تعارف سورۃ المنافقون

پہلی آیت کی ابتداء میں المنافقون کا لفظ ہے۔ نیز اس سورہ میں منافقین کے احوال ہی بیان کیے گئے ہیں۔ اس لیے اس کا نام المنافقون رکھا گیا۔ اس میں دو رکوع، گیارہ آیتیں، ایک سو اسی کلمے اور نو سو تہتر حروف ہیں۔

نزول

غزوہ بنی مصطلق سن 6 ھجری میں واقع ہوا۔ یہ سورہ ایک ایسے حادثہ کے بارے میں نازل ہوئی جو اس وقت پیش آیا جب مسلمان بس غزوہ میں فتح یاب ہونے کے بعد مریسیع نامی ایک کنوئیں پر ٹھہرے ہوئے تھے۔ اس لیے اس سورہ کے بارے میں وثوق سے کہا جا سکتا ہے کہ ہجرت کے چھٹے سال جنگ سے واپسی کے سفر میں یا مدینہ طیبہ میں پہنچنے کے فورا بعد اس کا نزول ہوا۔

فتنہ نفاق کا تاریخی جائزہ

اس واقعہ کے اسباب و علل کو پوری طرح سمجھنے کے لیے ہمیں فتنہ نفاق کی تاریخ جاننا اہمیت رکھتا ہے۔ یثرب میں دو قبیلے اوس و خزرج آباد تھے ان میں دیرینہ رنجشیں اور رقابتیں تھیں، جو معمولی بات پر جنگ کے شعلوں میں بدل جاتیں اور جب ایک مرتبہ جنگ کے شعلے بھڑک اٹھتے تو پھر برسوں بجھنے کا نام نہ لیتے۔ مسلسل خانہ جنگی کے باعث دونوں قبیلے کمزور ہو گئے تھے۔ صلح و امن سے زندگی بسر کرنے کی خواہش ان کے دلوں میں چٹکیاں لینے لگی تھی، لیکن ان میں کوئی ایسی شخصیت نہ تھی جو دونوں قبیلوں کے لیے قبیلے متفق ہو۔ آخر کار عبداللہ ابن ابی جو خزرجی تھا۔ وہ ایک ایسے قائد کی حیثیت سے ابھرا جس کی قیادت پر دونوں قبیلے متفق ہو گئے۔ اس کی تاجپوشی کی رسم ادا ہونے والی تھی۔ اس کے لیے تاج سنار پاس بن رہا تھا۔ اسی اثناء میں یثرب کی فضا میں اسلام کے اثرات بڑی قوت سے نمودار ہونے لگے۔ عقبہ اولیٰ میں چند یثربی مشرف باسلام ہوئے۔ واپس آ کر انہوں نے بڑی گرمجوشی سے اسلام کی تبلیغ شروع کی۔

دوسرے سال اسی موقع پر دونوں قبیلوں کے 75 افراد مکہ پہنچے اور حضور صلی اللہ علیہ وآلہ وسلم کے دست حق پرست پر اسلام کی بیعت کی۔ ان میں سے حضرت عباس ابن عبادہ بن نضلہ انصاری بھی تھے۔ ان کی رائے یہ تھی کہ ابھی بیعت نہ کی جائے۔ عبداللہ بن ابی کو بھی اس میں شریک کر لیا جائے تاکہ اتحاد و تعاون کی جو فضا یثرب میں بڑی مدت کے بعد پیدا ہوئی ہے۔ اس میں کوئی بدمزگی رونما نہ ہو لیکن دوسرے ساتھیوں نے ان کی اس تجویز کو کوئی اہمیت نہ دی اور سب نے شرف بیعت حاصل کر لیا۔ جب یہ قافلہ واپس یثرب پہنچا اور عبداللہ بن ابی اور اس کے حواریوں کا علم ہوا تو ان کے غم و غصہ کی کوئی حد نہ رہی۔

