تعارف سورۃ السجدہ

اس سورہ مبارکہ کا نام السجدۃ ہے جو اس کی آیت نمبر 15 کے مضمون سے ماخوذ ہے۔ اس سورت کی آیات کی تعداد تیس ہے۔ یہ تین صد اسی کلمات پر مشتمل ہے اور اس کے ایک ہزار پانچ سو اٹھارہ حروف ہیں۔

زمانہ نزول

یہ مکہ مکرمہ میں نازل ہوئی۔ آیات کے اسلوب سے پتہ چلتا ہے کہ اس کا تعلق مکی زندگی کے درمیانی دور سے ہے جب کہ اسلام کے خلاف کفار نے طعن و تشنیع، استہزاء و تمسخر کی مہم زور و شور سے شروع کر دی تھی لیکن ابھی عمومی ظلم و ستم اور جور و جفا کا آغاز نہیں ہوا تھا۔

مضامین

اس سورت کا مطالعہ کرنے سے یہ حقیقت آشکار ہو جاتی ہے کہ حضور نبی کریم (صلی اللہ علیہ وآلہ وسلم) نے اپنی قوم کو تین امور کے ماننے کی دعوت دی تھی اور وہ کسی قیمت پر انہیں ماننے کے لیے تیار نہیں تھے:

1. اللہ تعالیٰ ہے اور وحدہ لاشریک ہے۔
2. یہ کتاب جس کی آیتیں میں تمہیں پڑھ کر سناتا ہوں یہ اسی وحدہ لاشریک نے تمہاری ہدایت کے لیے مجھ پر نازل کی ہے۔
3. تمہیں مرنے کے بعد بھلا نہیں دیا جائے گا بلکہ قیامت کے روز تمہیں اپنی قبروں سے زندہ کرکے اٹھایا جائے گا اور تمہارے ایک ایک عمل کی تم سے باز پرس کی جائے گی۔

یہی تین باتیں تھیں جن کی نبی کریم (صلی اللہ علیہ وآلہ وسلم) انہیں بار بار دعوت دیتے تھے اور یہی تین باتیں ایسی تھیں جن سے انہیں چڑ تھی وہ انہیں ماننے کے لیے قطعا آمادہ نہ تھے۔ اس سورت میں ان امور کے متعلق ان کے شکوک و شبہات کا بڑے حقیقت پسندانہ اور اثر انگیز اسلوب میں رد کیا گیا ہے۔ اگر انسان غور و فکر کی قوتوں سے محروم نہ کر دیا گیا ہوتو وہ ان پر ایمان لانے کے لیے مجبور ہو جاتا ہے۔

منکرین کا یہ عام دستور ہے کہ جب انہیں ان کی بدکرداریوں سے روکا جاتا ہے اور انہیں روز قیامت سے ڈرایا جا تا ہے، تو وہ عبرت پذیری کے بجائے یہ سوال کرنے لگتے ہیں کہ قیامت کب آئے گی؟ حالانکہ ان کا فائدہ قیامت کا انتظار کرنے میں نہیں بلکہ اپنی اصلاح حال کرنے میں ہے۔ جب قیامت قائم ہوگی‘ تو ان کی کوئی آہ و فغاں سنی نہیں جائے گی۔

سورہ کی آخری آیت میں اس بات کی طرف اشارہ کر دیا کہ اب انہیں ان کے حال پر چھوڑ دو‘ ان کی اصلاح کے لیے خواہ مخواہ اپنے آپ کو ہلکان نہ کرو۔ یہ اس قابل ہی نہیں ہیں کہ تمہاری دعوت کو سمجھ سکیں اور اسے قبول کر سکیں۔