تعارف سورۃ القیامۃ

اس سورہ کے دو نام مذکور ہیں: ’سورۂ لا اقسم‘ اور ’سورۂ القیامۃ‘ اس میں دو رکوع، چالیس آیتیں، ایک سو ننانوے کلمے ار چھ سو بانوے حروف ہیں۔

نزول

علماء کرام کا اس بات پر اتفاق ہے کہ یہ سورہ مکہ مکرمہ میں نازل ہوئی۔ اس کی آیات میں غور کرنے سے معلوم ہوتا ہے کہ اس کا تعلق مکی عہد کے ابتدائی دور سے ہے۔

مضامین

قیامت کے بارے میں کفار و مشرکین جن شکوک و شبہات میں بری طرح گرفتار تھے کئی قسمیں کھا کر ان کا ازالہ کیا جارہا ہے۔ فرمایا کہ جس چیز کو تم محال سمجھ رہے ہو ہمارے لیے وہ بالکل آسان ہے۔ اس کے بعد قیامت کے ہولناک احوال کا ذکر کیا گیا اور غافل انسانوں کی بےبسی اور بےکسی کی تصویر کھینچ دی گئی۔

ابتداء میں حضور صلی اللہ علیہ وآلہ وسلم نزول وحی کے وقت بڑی مشقت محسوس فرماتے۔ اس بات کا احساس بےچین رکھتا کہ کہیں کوئی لفظ بھول نہ جائے۔ اس لیے جب جبرائیل امین کلام الٰہی کی وحی کرتے تو حضور جلدی جلدی ساتھ ساتھ اس کو دہراتے جاتے۔ اللہ تعالیٰ نے اس خدشہ کو ہمیشہ کے لیے دور کردیا۔ فرمایا: اے حبیب! وحی کو آپ کے لوح قلب پر ثبت کردینا بھی ہماری ذمہ داری ہے۔ اس کے علاوہ اس کے معانی اور مطالب کا سمجھانا، اس کے اسرار و معارف پر آگاہی بخشانا بھی ہم نے اپنے ذمہ کرم پر لیا ہوا ہے۔ آپ اس بارے میں ہر گز متفکر نہ ہوا کریں۔

اس اطمینان دہی کے بعد یہ بتایا کہ قیامت کے روز اللہ کے نیک بندے جب حاضر ہوں گے تو ان کے چہرے گلاب کے پھول کی طرح شفگتہ ہوں گے، ان کی مشتاق نگاہیں انوار الٰہی کے دیدار میں مستغرق ہوں گی۔ ، لیکن بدکار لوگ جب وہاں پکڑ کر لائے جائیں گے تو ان کے چہروں پر نحوست برس رہی ہوگی۔ خوف سے تھر تھر کانپ رہے ہوں گے۔ پھر ایسے لوگوں کی موت کا منظر پیش فرمایا دوسرے رکوع میں نام لیے بغیر مکہ کے ایک مغرور اور خود سر رئیس (اغلباً وہ ابو جہل ہے) کے اطوار واحوال بیان فرمائے اور اس کے فطری انجام سے آگاہ کردیا۔ تاکہ عبرت پکڑنے والے عبرت کو پکڑ سکیں۔