حضور سرور دو عالم صلی اللہ علیہ وآلہ وسلم کو چھوڑ کر کسی دوسرے کو اپنا رئیس بنانا ہرگز پسند نہ کریں گے۔ معاہدہ کے مطابق مکہ سے ہجرت کا سلسلہ شروع ہوا۔ حضور علیہ الصلوۃ السلام بھی کچھ عرصہ ہجرت کر کے یثرب تشریف لے گئے۔ حضور صلی اللہ علیہ وآلہ وسلم کے قدم رنجہ فرمانے سے یثرب مدینۃ النبی بن گیا۔ عبداللہ اور اس کے ہمراز ساتھیوں نے جب اپنے آقا صلی اللہ علیہ وآلہ وسلم کے ساتھ مسلمانوں کی والہانہ محبت کو دیکھا تو انہوں نے اپنا بھلا اسی میں سمجھا کہ وہ بھی مسلمانوں میں شامل ہو جائیں۔ ظاہری طور پر انہوں نے کلمہ شہادت بھی پڑھ لیا۔ نمازوں میں بھی حاضر ہوتے، بادل نخواستہ زکوۃ بھی دیا کرتے، لیکن حضور صلی اللہ علیہ وآلہ وسلم اور اسلام کے بارے میں بغض و عناد کے جذبات شدت اختیار کرتے گئے۔ وہ اس گھات میں رہتے کہ مسلمانوں میں کوئی فتنہ کھڑا کر کے ان کی جمعیت کو منتشر و پراگندہ کر دیں اور دوبارہ ایسے حالات پیدا ہو جائیں کہ اوس و خزرج دونوں قبیلے حضور صلی اللہ علیہ وآلہ وسلم سے مایوس ہو کر عبداللہ ابن ابی کو اپنا قائد اور رئیس تسلیم کر لیں، لیکن عبداللہ تھا بڑا عیار، جب بھی اسے موقع ملتا وہ اپنی جھوٹی عقیدت کو بڑے زور دار الفاظ سے ظاہر کرتا تاکہ اس کے دل کا کھوٹ لوگوں پر عیاں نہ ہونے پائے۔ اُس نے یہ معمول بنا رکھا تھا کہ جمعہ کے روز جب مدینہ اور مضافات کے تمام مسلمان اپنے آقا علیہ الصلوۃ والسلام کے پیچھے نماز جمعہ ادا کرنے کے لیے جمع ہوتے تو یہ بھرے مجمع میں اٹھ کر یہ اعلان کرتا۔ بھائیو یہ اللہ کے رسول صلی اللہ علیہ وآلہ وسلم ہیں، جو ہمارے درمیان جلوہ فرما ہیں۔ ان کی ذات سے اللہ تعالیٰ نے ہمیں عزت اور شرف بخشا ہے۔ آپ لوگ دل و جان سے ان کی تائید کریں۔ ان کے ہر ارشاد کو گوش ہوش سے سنا کریں اور جو حکم دیں اس کی تعمیل کیا کریں۔

اس کے باوجود بسا اوقات اس کے دل میں چھپا ہوا بغض آشکارا ہو جاتا۔ ایک دفعہ حضور علیہ الصلوۃ والسلام تشریف لے جا رہے تھے کہ راستہ میں اس سے مڈ بھیڑ ہو گئی۔ اس نے بڑی بدتمیزی کا مظاہرہ کیا۔ حضور علیہ السلام نے سعد ابن عبادہ کو بلا کر شکایت کی۔ انہوں نے عرض کیا یا رسول اللہ صلی اللہ علیہ وآلہ وسلم یہ شخص قابل رحم ہے۔ حضور صلی اللہ علیہ وآلہ وسلم کی آمد سے پہلے اس کے لیے تاج بن رہا تھا اور اس کی تاجپوشی کی تقریب منانے کی تیاریاں ہو رہی تھیں۔ حضور صلی اللہ علیہ وآلہ وسلم کے آنے سے اس کے سارے خواب پریشان ہو گئے اور اس کے پروگرام دھرے کے دھرے رہ گئے۔ یہ تو سمجھتا ہے کہ حضور صلی اللہ علیہ وآلہ وسلم نے اس کا تاج اور تخت چھین لیا ہے، اس لیے اس سے نرمی کا برتاؤ ہی بہتر ہے۔

