تعارف سورۃ النساء

اس سورہ پاک کا نام النساء ہے۔ باتفاقِ علماء مدینہ طیبہ میں نازل ہوئی۔ اس کی آیتوں کی تعداد ایک سو چھہتر، الفاظ تین ہزار پینتیس، حروف سولہ ہزار تیس اور چونتیس رکوع ہیں۔ یہ سورہ پاک بڑی اہم اور دور رس اصلاحات پر مشتمل ہے جنہیں اگر دینِ اسلام کا طرہ امتیاز کہا جائے تو قطعاً مبالغہ نہ ہوگا۔

زمانہ نزول

علماء و محققین کی رائے میں اس سورہ کے نزول کا آغاز جنگِ احد (شوال 3ہجری) کے بعد ہوا۔ جب ستر مسلمانوں کی شہادت کے بعد یتیموں کی کفالت اور ورثہ کی تقسیم کے مسئلے نے بڑی اہمیت اختیار کر لی تھی۔ نمازِ خوف غزوہ ذات الرقاع میں پڑھی گئی اور یہ غزوہ 4 ہجری میں ہوا۔ تیمم کی اجازت غزوہ بنی مصطلق میں دی گئی اور یہ غزوہ 5 ہجری میں پیش آیا۔ ان واقعات اور سِنن سے معلوم ہوتا ہے کہ اس سورہ کا آغاز اُحد کے بعد ہوا اور اس کا سلسلہ نزول 5 ہجری تک جاری رہا۔

مضامین

گھریلو زندگی: اس سورہ میں سب سے پہلے اور سب سے زیادہ توجہ گھریلو زندگی کو خوشگوار بنانے پر دی گئی ہے کیونکہ گھر ہی قوم کی خِشتِ اول ہے۔ گھر ہی وہ گہوارہ ہے جہاں قوم کے مستقبل کے معمار پرورش پاتے ہیں۔ گھر ہی وہ مدرسہ ہے جہاں اخلاق و کردار کی جو قدریں اچھی یا بری، بلند یا پست‘ لوحِ قلب پر لکھ دی جاتی ہیں ان کے نقوش کبھی مدھم نہیں پڑتے۔ صرف جذبات کتنے پاکیزہ اور معصوم کیوں نہ ہوں حقائق کا مقابلہ کرنے کی تاب نہیں لا سکتے۔ قرآن حقائق کو حقائق کی حیثیت سے دیکھتا ہے۔ اس لیے گھر کے ماحول کو خوشگوار بنانے کے لیے مبہم نصیحتوں پر اکتفاء نہیں کیا بلکہ اس کے واضح اور غیرمبہم قاعدے اور ضابطے بھی متعین کر دیے ہیں۔

ا۔ یتیم بچے: جس گھر میں یتیم بچوں پر زیادتیاں کی جائیں اور ان کے سرپرست ان کی دولت کو خرد برد کرنے کے لیے سازش و فریب کے جال بنتے رہیں اس گھر کی فضاء کبھی صحت مند نہیں ہوسکتی اور خاندان کے افراد کبھی سچی مسرت کی لذتوں سے آشناء نہیں ہوسکتے۔ اس لیے قرآنِ حکیم نے اپنے ماننے والوں کو صاف الفاظ میں حکم فرمایا ہے کہ وہ یتیم بچوں اور بچیوں کے ساتھ اچھا سلوک کریں۔ ان کے حقوق کی نگہبانی اور ان کے ماوال کی حفاظت کریں بلکہ احساسات تک کا پاس رکھیں۔ جو بھی ان بیکسوں کے ورثہ میں ناجائز تصرف کرے گا وہ خوب جان لے کہ وہ آتشِ جہنم سے اپنے پیٹ کو بھر رہا ہے۔

ب۔ عورت کا مقام: عرصہ ہائے دراز سے یہ صنفِ نازک ظلم و ستم کا نشانہ بنی ہوئی تھی۔ قدرت نے اگرچہ اسے مرد کی طرح ذی روح اور ذی شعور بنایا تھا لیکن اس کے ساتھ برتاؤ مٹی کی بےجان مورتیوں کا سا کیا جاتا تھا۔ جوا میں داؤ پر اسے لگایا جا سکتا تھا، خاوند کی لاش کے ساتھ قانوناً اسے جل کر راکھ ہونا پڑتا تھا، کہیں اسے تمام برائیوں کی جڑ اور انسان کی ساری بدبختیوں کا سرچشمہ یقین کیا جاتا تھا اور کہیں چوٹی کے نامور فلسفی اس کے انسان ہونے کو بھی مشکوک نگاہوں سے دیکھا کرتے تھے۔ اس کو ملکیت کے حقوق حاصل نہ تھے۔ اسے ازدواجی بندھنوں میں مقید کرنے سے پہلے رائے لینے کا تصور تک نہ تھا۔ یہ بلکہ اس سے بھی بدتر حالات تھے جن میں اسلام سے پہلے یہ صنفِ نازک گرفتار تھی۔ جہاں کنبہ کے نصف افراد کی بےبسی کا یہ عالم ہو وہاں خوشی اور مسرت کا گزر کہاں؟ قرآن نے پہلی مرتبہ اعلان کیا کہ جس طرح مرد کے حقوق عورت پر ہیں اسی طرح عورت کے حقوق بھی مرد پر ہیں۔ اس کی رائے ہے اور قانون اس کی رائے کا احترام کرتا ہے۔ اس کو اپنے والدین، اپنے خاوند، اپنی اولاد کا وارث تسلیم کیا گیا۔ اس کو ملکیت کے حقوق تفویض کیے گئے۔

