تعارف سورۃ کہف

اس سورہ میں اصحاب کہف کا ذکر ہے‘ اس مناسبت سے اس کا نام الکہف رکھا گیا۔

نزول

یہ سورہ باتفاق علماء مکہ مکرمہ میں نازل ہوئی۔ بعض علماء کی رائے یہ ہے کہ اس کا نزول رسول اللہ (صلی اللہ علیہ وآلہ وسلم) کی بعثت کے آٹھویں اور دسویں سال کی درمیانی مدت میں ہوا۔ اس کی آیتوں کی تعدادایک سو دس ہے‘ یہ ایک ہزار پانچ سو ستر کلمات اور چھ ہزار تین سو ساٹھ حروف پر مشتمل ہے۔

مضامین

اس سورہ کا آغاز حمد باری تعالیٰ سے کیا گیا۔ ساتھ ہی اس کی وجہ بھی بیان فرما دی کہ اللہ تعالیٰ وہ کریم اور رحیم ہے جس نے دنیائے انسانیت کو رشد و ہدایت کا ایسا صحیفہ عنایت فرمایا جو خود بھی ہر قسم کی کجی اور خامی سے پاک ہے۔ اور اس کے ساتھ انسانی زندگی کے کسی شعبہ میں سیاسی اور درستی کی پوری صلاحیت رکھتا ہے۔ مزید کرم یہ فرمایا کہ ایسی کتاب لانے کے لیے کوئی عام انسان مقرر نہیں کیا جس کی صورت و سیرت میں کوئی کشش نہ ہو، جس کا قول و فعل میں کوئی جاذبیت نہ ہو۔ جو خاموشی سے آئے، کتاب پہنچائے اور چپکے سے چلا جائے۔ بلکہ ایک ایسے بندے کو دعوت حق کا پیغامبر بنا کر بھیجا جو اس کا محبوب طلوع ہوئی۔ لات و ہبل کی جھوٹی خدائی کا تختہ الٹ دیا گیا۔ خفتہ بخت انسان خواب غفلت سے جاگ اٹھا۔ سچ تو یہ ہے کہ اگر ایسے رحیم و کریم خدا کی حمد و ثنا نہ کی جائے تو اور کون ہے جو اس کا مستحق ہو؟

ایک خدا فراموش اور دنیا پرست انسان کا جو نفسیاتی تجزیہ اس سورہ میں کیا گیا ہے اسے پڑھ کر یہ یقین ہو جاتا ہے، کہ قرآن کسی انسان کا کلام نہیں بلکہ خالق انسان کا کلام ہے جو اس کے نظریات اور قلبی مضمرات سے پوری طرح آگاہ ہے۔ آیات نمبر 32 تا 44 میں ایک دنیا پرست کی کم ظرفی، خودبینی اور خود فریبی کا تذکرہ کیا گیا۔ وہ ایک خدا پرست انسان سے جو دولت میں اس سے کم ہے۔ اثناء گفتگو یہ کہنے میں کوئی شرم محسوس نہیں کرتا کہ اس کے پاس دولت بھی زیادہ ہے اور اس کے خادموں اور نوکروں کی تعداد بھی اس سے زیادہ ہے حالانکہ کسی غریب آدمی کے سامنے اپنی ثروت کی فراوانی بیان کرنا اور اس کو احساس غربت دلانا کم ظرفی اور خودبینی کی انتہا ہے۔ مزید برآں وہ قیامت کا منکر ہے اور اس غلط فہمی میں مبتلا ہے کہ اگر قیامت آبھی گئی تو اس روز بھی اسی کو عزت و کرامت کی مسند پر بٹھایا جائے گا۔ اور اہل ایمان جو اس دنیا میں کسمپرسی کی حالت میں زندگی بسر کرتے رہے۔ اس روز بھی وہی ذلیل و خوار ہونگے۔ یہ اس کی خود فریبی کی انتہا ہے۔ آیات 103 اور 104 میں یہ بتایا کہ ایسے شخص کی ساری جدوجہد اور دوڑ دھوپ فقط دنیوی زندگی کو باعزت اور آرام دہ بنانے کے لیے وقف ہو جاتی ہے اسے کبھی اپنی عاقبت سنوارنے کا نہ خیال آتا ہے نہ فرصت ملتی ہے۔ آیت نمبر 55 میں یہ بتایا گیا کہ اگر ایسے لوگوں کو اپنی گمراہیوں سے باز آنے اور بدکاریوں سے تائب ہونے کی دعوت دی جائے تو وہ اس سے بروقت فائدہ اٹھانے کی کوشش نہیں کرتے اور بدقسمتی سے انہوں نے اس دعوت کی صداقت کو تسلیم کر بھی لیا تو تمہیں اس سے کیا فائدہ پہنچے گا۔ ہر دنیا پرست کی ہر زمانہ میں پہلے بھی اور آج بھی یہی ذہنیت رہی ہے اور سوچ بچار کا یہی اندازہ رہا ہے۔ اس لیے ایک کو ایک ہی انجام سے دوچار ہونا پڑا۔ خوش نصیب ہیں وہ لوگ جو برقت متنبہ ہوکر اپنی اصلاح کر لیتے ہیں۔