جنگ بدر کے بعد یہودی قبیلہ بنی قینقاع نے عہد شکنی کی تو حضور نے ان کی گوشمالی کے لیے ان پر چڑھائی کا ارادہ فرمایا۔ یہ منافق اپنے جذبات پر قابو نہ رکھ سکا اور ان کی حمایت کے لیے تیار ہو گیا اور حضور صلی اللہ علیہ وآلہ وسلم کی زرہ کے دامن کو پکڑ کے کھینچ کر کہنے لگا، یہ قبیلہ سات سو جنگجو مردوں پر مشتمل ہے، یہ میرے حلیف ہیں، میرے اشارہ پر سربکف میدان میں آ کر کودتے ہیں، کیا آپ میرے حلیفوں کو ایک دن میں ہی قتل کر دینا چاہتے ہیں۔

جنگ اُحد کا معرکہ مسلمانوں کے لیے انتہائی کرب و اضطراب کا باعث تھا۔ کفار مکہ تین ہزار کا لشکر جرار لے کر مدینہ طیبہ پر دھاوا بولنے کے ارادہ سے بڑھے آ رہے تھے۔ مسلمان مجاہدین کی تعداد صرف ایک ہزار تھی۔ مدینہ کی چھوٹی سی بستی سے اس سے زیادہ جنگجو افراد کا ملنا ممکن نہ تھا۔ ان میں سے تین سو عبداللہ ابن ابی کے حواری تھے۔ حضور علیہ الصلوۃ والسلام ایک ہزار کے لشکر  کو لے کر میدان احد کی طرف روانہ ہوئے تو عبداللہ اپنے تین سو حواریوں سمیت الگ ہوگیا اور مدینہ واپس لوٹ آیا۔ آپ خود اندازہ لگائیے کہ مسلمانوں پر کیا گزری ہوگی۔ پہلے ہی مسلمانوں کی تعداد دشمن کے مقابلہ میں بہت کم تھی عین لڑائی کے وقت تین سو ساتھیوں کا الگ ہو جانا مسلمانوں کے صبر و شکیب کی بڑی سخت آزمائش تھی لیکن اس ظالم کو ایسی بے وفائی سے ذرا شرم نہ آئی۔

اس کا نفاق جس کو وہ اب تک بڑی ہوشیاری اور عیاری سے چپھائے ہوئے تھا، مسلمانوں پر ظاہر ہو گیا۔ جنگ احد کے بعد نماز جمعہ کے لیے لوگ مسجد میں جمع ہوئے تو حسب معمول اس نے وہی جملے دہرانے چاہے جو ہر جمعہ کو دہرایا کرتا تھا تو ایک مسلمان  نے اسے جھڑک کر کہا: کم بخت بیٹھ جاؤ تمہیں ایسی باتیں اب زیب نہیں دیتیں۔ اس نے اس چیز کو توہین خیال کیا اور بڑ بڑاتا ہوا لوگوں کے سروں سے پھلانگتا ہوا مسجد سے نکل گیا۔ مسجد کے دروازہ پر بعض انصار نے اسے ایسا کرنے سے منع کیا اور اسے نصیحت کی کہ ابھی حضور صلی اللہ علیہ وآلہ وسلم کی خدمت میں حاضر ہو کر اپنی اس غلطی کی معافی مانگ لو، وہ بگڑ کر بولا، میں ان سے معافی مانگنے کے لیے ہرگز تیار نہیں ہوں۔  (ابن ہشام)

