گیا۔

4۔ اس سورہ میں مسلمانوں کو اپنے مقامِ بلند اور فرض منصبی سے آگاہ کیا گیا ہے کہ تم خیرالامم ہو اور تمہاری خیرات و برکات صرف اپنے لیے اور صرف اپنوں کے لیے ہی نہیں بلکہ سب کائنات کے لیے، ساری نوع انسانی کے لیے ہیں۔ یہ منصب جتنا عظیم و بلند ہے اتناہی کٹھن اور دشوار بھی ہے۔ اس لیے حسد وعناد کے طوفان امڈ امڈ کر آئیں گے۔ اگر تم نے اللہ تعالیٰ کی رسی کو مضبوطی سے نہ پکڑے رکھا اور اخوت اسلامی کے لیے جذبہ سے سرشار نہ رہے اور آپس میں سر پھٹول شروع کردی تو نہ صرف یہ کہ اپنے منصب رفیع کی ذمہ داریوں سے عہدہ برآ نہ ہو سکو گے بلکہ تمہاری اپنی ناموس اور بقاء خطرے میں پڑجائے گی۔

5۔ معاشی ناہمواریاں قوم کی صفوں کو درہم برہم کر دیتی ہیں اور ان کی موجودگی میں کوئی پند و موعظمت مؤثرثابت نہیں ہوتی۔ ان کی ایک بہت بڑی وجہ سودخوری کا ظالمانہ نظام ہے۔ اس لیے اس کی حرمت کو یہاں پھر دہرایا گیا تاکہ ملت ایسے عوامل سے بچی رہے جواس کی صفوں میں انتشار اور ذہنوں میں اضطراب پیدا کرنے کا سبب بن سکتے ہیں۔

6۔ حضرت سیدنا عیسیٰ بن مریم علیہ السلام کولوگوں نے خدا کا بیٹا کہا‘ ثالث ثلاثہ (تین خداؤں سے ایک) ان کی والدہ کو خدا کی جورو کہا۔ یہ توحیدِ باری کے سراسر خلاف ہے۔ قرآن جو توحید کا سب سے بڑا مبلغ اور داعی ہے۔ اس نے ان کے اس باطل عقیدہ کی تکذیب کی اور اس کے بطلان کو آشکار کر دیا‘ لیکن کِس طرح؟ کیا حضرت مسیح علیہ السلام کی تنقیص کر کے؟ کیا ان کی شان گٹھا کر؟ کیا ان کے معجزات کا انکار کر کے؟ یا احترام نبوت کو پس پشت ڈال کر؟ ہرگزنہیں۔ بلکہ ان کے تقدس کا ذکر فرمایا، ان کی خرق عادت پیدائش کو بیان کیا، ان کے محیرالعقول معجزات کو بڑی شان سے پیش کیا کہ وہ باذن الہی مردوں کو زندہ اوراندھوں کو بینا کرتے ہیں، لوگوں کے گھروں میں رکھی ہوئی چیزوں کو جانتے ہیں اور جو کچھ وہ کہیں بیٹھ کر کھاتے ہیں انھیں ان کا علم ہے۔ غرضیکہ توحید کے اثبات کے وقت بھی پغیمبر کے منصبِ رفیع کو گھٹایا نہیں۔ اب وہ لوگ جو اپنے زعم باطل کے مطابق مسلمانوں کو مشرک تصور کرتے ہوئے انھیں توحید کا درس دیتے وقت حضور فخرموجودات، مصدرکمالات، نورمجسم صلی اللہ تعالی علیہ وآلہ وسلم کی شان رفیع میں بے باکیاں کرتے ہیں اور حضور کی ذاتِ اقدس و اطہر کے کمالاتِ علمی کو گھٹانا اپنے فنِ خطابت کی معراج خیال کرتے ہیں وہ خود سمجھ لیں کہ کیا وہ قرآن کا اتباع کر رہے ہیں یا اس کے اسلوب سے سراسر انحراف کر رہے ہیں۔