تعارف سورۃ الانعام

اس سورہ پاک کا نام الانعام ہے۔ اس کی آیتوں کی تعداد ایک سو پینسنٹھ اور رکوع بیس ہیں۔ اس سورہ میں اَنعام (موشیوں) کی حلت و حرمت کے متعلق کفار کے خیالاتِ فاسدہ کی تردید کی گئی ہے اس لیے اس کا نام الاَنعام رکھا گیا۔ اس کے کلمات کی تعداد تین ہزار ایک سو اور حروف بارہ ہزار نو سو پینتیس ہیں۔

زمانہ نزول

حضرت ابنِ عباس رضی اللہ عنہما اور دیگر صحابہ سے بسندِ صحیح ثابت ہے کہ یہ سورہ باستثناء چند آیات بیک وقت مکہ مکرمہ میں نازل ہوئی۔ اس کے سالِ نزول کا تعین مشکل ہے لیکن مختلف قرائن اور شواہد کے پیشِ نظر بعض محققین کا یہ خیال ہے کہ حضور صلی اللہ علیہ وآلہ وسلم کی مکی زندگی کے آخری حصہ میں ہجرت سے کچھ عرصہ پہلے یہ سورت نازل ہوئی۔

مدینہ طیبہ میں اسلام کو یہودیت اور عیسائیت سے واسطہ پڑا تھا۔ اس لیے مدنی سورتوں میں ان کے عقائد کی تردید، ان کے اطوار کا محاسبہ اور ان کی اصلاح پر زیادہ توجہ دی گئی لیکن مکہ کا ماحول بالکل انوکھا تھا‘ یہاں کے لوگ نظریاتی اور اعتقادی لحاظ سے یکسر جدا تھے‘ یہاں کی زندگی مشکلات اور مسائل نرالی قسم کے تھے۔ ان حالات میں اللہ تعالیٰ کی طرف سے اپنے نبی پر جو وحی نازل ہوئی اس میں انہیں مشکلات کا حل اور انہیں مسائل کا جواب پیش کیا گیا ہے۔

مکہ کی تقریباً تمام تر آبادی مشرک اور بت پرست تھی۔ ان پتھروں کے بتوں اور مٹی کی مورتیوں کے متعلق ان کا عقیدہ یہ تھا کہ وہ بھی الٰہ (خدا) ہیں۔ اس بےسر و پا بات کے اظہار میں انہیں ذرا تامل نہ تھا بلکہ جب حضور علیہ الصلاۃ والسلام نے انہیں بتایا کہ یہ بےجان اور بےزبان مجسّمے خدا نہیں ہیں‘ خدا تو وہ ذات والا صفات ہے جو زمین و آسمان کا خالق ہے، ہر چیز پر قادر ہے اور اس کے علم سے کائنات کا کوئی ذرّہ بھی مخفی نہیں، تاریک غار میں اندھیری رات میں ننھی سی چیونٹی کے رینگنے کی آواز کو بھی سنتا ہے۔ تو یہ سن کر وہ حیران و ششدر ہوگئے اور مارے حیرت کے کہہ اٹھے: یہ تو بڑی عجیب و غریب بات ہے۔ جب وہ ان کو خدا مانتے تھے تو ان کی عبادت بھی کیا کرتے تھے۔ خدا سمجھتے ہوئے اپنی مشکلات اور تکالیف میں انہی کی طرف رجوع بھی کیا کرتے تھے۔ اپنی ضروریات اور حاجات کے لیے انہی کے سامنے دستِ سوال بھی دراز کیا کرتے۔ وہی ان کے مینہ برسانے والے، وہی ان کو صحت دینے والے، وہی ان کو دشمنوں پر غالب کرنے والے تھے۔ اس سورہ پاک میں ان کے مشرکانہ عقیدہ کی تردید کی گئی ہے۔ انہیں بتایا گیا کہ پتھر کے یہ بت شکل و صورت میں کسی سنگ تراش کے مرہونِ منت ہیں وہ خدا کیسے ہو سکتے ہیں؟ خدا تو وہ ذات ہے جس نے ’کُن‘ فرمایا تو عالمِ رنگ و بو اپنی تمام دلآویزیوں اور عظمتوں کے ساتھ موجود ہوگیا۔ جس کا علم اتنا ہمہ گیر ہے کہ ظاہر و باطن سب اس پر عیاں ہے، جس کے اختیارات غیرمحدود ہیں۔ وہ جو چاہے، جتنا چاہے، جسے چاہے عطاء فرما دے کوئی اعتراض نہیں کرسکتا اور جو چاہے جس وقت چاہے جس سے چاہے چھین لے‘ کوئی دم نہیں مارسکتا۔ ساری کائنات نوری و ناری، آبی و خاکی سب کی سب بلا استثناء اپنے وجود، اپنی بقاء، اپنی نشوونما، اپنے تمام شؤونِ حیات میں ہر لحظہ، ہر لمحہ اس کی نظرِ رحمت کی محتاج ہے اور اسے کسی کی حاجت نہیں۔ اس طرح اس سورہ میں اللہ تعالیٰ کی صفتِ کمال کا ذکر کر کے ان کے مشرکانہ عقیدہ کی بےسروپائی کو طشت ازبام کر دیا اور اس کی بنیادوں کو اس طرح لرزادیا کہ اگر بےجا ضد، بانئ اسلام سے بلاوجہ حسد اور عناد کے جذبات اس عمارت کو کچھ وقت تک سہارا نہ دیتے رہتے تو وہ اسی وقت پیوندِ خاک ہو جاتی۔