غزوہ بنی نضیر کے موقع پر بھی اس کا نفاق کھل کر سامنے آگیا۔ بنی نضیر کی عہد شکنی اور غداری کی سزا دینے کے لیے جب حضور صلی اللہ علیہ وآلہ وسلم نے ان کے خلاف اعلان جنگ کر دیا۔ تو اس خبیث نے انہیں کہلا بھیجا کہ گھبراؤ مت میں اور میرے ساتھ تمہارے ساتھ شانہ بشانہ میدان جنگ میں مسلمانوں کا مقابلہ کریں گے اور مسلمانوں کو گھٹی کا دودھ یاد آ جائے گا۔ اور اگر ہمیں شکست ہوئی اور تمہیں یہاں سے جلا وطن ہونا پڑا تو تنہا تم ہی مدینہ کو نہیں چھوڑو گے ہم بھی تمہارے ساتھ مدینہ سے چلیں گے۔ ان کی اس سازش سے یہود کے حوصلے کتنے بلند ہو گئے ہوں گے اور مسلمانوں کو کتنی مشکل کا سامنا کرنا پڑا ہوگا۔ اس کا اندازہ بہ آسانی لگایا جا سکتا ہے۔ اللہ تعالیٰ نے اپنے حبیب صلی اللہ علیہ وآلہ وسلم کو ان کی اس سازش سے مطلع فرما دیا۔ اس طرح ان کی منافقت کا بھانڈا چوراہے میں پھوڑ ڈالا۔

اگرچہ حضور صلی اللہ علیہ وآلہ وسلم اور سارے مسلمانوں پر ان لوگوں کی منافقت ظاہر ہو چکی تھی لیکن مصلحت کا تقاضا یہ تھا کہ ان کو کلیتاً اسلام سے خارج کرنے کا اعلان نہ کیا جائے۔ بیرونی دشمنوں سے جنگوں کا سلسلہ جاری تھا۔ اس لیے مدینہ کے اندر ایک دوسرے محاذ پر جنگ کا آغاز کرنا مناسب نہ تھا۔ نیز عبداللہ کے حواریوں میں اوس اور خزرج دونوں قبیلوں کے ذی اثر لوگ کافی تعداد میں تھے۔ ان حالات میں ان سے لڑائی بڑے خلفشار کا باعث بن سکتی تھی۔ دوسری طرف عبداللہ اور اس کے ساتھی بھی اس پوزیشن میں نہ تھے کہ وہ مسلمانوں کیساتھ اعلانیہ جنگ کر سکیں۔ انہوں نے بھی یہی مناسب سمجھا کہ مسلمانوں کے ساتھ مل جل کر رہیں۔ اس طرح وہ مسلمانوں سے ہر طرح کا مفاد بھی حاصل کر سکتے تھے اور انہیں مناسب موقع پر مؤثر طریقہ سے گزند بھی پہنچا سکتے تھے۔

یہی حالات تھے جب غزوہ بنی مصطلق کی نوبت پیش آئی اور دوسرے اہل ایمان کیساتھ عبداللہ اور اس کی پارٹی کے لوگوں کو بھی شرکت کا موقع مل گیا۔ اس سفر کے دوران رئیس المنافقین عبداللہ ابن نے مسلمانوں پر دو ایسے مہلک وار کیے کہ اللہ تعالیٰ کا خاص لطف و کرم مسلمانوں کی دستگیری نہ فرماتا تو مسلمان مہلک واروں سے جانبر نہ ہو سکتے۔ بنو مصطلق کا قبیلہ کا قدیہ کی سمت میں ساحل سمندر کے قریب آباد تھا۔ حضور صلی اللہ علیہ وآلہ وسلم کو اطلاع ملی کہ اس کا سردار حارث بن ضرار اپنے قبیلہ کے جنگ جو سرداروں کو مسلمانوں پر حملہ کرنے کے لیے اکٹھا کر رہا ہے۔ حضور علیہ السلام نے زید ابن حارثہ اور بقول ابن ہشام اور ابوذرغفاری کو مدینہ طیبہ میں اپنا نائب مقرر فرمایا اور خود بنی مصطلق کی سرکوبی کے لیے روانہ ہوئے۔ مریسیع کے کنوئیں کے قریب دونوں لشکروں سے سخت لڑائی ہوئی۔ اللہ تعالیٰ کی نصرت سے مسلمانوں کو فتح ہوئی اور بنو مصطلق شکست کھا کر وہاں سے بھاگے، بہت سا مال غنیمت مسلمانوں کے ہاتھ آیا۔