اللہ تعالیٰ نے دوسرے مقامات کی طرح یہاں بھی اس حقیقت کو بےنقاب کیا ہے کہ یہ مال و دولت یہ جاہ و حشمت، یہ فرزند وزن اس دنیا کی زینت ہیں۔ جس طرح یہ دنیا فانی ہے۔ اس کی زینت کے سارے سامان بھی فانی ہیں۔ یہ اس قابل نہیں کہ کوئی مومن اس کی محبت میں اتنا دل بستہ اور اس کی چاہت میں ایسے ہوش باختہ ہو جائے کہ اپنے خدا کو اور اپنے انجام کو بھی فراموش کر دے۔ دل لگانے کے قابل تو صرف اللہ تعالیٰ کی ذات ہے۔ طلب تو صرف اس کی رضا کی ہونی چاہئے۔ اور زندگی کی اس محدود فرصت میں ایسے نیک۔ مفید اور نتیجہ خیز کام کرنے چاہئیں۔ جو کبھی فنا آشنانہ ہوں۔ والباقیات الصالحات خیرہ عند ربک ثوابا وخیرا املا۔ (آیت نمبر 46) کے دلنشین الفاظ سے اسی حقیقت کی طرف توجہ دلائی گئی۔

حکمت و دانش کے ان انمول جگمگاتے ہوئے موتیوں کے علاوہ جن سے اس سورہ کا دامن مرصع ہے تین واقعات کا بیان شرح و بسط سے کیا گیا ہے اصحاب کہف، حضرت موسیٰ کا سفر اور ذوالقرنین۔ اصحاب کہف کا ذکر کرکے ان مظلوم اور ستم رسید مسلمانوں کی حوصلہ افزائی فرمائی کہ تم سے پہلے بھی حق قبول کرنے والوں کو طرح طرح کی اذیتوں کا نشانہ بنایا گیا۔ انہوں نے محض اپنا ایمان بچانے کے لئے اپنے وطن کو چھوڑا اور ایک غار میں پناہ لی۔ اور تم تو غلامان حبیب کبریا علیہ الصلوٰۃ والثناء ہو تمہیں کفار کی ان ذیت رسانیوں کے باعث حوصلہ نہیں ہارنا چاہیے بلکہ بڑی ثابت قدمی کا مظاہرہ کرنا چاہیے۔ تم دیکھو گے کہ اللہ تعالیٰ کس طرح تمہیں اوج کمال تک پہنچاتا ہے اور کس طرح تمہیں ابدی عزتوں سے سرفراز کرتا ہے اسی ضمن میں کفار کو یہ بھی بتا دیا کہ جو ذات اصحاب کہف کو سینکڑوں سال کے بعد ازسر نو زندگی عطا فرما سکتی ہے وہ تمہیں بھی روز حشر زندہ کرکے اٹھا سکتی ہے۔

حضرت موسیٰ علیہ السلام کے سفر سے علم و حکمت کے حصول کی اہمیت کا درس دی۔ اس کے ضمن میں چند واقعات بیان کرکے ایک پیچیدہ عقدہ کو بھی فرما دیا۔ اس دنیا میں اکثر ایسے واقعات روپذیر ہوتے رہتے ہیں جن کی ہم کوئی توجیہ نہیں کر سکتے یا ہم انہیں عدل وحکمت کے تقاضوں کے سراسر منافی سمجھتے ہیں۔ حقیقت میں یہ ہماری اپنی کم فہمی ہوتی ہے۔ اگر ان سے پردہ ہٹایا جائے تو ان کا عین عدل و حکمت ہونا اظہر من الشمس ہو جائے۔ جس طرح ان تین واقعات سے جب حضرت خضر علیہ السلام نے پدرہ اٹھایا تو حضرت کلیم اللہ کی برہمی اور ناراضگی خود بخود دور ہوگئی۔ اور انہیں اپنے اعتراضات واپس لینے کے بغیر کوئی چارہ کارنہ رہا۔

ذوالقرنین کا واقعہ بیان کرکے ایک مومن حکمران کی خوبیوں کو ظاہر فرمایا کہ وہ باوجود قوت و اقتدار کے اپنی رعایا کے لیے مہربان، عادل اور شفیق ہوتا ہے۔

آخری دو آیتوں میں اللہ تعالیٰ کی توحید اور اس کی عظمت اور جلال کی طرف توجہ دلائی گئی ہے۔ ارشاد ہے ’اگر سمندر سیاہی بن جائیں اور اس سے اللہ تعالیٰ کی توحید اور اس کی آیات عظمت و جلال کو قلم بند کیا جائے تو سمندر خشک ہو جائیں۔ لیکن اس کی صفات کا بیان پھر بھی تشنہ تکمیل رہے۔

حضور نبی اکرم کی زبان سے یہ اعلان کرایا کہ میں بشر ہوں‘ خدا نہیں۔ خدا وہی ہے جو وحدہ لاشریک ہے، جس کا میں بھی بندہ ہوں اور ساری کائنات بھی اس کی مخلوق اور سے کے سامنے سرافگندہ ہے۔ اس آیت سے اس صداقت کو ثابت کیا کہ جب یہ مرقع حسن و کمال بایں ہمہ زیبائی و دلربائی خدا نہیں تو اور کون ہے جو خدائی کا دعویٰ کر سکے۔ جب زبان مصطفی یہ اعلان کر رہی ہو ’لا الہ الا اللہ‘ تو کائنات کی ہر چیز کو طوعاً و کرہاً کہنا پڑے گا ’اشھد ان لا الہ الا اللہ‘ بعض کم نظر لوگ اس آیت کریمہ سے شان حبیب کبریا کی تنقیص کرتے ہیں۔ لیکن حقیقت میں یہ اللہ تعالیٰ کی وحدانیت کی سب سے بڑی دلیل ہے۔ اور دل بینا کو وہ عظمتیں جو نام پاک محمد (تعریف کیا ہوا) (صلی اللہ علیہ وآلہ وسلم) میں پنہاں ہیں پوری آب و تاب سے دکھائی دے رہی ہے۔

دل بینا بھی کر خدا سے طلب
آنکھ کا نور دل کا نور نہیں