مضامین

1۔ دلائلِ توحید: قرآن اپنے پڑھنے اور سننے والے کو فلسفہ کی بھول بھلیوں میں حواس باختہ اور اس کی ثقیل اور غیرمانوس اصطلاحوں سے مرعوب نہیں کرتا بلکہ کائنات کی اس کھلی کتاب میں غور و فکر کی دعوت دیتا ہے۔ یہ سورج، یہ چاند کس کی کبریائی کے شاہکار ہیں؟ زمین کی سطح پر لہلہاتے ہوئے شاداب کھیت، رنگا رنگ پھول، قسم قسم کے پھل کس کی قدرت کی شہادت دے رہے ہیں؟ یہ گھنگھور گھٹائیں اور ان سے ٹپکنے والے حیات بخش قطرے کس کی رحمت کا مظہر ہیں؟ صرف اللہ وحدہ لاشریک کے۔ کون انکار کرسکتا ہے ان حقائق کا؟ یہی وہ نورِ تاباں تھا جس کی تجلیوں کے سامنے کفر و شرک کی ظلمتوں کو کہیں پناہ نہ ملی۔

2۔ مشرکین کا رویہ: اسلام، قرآن اور صاحبِ قرآن صلی اللہ علیہ وآلہ وسلم سے مشرکین کی مخالفت کسی سنجیدگی اور تمانت پر مبنی نہ تھی اور نہ قرآنی دلائل کے جواب میں ان کے پاس کوئی ایسی قوی دلیل تھی جس سے وہ اپنے باطل عقائد کی حفاظت کر سکتے۔ ان کا سارا سرمایہ مذاق، تمسخر اور طرح طرح کی حجت بازیاں تھیں؛ فرشتہ جو وحی لاتا ہے وہ ہمیں نظر کیوں نہیں آتا؟ قرآن ایک مرتب کتاب کی صورت میں نازل کیوں نہیں ہوا؟ اس یتیم اور بےیار و مددگار کو رسالت و نبوت کے لیے کیوں منتخب کیا گیا؟ لو سنو! موت کے بعد نئی زندگی کا پرچار ہو رہا ہے بھلا یہ بھی کوئی ماننے کی بات ہے؟ بس اس قسم کے ان اعتراضات تھے جنہیں وہ بڑی شد و مد سے پیش کیا کرتے۔ اس سورہ میں ان کا رد کیا گیا ہے۔

3۔ تسلی و اطمنان: اس طرف انتہائی خلوص، للہیت اور خیراندیشی کے جذبات کے ساتھ نورِ حق کی طرف راہنمائی کی جا رہی ہے۔ دوسری طرف سے ضد اور ہٹ دھرمی کا مظاہرہ ہو رہا ہے۔ اس سے ہادئ برحق کا دلِ رحیم بہت رنجیدہ ہوتا۔ اللہ تعالیٰ نے اپنے محبوب صلی اللہ علیہ وآلہ وسلم کو بار بار تسلی دیتے کہ آپ رنجیدہ نہ ہوں۔ آپ سے پہلے بھی انبیاء آئے؛ انہیں بھی ستایا گیا، اذیتیں پہنچائی گئیں لیکن انہوں نے صبر کیا، یہی سنتِ الٰہی ہے۔ آپ کو بھی صبر سے اس سرد مہری اور دل آزاری کا سامنا کرنا ہوگا۔ حق و باطل کی آویزش، نور و ظلمت کی کشمکش کا سلسلہ جاری رہے گا۔ اللہ تعالیٰ کی قدرت سے بعید نہیں کہ وہ چشمِ زدن میں سب کو اسلام لانے پر مجبور کر دے لیکن یہ اس کی حکمت کے خلاف ہے۔ ورنہ ابراہیم اور نمرود کی پہچان کیسے ہو؟ حسین و یزید کا امتیاز کیونکر ہو؟

4۔ مشرکانہ رسوم: سورہ کے آخری حصہ میں مشرکین کی ان جاہلانہ رسموں کی تردید کی گئی ہے جو انہوں نے جانوروں کی حلت و حرمت وغیرہ کے متعلق مقرر کر رکھی تھیں اور واضح طور پر بتا دیا کہ یہ تمہاری من گھڑت باتیں ہیں، اللہ تعالیٰ کا یہ حکم نہیں ہے۔

رکوع نمبر 15 میں مکارم اخلاق کی تعلیم دی گئی ہے اور اخلاق رذیلہ سے اپنے حکیمانہ انداز میں منع کیا گیا ہے۔

اللہ تعالیٰ نے اس سورہ کے آخری رکوع میں اپنے محبوب کریم صلی اللہ علیہ وآلہ وسلم کو حکم فرمایا ہے کہ ’قل ان صلاتی‘ تا ’و انا اول المسلمین‘ کا اعلان کریں۔ ان دونوں آیتوں کا ترجمہ آپ بار بار پڑھیں اور غور کریں۔ آپ کا دل پکار اٹھے گا کہ بخدا یہی حاصلِ اسلام ہے، یہی روحی توحید ہے۔