فتح کے بعد  حضور صلی اللہ علیہ وآلہ وسلم نے چند روز اسی جگہ پر قیام فرمایا تاکہ مسلمان مجاہد جنگ کی تھکاوٹ کو دور کرلیں۔ اور واپسی کے سفر سے پہلے تازہ دم ہو جائیں۔ اسی اثناء میں ایک خطرناک واقعہ رونما ہوا۔ حضرت عمر رضی اللہ عنہ جہجاہ ابن مسعود غفاری کو بطور خدمت گار اپنے ہمراہ لے گئے تھے تاکہ آپ کے گھوڑے کی دیکھ بھال کرے۔ جہجاہ کنوئیں پر پانی پینے کے لیے گئے تو ان کا ایک شخص سنان بن ویرہ الجہنی سے پانی بھرنے پر جھگڑا ہو گیا۔ بات بڑھ گئی اور ہاتھا پائی تک نوبت جا پہنچی۔ جہجاہ کی ایک ضرب سے سنان کو زخم آ گیا اور خون بہنے لگا۔ اس نے زمانہ جاہلیت کے دستور کے مطابق زور سے پکارا: ’’یا معشر الانصار‘‘ اے انصار میری مدد کو پہنچو، کا نعرہ بلند کیا۔ دونوں طرف سے لوگ ہتھیار لیے ہوئے اپنے اپنے ساتھی کی مدد کو پہنچ گئے۔ قریب تھا کہ مسلمانوں کے دو گروہوں میں جنگ چھڑ جاتی اور بنی مصطلق پر انہیں جو فتح حاصل ہوئی تھی وہ شکست میں بدل جاتی۔ حضور صلی اللہ علیہ وآلہ وسلم اپنے خیمہ سے جلدی جلدی تشریف لے آئے اور دونوں فریقوں کو مخاطب کر کے فرمایا:

’’ما بال دعوی الجاهلیة؟ مالکم ولدعوة الجاهلیة وعوها فانھا منتنة‘‘

یہ تم نے جاہلیت کے نعرے لگانے کیسے شروع کر دیئے ہیں؟ اسلام قبول کرنے کے بعد جاہلیت کی پکار بڑی بری بات ہے۔ یہ بڑی گندی چیز ہے۔

حضور صلی اللہ علیہ وآلہ وسلم کی مداخلت سے فتنہ و فساد کے بھڑکتے ہوئے شعلے سرد ہوگئے۔ سنان نے جہجاہ کو معاف کر دیا اور معاملہ رفع دفع ہو گیا۔ منافقین تو اس واقعہ سے بہت خوش تھے۔ یکا یک یہ آگ بجھ گئی، تو ان کے دلوں میں حسد کی جو چنگاریاں سلگ رہی تھیں وہ بھڑک اٹھیں۔ ایک ایک کر کے عبداللہ کے پاس پہنچے اور اس پر برس پڑے کہ تو نے اس موقع پر ہماری کوئی امداد نہیں کی۔ اگر تو ذرا ابھی گرمجوشی کا مظاہرہ کرتا تو آج ہم ان بھک منگوں کا کچومر نکال دیتے۔ معلوم ہوتا ہے کہ تم بھی ان کے طرفدار بن گئے ہو، اور ہماری وہ توقعات جو ہم نے تم سے وابستہ کر رکھی تھیں ان پر تم نے پانی پھیر دیا ہے۔ وہ نابکار پہلے ہی غصہ بھرا بیٹھا تھا‘ ان کا یہ طعنہ سن کر وہ پھٹ پڑا اور کہنے لگا یہ سب تمہارے اعمال کا پھل ہے۔ اب اسے چکھو، تم نے ان مہاجروں کو آنکھوں پر بٹھایا۔ ان کے لیے اپنے گھروں کے دروازے کھول دیے۔ ان کے قدموں میں دولت کے ڈھیر لگا دیے۔ اب وہ اپنے پاؤں پر کھڑے ہو گئے ہیں تو ہمیں گھورنے لگے ہیں، تمہاری مثال بالکل ایسی ہی ہے جیسے کسی نے کہا ہے ’’سمن کلبک ییاکلک‘‘ ’اپنے کتے کو پال کر موٹا کرو تاکہ وہ تمہیں ہی کاٹنے لگے‘۔ اگر تم ان کو اپنا بچا کھچا کھانا دینا بند کردو تو ود دن میں ان کے دماغ درست ہو جائیں اور بھوک سے تنگ آ کر (حضور کا اسم گرامی لے کر کہنے لگا) اس کو چھوڑ کر بھاگ جائیں گے۔ مجھے مدینہ واپس جانے دو پھر تم تماشا دیکھنا۔

انا والله لان رجعنا الی المدینة لیخرجن الاعزمنها الاذل.

