تعارف سورۃ الجن

اس سورہ پاک میں جنات کے احوال کا بیان ہے نیز اس کی پہلی آیت میں ’’الجن‘‘ کا لفظ بھی مذکور ہے، اس لیے اس کا نام الجن تجویز ہوا ہے۔

نزول

اس بات پر سب علماء متفق ہیں کہ یہ سورت مکہ مکرمہ میں نازل ہوئی، لیکن مکی زندگی کے کس دور میں نازل ہوئی اس کا تعین مشکل ہے، البتہ حضرت ابن عباس رضی اللہ عنہ کی ایک روایت سے یہ قیاس کیا جا سکتا ہے کہ اس کا نزول مکی زندگی کے ابتدائی دور میں ہوا۔

مضامین

1۔ رسول الثقلین، نبی الحرمین (صلی اللہ علیہ وآلہ وسلم) جن وانس، سب کے نبی تھے، جنات نے کئی مرتبہ بارگاہ اقدس میں حاضری دی۔ علامہ پانی پتی، علامہ سید آلوسی، علامہ قرطبی اور دیگر مفسرین نے اپنی تفاسیر میں اسی قول کو ترجیح دی ہے کہ جنات نے حضور سے چھ بار ملاقات کی۔ اس لیے احادیث میں تعارض نہیں جس طرح بعض لوگوں کو غلط فہمی ہوئی ہے اور ان میں سے بعض نے گھبرا کر جنات کے وجود ہی کا انکار کردیا ہے۔ بلکہ مختلف احادیث میں مختلف ملاقاتوں کے احوال مذکور ہیں۔ ان احادیث میں نہ تضاد ہے اور نہ تعارض ار نہ پریشان ہونے کی کوئی وجہ۔

پہلی حاضری وہ ہے جس کا ذکر ان آیات میں کیا گیا ہے۔ صحیح روایات کے مطابق یہ واقعہ اس وقت رونما ہوا جب حضور (صلی اللہ علیہ وآلہ وسلم) اپنے چند صحابہ کے ساتھ عکاظ کے بازار کی طرف جارہے تھے۔ یہ جگہ مکہ سے دورات کی مسافت پر ہے۔ یہاں زمانۂ جاہلیت میں میلے لگا کرتے، خرید وفروخت ہوتی اور اردگرد کے سارے قبائل وہاں جمع ہوے۔ نخلہ کے مقام پر صبح کا وقت ہوگیا۔ حضور صبح کی نماز ادا فرمرہے تھے اور سورۂ اقرأ یا سورہ طہٰ کی تلاوت ہورہی تھی کہ جنات کے ایک گروہ کا ادھر سے گزر ہوا۔ سوزوگداز میں ڈوبی ہوئی آواز جب انہوں نے سنی تو وہاں رگ گئے۔ بڑی خاموشی اور توجہ سے اس کو سنتے رہے۔ اس کلام پاک کے سننے سے ان کے دل کی دنیا بدل گئی ، غفلت کے پردے چاک ہوگئے اور نور ایمان سے ان کے سینے روشن ہوگئے۔ دولت ایمان سے مالا مال ہوکر جب وہ اپنے قبیلہ میں پہنچے تو انہوں نے ان کو بھی بتایا کہ ہمارے ساتھ یہ واقعہ پیش آیا۔ ہم نے کفرو شرک سے توبہ کرلی ہے۔ تمہارے لیے بھی یہی بہتر ہے کہ تم جن گمراہیوں میں مبتلا ہو ان سے برأت کا اظہار کرو اور اس رسول مکرم کی دعوت کو قبول کرلو۔ اللہ تعالیٰ نے ان جنات کی آمد، قرآن کریم کو غور سے سننے اور پھر اپنے قبیلہ میں جاکر تمام ماجرا بیان کرنے کے سارے حالات بذریعہ وحی اپنے نبی کریم (صلی اللہ علیہ وآلہ وسلم) کو بتادیے اور حکم دیا کہ آپ سب لوگوں میں اس کا اعلان کریں۔

2۔ صرف کسی آواز کے سننے کو عربی میں سمع کہتے ہیں اور استمع کا معنی غور اور توجہ سے سننا ہے اور اسی غور وتدبر سے سننے کا یہ نتیجہ نکلا کہ ان کو ہدایت نصیب ہوگئی۔ اس کلام پاک کا یہی اعجاز ہے کہ جو اسے توجہ سے پڑھتا یاسنتا ہے اس کی تاثیر، اس کے دل میں اثر کرجاتی ہے اور وہ ہدایت پا جاتا ہے۔

نفر کا لفظ عام طور پر تین سے دس تک کے گروہ کے لیے استعمال ہوتا ہے لیکن اس سے زیادہ پر بھی اس کا اطلاق ہوتا رہتا ہے۔

3۔ جنات جب واپس اپنے قبیلہ میں پہنچے تو انہیں جا کر بتایا کہ ہم نے ایک عجیب وغریب قرآن سنا ہے جو ہدایت کی طرف رہنمائی کرتا ہے۔ ہم تو اس سے اتنے متاثر ہوئے ہیں کہ سنتے ہیں اس پر ایمان لے آئے ہیں اور یہ اعلان کرتے ہیں کہ ہم عمر بھر کبھی اپنے رب کے ساتھ کسی کو شریک نہیں ٹھہرائیں گے۔

عجباً مصدر ہے بمعنی عجیب۔ اس میں مبالغہ ہے۔ یعنی یہ کلام اتنا عجیب وغریب ہے کہ ہم نے اج تک نہ ایسی فصاحت و بلاغت دیکھی ہے، نہ تبلیغ حق کا کہیں ایسا بانکپن نظر آیا ہے۔ الفاظ ہیں تو جیسے سچے موتیوں کی لڑیاں ہوں اور معانی ہیں تو اتنے ارفع ، اتنے بلند کہ طائرِ فکر بھی وہاں دم نہیں مار سکتا اور اثر ہے تو ایسا کہ خود بخود دل کھنچے چلے آتے ہیں۔

ان آیات سے معلوم ہوتا ہے کہ یہ جنات، پہلے مشرک تھے۔ مشرک قوموں کی طرح انہوں نے بھی کسی کو اللہ تعالیٰ جورو اور کسی کو اس کا بیٹا بنا رکھا تھا۔ قرآن سننے سے جب نور ایمان، ان کے دلوں میں چمکا تو انہوں نے ان تمام خرافات کو پرے پھینک دیا۔

سورۂ الاحقاف میں جن، جنات کا ذکر ہے وہ حضرت موسی کے پیرو تھے اور اہل کتاب تھے۔ اس لیے وہ واقعہ اس واقعہ سے جدا ہے۔ نیز یہ بھی معلوم ہوا کہ جنات میں بعض مومن ہوتے ہیں اور بعض کافر۔ اور انسانوں کی طرح یہ بھی مکلف ہیں کہ وہ اللہ تعالیٰ پر ایمان لائیں اپنے زمانے کے نبی کی اطاعت کریں اور اس کے لائے ہوئے دین کی پوری پوری اطاعت کریں۔ نیز یہ کہ ان میں سے نبی مبعوث نہیں کیے جاتے بلکہ وہ انسانوں کے نبیوں کے ہی پیروکار ہوتے ہیں۔