کیونکہ مرد اور عورت کا اولین رشتہ ازدواج کا رشتہ ہے اس لیے اس میں جو بےراہ رویاں پائی جاتی تھیں ان کی اصلاح کی۔ تعدد ازدواج پر پابندیاں لگائیں اور اس کی اجازت دی تو بڑی شروط و قیود کے ساتھ۔ مرد کو بیوی کے ساتھ حسنِ سلوک کا حکم دیا اور اگر اس کی کوئی چیز پسندِ خاطر نہ ہو تو اس پر صبر کرنے کی ہدایت کی۔ اگر باہمی تعلقات کشیدہ ہو جائیں تو اصلاحِ حال کی تدبیر بتائی لیکن عورت کو یہ تمام حقوق دینے کے بعد گھر کی سرداری اور نظم و نسق کی ذمہ داری مرد کو سونپی کیونکہ اس کی فطری صلاحیتیں اس بارِ گراں کو اٹھا سکتی ہیں۔ یہی حقائق کی نگہداری اور ہر بات میں میانہ روی اس بات کی دلیل ہے کہ قرآنِ کریم کلامِ الٰہی ہے کیونکہ اس میں تفریط کا گزر نہیں تو افراط کا بھی نشان نہیں۔

ج۔ تیسری چیز جو گھر کے ماحول کو خوشگوار رکھنے کے لیے بڑی اہمیت رکھتی ہے وہ مالی حقوق منصفانہ تقسم ہے۔ اس میں معمولی سی کوتاہی بھائی کو بھائی سے جدا کر دیتی ہے۔ اس لیے تقسیمِ میراث کا مفصل قانون نازل فرمایا۔ اسلام کے نظامِ میراث کی جو امتیاز خصوصیات ہیں ان کا جائزہ تو اپنے اپنے مقام پر لیا جائے گا لیکن ایک بےمثل تبدیلی یہ کی کہ عورت (ماں، بیٹی، بیوی) کو بھی مرد کی طرح وارث قرار دیا۔

2۔ حق و باطل کی جنگ: حق و باطل کی جنگ جس کا آغاز بدر سے ہوا تھا ابھی جاری تھی۔ احد میں مسلمانوں کی کثیر تعداد کے شہید ہونے کے باعث منافق یہودی اور مشرک قبائل کے حوصلے بڑھ گئے تھے۔ اس سورہ میں بھی مسلمانوں کو حق کی حفاظت کے لیے اپنی جان تک بازی لگانے کا حکم دیا گیا اور اس کے حوصلوں کو بلند کیا گیا اور منافقوں کے مختلف گروہوں کے ساتھ ہر ایک کے مناسبِ حال رویہ اختیار کرنے کی ہدایت کی گئی۔

3۔ انفرادی کردار: انفرادی کردار کی تعمیر کی طرف بھی خاص توجہ دی گئی ہے اور ان قوموں کی اقتداء سے روکا گیا ہے جو عمل سے جی چراتی ہیں، حق کے لیے کسی جانی و مالی قربانی کے لیے آمادہ نہیں ہوتیں اور اس کے باوجود اپنے آپ کو انعاماتِ خداوندی کا واحد حقدار سمجھتی ہیں۔ امتِ مصطفویہ کو صاف صاف بتا دیا گیا کہ اس رزم گاہِ حیات میں جیت اسی کی ہوگی جو اپنے پیہم اور نتیجہ خیز عمل سے اپنی فوقیت اور برتری ثابت کر دے۔ خیالی پکاؤ پکانے اور ہوئی قلعے تعمیر کرنے سے کچھ حاصل نہ ہوگا۔ نیز یہ بھی فرمایا کہ مسلمانوں کے باہمی برتاؤ کا دار و مدار احسان اور مہربانی پر ہونا چاہیے۔ جتنی قرابت زیادہ ہوگی اتنی ہی اس کے ساتھ مہربانی اور احسان زیادہ ہونا چاہیے۔

4۔ اطاعتِ رسول: اس سورہ میں اللہ تعالیٰ نے اپنے حبیب صلی اللہ علیہ وآلہ وسلم کی غیرمشروط اطاعت کا حکم دیا ہے اور فلا وربک (اے محبوب تیرے رب کی قسم) کے پرجلال الفاظ سے قسم اٹھا کر بتایا کہ کوئی شخص مسلمان نہیں ہوسکتا جب تک وہ میرے رسول کے ہر فیصلے کو خواہ وہ اس کے خلاف بھی ہو دل و جان سے بخوشی قبول نہ کر لے۔