تعارف سورۃ القدر

اس سورہ کا نام ’القدر‘ ہے۔ اس میں ایک رکوع، پانچ آیتیں، تیس کلمے اور ایک سو بارہ حروف ہیں۔

نزول

علامہ آلوسی اور دیگر مفسرین رقمطراز ہیں کہ اس سورہ کے نزول کے بارے میں علماء کے دو قول ہیں۔ ابوحیان اندلسی اپی تفسیر’بحر محیط‘ میں لکھتے ہیں کہ یہ سورہ مدنی ہے۔ علامہ واحدی کا قول ہے کہ یہ مدینہ طیبہ میں سب سے پہلے نازل ہوئی۔ لیکن اکثر علماء تفسیر کا یہی قول ہے کہ یہ مکی ہے۔ پہلے قول کی تائید میں جو روایات ذکر کی جاتی ہیں وہ سند کے اعتبار سے قابل اعتبار سے قابل اعتبار نہیں۔ نیز سورہ کا مضمون بھی دوسرے قول کی تائید کرتا ہے۔ اس سے پہلی سورہ میں نزول قرآن کا ذکر تھا۔ اس سورہ میں اس رات کی قدرومنزلت بیان کی گئی ہے جسے یہ اعزاز نصیب ہوا۔

مضمون

قدر کا معنی تقدیر اور قسمت بھی ہے اور عزت و منزلت بھی۔ یہاں دونوں معنےٰ لیے جاسکتے ہیں۔ ابتداً یہ بتایا گیا کہ یہ معمولی رات نہیں بلکہ وہ رات ہے جس میں اللہ کے اس کلام معجز نظام کے نزول کی ابتدا ہوئی جو قسمت اور تقدیر کو بدلنے والا ہے کسی ایک شخص یا قبیلے یا ملک کی نہیں بلکہ نوع انسانی کے ان تمام افراد کی جو اس کو قبول کرتے ہیں اور اس پر عمل کرنے کا تہیہ کرلیتے ہیں۔ پھر اس میں کسی زمانہ کی تخصیص بھی نہیں۔ قید زمانی سے ماورا ہے۔ اسی طرح اس کا لایا ہوا کلام بھی ان زمانی حدود سے نا آشنا ہے۔ یا اس سے اس رات کی قدر و منزلت بیان فرمائی جا رہی ہے جس رات کی خاموشیوں میں یہ صحیفۂ رشد و ہدایت نازل ہوا اور اس ذات اقدس و اطہر کو منصب نبوت پر فائز کیا گیا۔ بتادیا ہے کہ اس رات کی خیرات و برکات ہزار ماہ کی عبادت سے برتر ہیں۔ ساری رات فرشتوں کی آمد اور رحمتوں کے نزول کا سلسلہ جاری رہتا ہے اور سلامتی کی بشارتیں دی جاتی رہتی ہیں۔