اگر ہم مدینہ واپس پہنچ گئے تو بخدا عزت والا وہاں سے ذلیل کو نکال دے گا۔

الاعز سے اس نے اپنے آپ کو مراد لیا اور دوسرے لفظ (اذل) سے حضور کی طرف اشارہ کیا۔ حضرت زید ابن ارقم بھی اس مجلس میں موجود تھے۔ یا رائے ضبط نہ رہا، تڑاخ سے بولے:

انت والله الذلیل القلیل البغض فی قومک و محمد صلی الله علیه وسلم فی عزمن الرحمن و مودۃ من المسلمین.

بخدا تو ذلیل ہے تو قلیل ہے تو اپنی قوم میں مبغوض ہے اور ہمارے آقا محمد صلی اللہ علیہ وآلہ وسلم کو خداوند رحمٰن نے عزتیں بخشی ہیں، اور اہل ایمان سے والہانہ محبت کرتے ہیں۔

ابن ابی بولا خاموش ہو جاؤ! میں تو یوں ہی مذاق کر رہا تھا۔ حضرت زید غصہ سے کانپتے ہوئے بارگاہ رسالت میں پہنچے اور سارا واقعہ کہہ سنایا۔ حضور کو یہ سن کر بڑی کوفت ہوئی۔ رخ انور کارنگ بدل گیا۔ بات ٹالنے کے لیے حضور صلی اللہ علیہ وآلہ وسلم نے فرمایا اے نوجوان! شاید تم اس کے بارے میں غلط بیانی سے کام لے رہے ہو۔ شاید تمہیں شبہ ہوا ہو۔ شاید تیرے کانوں نے سننے میں غلطی کی ہو۔ ہر بار زید نے عرض کیا: واللہ یارسول اللہ (خدا کی قسم اے اللہ کے رسول میں صحیح عرض کر رہا ہوں) سارے لشکر میں یہ بات پھیل گئی۔ انصار کے ایک گروہ نے بھی زید کو ملامت کرنا شروع کی کہ ناسمجھ بچے نے خواہ مخواہ ہمارے سردار پر الزام لگایا اور اسے بدنام کیا ہے۔ حضرت زید نے کہا بخدا جو میں نے اپنے کانوں سے سنا ہے وہی بتایا ہے۔

