تعارف سورۃ العنکبوت

اس سورت کا نام العنکبوت ہے جس کا ذکر آیت 41 میں آرہا ہے۔ اس کی آیات کی تعداد انہتر ہے۔ نو سو اسی کلمات اور چار ہزار ایک سو پینسٹھ حروف ہیں۔

زمانہ نزول

حسن، عکرمہ، عطاء اور جابر رحمہم اللہ کے نزدیک یہ ساری سورت مکہ مکرمہ میں نازل ہوئی۔

مضامین

1۔ حضور فخر عالم (صلی اللہ علیہ وآلہ وسلم) کی بعثت اور دعوت توحید سے سارا مکہ آتش زیرپا ہوگیا۔ انہوں نے اسلام کی شمع کو گل کرنے کا مصمم ارادہ کر لیا۔ وہ سلیم الطبع لوگ جو کفر و شرک کی عفونتوں سے دل برداشتہ ہوگئے تھے اور حق کے حسن سے مسحور ہو کر دامن حبیب کبریا علیہ والتحیۃ والثناء میں پناہ لے لیتے ان پر ظلم و ستم کی انتہا کر دی جاتی۔ بعض لوگ اسلام کی صداقت کے تو معترف تھے لیکن ان مظالم کو برداشت کرنے کی ہمت ان میں نہ تھی اس لیے ان حالات میں اپنی قسمت کو اسلام کے ساتھ وابستہ کرنا قرین دانشمندی نہیں سمجھتے تھے۔ بعض اس قسم کے بھی لوگ تھے جنہوں نے اسلام کو قبول کیا لیکن مصائب و آلام کی آندھیوں میں وہ اپنی شمع ایمان روشن نہ رکھ سکے۔ ان سب لوگوں کو بتایا جا رہا ہے کہ اللہ تعالیٰ کی بارگاہ میں صرف وہی لوگ سرفراز ہوتے ہیں جو آزمائش کی کٹھن گھڑیوں میں ثابت قدم رہتے ہیں اور امتحان میں کامیاب ہوتے ہیں۔ ایسے لوگ جو زبان سے اسلام کا دم بھرتے ہیں اور ایمان کا دعویٰ کرتے ہیں لیکن امتحان کے میدان میں صبر و استقامت کا مظاہرہ نہیں کر سکتے وہ قطعا قابل التفات نہیں۔ اللہ تعالیٰ کی یہی سنت ہے۔ اور یہی کسوٹی ہے جس پر اس نے اہل ایمان کو پہلے بھی پرکھا اور قیامت تک پرکھے گا۔

2۔ کفار مکہ کو اپنے بےشمار خداؤں پر بڑا گھمنڈ تھا۔ وہ سمجھتے تھے کہ جب اتنے خدا ہماری پشت پناہی کرنے کے لیے موجود ہیں تو ہمیں محمد روحی فداہ (صلی اللہ علیہ وآلہ وسلم) کے ایک خدا سے ڈرنے کی کیا ضرورت ہے۔ اس کے علاوہ مادی وسائل کی بھی ان کے ہاں کمی نہ تھی۔ وہ کعبہ کے متولی اور خدمتگار تھے۔ سب قبائل ان کے دل سے عزت کرتے اور کسی ہنگامی موقع پر ان کے ادنیٰ اشارہ پر شمشیر بکف میدان میں آنے کے لیے تیار تھے۔ شجاعت و مردانگی اور جنگی مہارت میں بھی ان کا جواب نہ تھا۔ ان حالات کے پیش نظر انہیں اپنے مستقبل کے بارے میں کوئی تشویش نہ تھی۔ وہ یہ سمجھتے تھے کہ ان کا قلعہ اتنا مستحکم اور محفوظ ہے کہ اس پر کوئی یلغار کارگر ثابت نہیں ہوسکتی۔

اللہ تعالیٰ اپنے محبوب کریم (صلی اللہ علیہ وآلہ وسلم) کو فرماتے ہیں کہ اے حبیب! انکے یہ سارے آسرے، انکے یہ سارے سہارے مکڑی کے جالے کی مانند ہیں ’وان اوھن البیوت لبیت العنکبوت‘ اور تمام گھروں سے کمزور ترین گھر مکڑی کا گھر ہی ہے جو ایسے کمزور اور بادے گھر میں بستا ہو اور پھر قہر خداوندی کی بجلیوں کی دعوت دے رہا ہو اس سے زیادہ احمق بھی کوئی اور ہو سکتا ہے۔

3۔ اس کے بعد دلائل توحید بیان کیے گئے جو آسان اور زود فہم ہونے کے ساتھ ساتھ اتنے مؤثر ہیں کہ خود بخود قلب روح میں نقش ہوتے چلے جاتے ہیں لیکن ان سے فائدہ وہی شخص اٹھاتا ہے جس کے دل میں حق کی طلب ہو اور جس کی آنکھوں پر تعصب کی پٹی بندھی ہوئی نہ ہو۔

4۔ آخر میں ’والذین جاھدوا فینا‘ فرما کر اس جانگسل اور کٹھن راہ کے مسافروں کی تسکین اور حوصلہ افزائی کی انتہا فرما دی واقعی اللہ تعالیٰ بڑا بندہ نواز اوع ذرہ پرور ہے وہ اپنے چاہنے والوں کو کبھی تنہا نہیں چھوڑتا۔