تعارف سورۃ الرعد

اس سورہ مبارکہ کا نام ’الرعد‘ ہے کیونکہ اس کی ایک آیت میں یہ کلمہ مستعمل ہے ’یسبح الرعد بحمدہ‘۔ اس کی آیات کی تعداد تینتالیس ہے، یہ آٹھ سو پچپن کلمات اور تین ہزار پانچ سو چھ حروف پر مشتمل ہے اور اس کے چھ رکوع ہیں۔

نزول

اس کا نزول مکہ مکرمہ میں ہوا یا مدینہ طیبہ میں‘ اس بارے میں علماء کی آراء مختلف ہیں۔ خود حضرت ابن عباس سے دونوں قول مروی ہیں۔ آیات کا مضمون مکی سورتوں سے بڑی مناسبت رکھتا ہے۔ علامہ آلوسی نے یہ کہہ کر اس اختلاف کو ختم کیا ہے کہ یہ سورت مکی ہے لیکن اس میں کئی آیتیں ایسی بھی ہیں جو مدنی ہیں ’والذی یجمع بہ بین الاختلاف انھا مکیۃ الاآیات منھا‘ (روح المعانی)

مضامین

سورہ کا آغاز اس بیان سے ہوا کہ قرآن حکیم کلام الٰہی ہے۔ اس کے بعد اللہ تعالیٰ کی وحدانیت، اس کی عظمت و کبریائی، اس کی قدرت کاملہ اور حکمت بالغہ کو ایسی روشن اور ناقابل انکار تکوینی آیات سے ثابت کیا گیا ہے جن کا انکار فقط وہی بدنصیب کرسکتا ہے جس نے عقل و فہم کا چراغ بجھا دیا ہو۔ سر پر آسمان ہے جس کی رفعت اور وسعت کا اندازہ لگایا ہی نہیں جاسکتا، پھر اس میں آفتاب و مہتاب اپنے انوار سے ہر طرف اجالا کر رہے ہیں، نیچے زمین کا فرش بچھا ہے، اس میں کہیں چشمے ابل رہے ہیں، کہیں میٹھے اور ٹھنڈے پانی کے دریا بہ رہے ہیں، کہیں پہاڑ ہیں جن کی برف پوش چوٹیاں آسمان سے باتیں کر رہی ہیں اور جن کی وادیاں قدرت کی رنگینیوں کی جلوہ گاہ ہیں، کہیں شاداب کھیت لہلہا رہے ہیں، کہیں باغات اپنے گوناگوں، اشجار و اثمار کی بہار دکھا رہے ہیں۔ زمین ایک ہے پانی ایک ہے لیکن اس ایک زمین سے جو پھل پھول اگتے ہیں وہ اپنے رنگ و بو میں، اپنے ذائقہ اور تاثیر میں ایک دوسرے سے بالکل مختلف ہیں۔ یہ بوقلمونی اور تنوع کہاں سے آگیا؟ کیا کوئی قلب سلیم اس ذات پاک کا انکار کر سکتا ہے جس کی قدرت کی جلوہ طرازیاں چاروں طرف محو خرامِ ناز ہیں۔

اس قدرت کاملہ اور حکمت بالغہ کے ساتھ ساتھ ذرا اس کے علم محیط کا بھی اندازہ لگائیے؛ ظاہر و باطن میں کوئی چیز بھی تو ایسی نہیں جس کی اسے خبر نہ ہو۔ شکم مادر میں ایک قطرہ آب کو انسان بننے تک جن مرحلوں سے گزرنا پڑتا ہے، جن تندیلیوں سے دوچار ہونا پڑتا ہے، جو نازک اور لطیف تغیرات وہاں روپذیر ہوتے ہیں ان میں سے کوئی بھی تو ایسی بات نہیں جو اس کے علم اور اس کے اذن کے بغیر رونما ہو رہی ہو۔ جس ذات اقدس کی قدرت اتنی کامل، جس کی حکمت اتنی محکم اور جس کا علم اتنا محیط ہو بلاشبہ وہی اور صرف وہی معبود برحق ہے۔