حضرت عمر کو علم ہوا تو خدمت اقدس میں حاضر ہوئے۔ عرض کیا میرے آقا مجھے اجازت دیجئے کہ میں اس منافق کی گردن اڑا دوں۔ اگر میرا اس کو قتل کرنا مصلحت کے خلاف ہے تو خود انصار میں سے معاذ بن جبل یا عبادہ ابن بشر یا سعد ابن معاذ محمد ابن مسلمہ کو حکم فرمائیے کہ وہ اس کا سر قلم کر دیں۔ اللہ تعالیٰ کے محبوب نے فرمایا ایسا نہ کرو۔ لوگ کہیں گے کہ محمد اپنے ساتھیوں کو قتل کر رہا ہے۔ اس کے بعد حضور نے فوراً کوچ کرنے کا حکم دیا اور تیس گھنٹے تک لگاتار سفر جاری رہا۔ نہ رات کو آرام نہ دن کو قیلولہ۔ لوگ تھک کر چور ہو گئے۔ جب حضور صلی اللہ علیہ وآلہ وسلم نے ایک جگہ قیام فرمایا تو لوگ سواریوں سے اترتے ہی زمین پر لیٹ اور گہری نیند سو گئے۔ مقصد یہ تھا کہ مریسیع کے کنوئیں پر جو سانحہ ہوا تھا لوگوں کی توجہ اس طرف سے ہٹ جائے۔ راستے میں حضرت اسیدین حضیر نے عرض کیا یارسول اللہ اس بے وقت سفر کا سب کیا ہے۔ پہلے تو حضور کا یہ معمول نہ تھا۔ ارشاد فرمایا: تمہیں علم نہیں کہ عبداللہ ابن ابی نے کیا گل کھلایا ہے۔ انہوں نے اپنی لاعلمی کا اظہار کیا تو حضور نے اس منافق کی زبان سے نکلا ہوا جملہ دہرایا۔ وہ بصد ادب عرض پرداز ہوئے یارسول اللہ خدا کی قسم عزت والے تو آپ ہیں اور وہ ذلیل ہے۔ آپ جب چاہیں نکال سکتے ہیں۔ رفتہ رفتہ اس بات کا چرچا سارے لشکر میں ہو گیا۔ تمام انصار کو بھی اس کی گستاخی کا علم ہو گیا۔ ان کے غصہ کی حد نہ رہی۔ بعض لوگوں نے ازراہ خیر خواہی عبداللہ کو کہا جاؤ حضور کی خدمت میں حاضر ہو کر معافی مانگ لو۔ حضور کریم ہیں تیری خطا بخش دیں گے۔ وہ بے حیا جھٹ سے بولا: تم نے کہا ان پر ایمان لے آؤ، میں ایمان لے آیا۔ تم نے کہا کہ اپنے مال کی زکوۃ دو، میں نے تمہاری یہ بات بھی مان لی اور زکوۃ دیتا رہا۔ اب بس یہ کسر رہ گئی ہے کہ میں محمد کو سجدہ کروں۔ اس کا یہ گستاخانہ جواب سن کر سارے مجاہدین غصہ سے بے تاب ہو گئے۔ اور سب کے دلوں میں اس کے خلاف نفرت و حقارت کے جذبات بھڑک اٹھے۔ ایک عجیب بات یہ ہوئی کہ جب لشکر مدینہ طیبہ میں داخل ہونے لگا تو عبداللہ ابن ابی کا لڑکا (ان کا نام بھی عبداللہ تھا) تلوار کو بے نیام کر کے اپنے بات کا راستہ روک کر کھڑا ہو گیا اور بولا: اے باپ تم نے کہا ہے کہ مدینہ پہنچ کر عزت والا ذلت والے کو نکال دے گا۔ اب تمہیں معلوم ہو جائے گا کہ عزت والا کون ہے اور ذلیل کون ہے۔ خدا کی قسم تم اسوقت تک مدینہ میں داخل نہیں ہو سکتے جب تک حضور صلی اللہ علیہ وآلہ وسلم تمہیں اجازت نہ دیں۔

اپنے بیٹے کے منہ سے یہ الفاظ سن کر عبداللہ چلا اٹھا اے خزرج کے لوگو! ذرا دیکھو میرا بیٹا مجھے مدینہ میں داخل ہونے سے روک رہا ہے۔ یہ خبر جب نبی کریم کو ملی تو حضور نے فرمایا: عبداللہ سے کہو کہ اپنے باپ کو گھر آنے سے نہ روکے۔ عبداللہ نے کہا اگر میرے آقا کا یہ حکم ہے تو اب میں اپنے باپ کو مدینہ داخل ہونے کی اجازت دیتا ہوں۔

اسوقت حضور نے حضرت عمر کوفرمایا: اے عمر! اگر تم اس وقت اس کو قتل کر دیتے تو انصار کے کئی لوگ ناراض ہوتے آج اگر میں چاہوں تو اسے قتل کیا جا سکتا ہے اور اس پر کوئی معترض بھی نہیں ہوگا۔ حضرت عمر نے عرض کیا۔ خدا کی قسم اب مجھے معلوم ہو گیا کہ اللہ کے رسول کی بات میری بات سے بہت زیادہ مبنی برحکمت تھی۔

یہ حالات تھے جن میں اس سورہ پاک کا نزول ہوا۔ ان حالات کو پیش نظر رکھ کر آپ سورہ کا مطالعہ کریں گے تو اس کے مندرجات سمجھنے میں آپ کو بہت مدد ملے گی۔