ان براہین قاطعہ کے باوجود منکرین حق کی ہٹ دھرمی کچھ کم حیرت انگیز نہیں۔ وہ باطل کے اندھیروں سے اتنے مانوس ہو چکے ہیں کہ حق کا اجالا اپنی ساری دلآویزیوں کے باوجود ان کے لیے ناقابل برداشت ہے۔ وہ دعا مانگتے ہیں تو یہ عرض نہیں کرتے کہ انہیں نور حق کو پہچاننے اور راہ حق پر چلنے کی سعادت نصیب ہو بلکہ عرض کرتے ہیں کہ اگر یہ سچ ہے تو ان پر عذاب کیوں نہیں آجاتا۔ لیکن رحمت خداوندی ان کی اس طفلانہ ضد پر فوراً مؤاخذہ نہیں کرتی بلکہ انہیں مزید سوچنے سمجھنے اور حق قبول کرنے کی مہلت دی جاتی ہے ’وان ربک لذو مغفرۃ علی ظلمہم‘ اے محبوب تیرا رب لوگوں کی ظلم کیشیوں کے باوصف ان سے درگزر ہی فرماتا رہتا ہے۔

اسلام اپنے ماننے والوں میں جو ذہنی ، روحانی اور عملی انقلاب برپا کرتا ہے۔ اس کا ذکر بھی آیات انیس تا چوبیس میں فرما دیا اور اسلام سے بےبہرہ ہوتے ہوئے انسان کا دامن فکر و عمل جن آلودگیوں سے ملوث ہوتا ہے۔ انہیں بھی آیت نمبر 25 میں جامع طور پر بیان کر دیا تاکہ اسلام کے انقلاب آفرین اثرات کا صحیح اندازہ لگایا جاسکے۔

اگرچہ دوسری سورتوں کی طرح اس سورت کی ہر آیت بھی رشد و ہدایت کا مینار ہے۔ لیکن میں قارئین کی خصوصی توجہ آیات نمبر 11، 17، 28 کی طرف مبذول کرانا چاہتا ہوں۔ آیت نمبر 11 میں اللہ تعالیٰ نے افراد و اقوام کے عروج و زوال کا ایک اٹل قانون بیان فرما دیا ہے۔ ہر وہ شخص یا قوم جو اپنی موجودہ پستی اور ذلت پر نالاں ہے اور عروج و بلندی کی خواہاں ہے وہ اس آیت کو بار بار پڑھے۔

قرآن سے ناواقف لوگ عام طور پر یہ کتنے سنے جاتے ہیں کہ تنازع البقاء (STRUGGLE FOR EXISTENCE) اور بقائے اصلح (SURVIVAL OF THE FITTEST) کا نظریہ سب سے پہلے ڈارون نے پیش کیا لیکن اگر آپ آیت نمبر 17 کا بغور مطالعہ فرمائیں گے تو آپ تسلیم کریں گے کہ حکمت کی انگوٹھی کا یہ قیمتی نگینہ بھی قرآن کے بحر حکمت کا ہی ایک چمکتا ہوا موتی ہے۔

انسان اپنی مادی اور سائنسی ترقی کے باوجود آج بےچین اور مضطرب ہے۔ اس کے فکر کے افق پر خوفناک اندیشوں اور کربناک تصورات کے بادل چھائے رہتے ہیں۔ نرم و گداز صوفوں پر بیٹھ کر بھی اسے اطمینان نصیب نہیں۔ ٹیلیویژن کی سکرین پر حسن عریاں کی عشوہ طرازیاں اور نغموں کی پھوہار بھی اس کی پیاس کو بجھا نہیں سکتی۔ دولت کے انبار بھی اس کو تسکین نہیں دے سکتے۔ اطمینان قلب ہی وہ جنس نایاب ہے جس کی انسان کو آج سب سے زیادہ ضرورت ہے۔ قرآن کریم نے اپنے سادہ، دلنشین اور روح پر درانداز میں یہ بتا کر ’الابذکر اللہ تطمئن القلوب‘ (آیت: 28) انسان کو اس متاع عزیز کا سراغ بتا دیا۔

آخر میں یہ فرما کر بات ختم کر دی کہ اے محبوب میں نے تجھے رسالت کا منصب بخشا ہے اور صحیفہ رشدو ہدایت عطا فرمایا ہے تاکہ تو اندھیروں میں بھٹکتی ہوئی انسانیت کو شاہراہ ہدایت پر گامزن کر دے۔ زبان تیری ہے لیکن بات میری ہے۔ قدم تو اٹھاتا ہے توفیق میں بخشا ہوں۔ رکاوٹوں دشواریوں کو نظر انداز کرتے ہوئے منکرین کے شوروغوغا کو خاطر میں نہ لاتے ہوئے آپ اپنے فرض رسالت کی ادائیگی میں سرگرم رہیں۔ اگر یہ کہ باطن تیری نبوت کا انکار بھی کریں تو پرواہ نہیں۔ تیری رسالت ، تیری صداقت کا میں خود گواہ ہوں اور وہ لوگ بھی گواہ ہیں جن کے دل نور وحی سے منور ہیں۔