تعارف سورۃ العصر

اس سورہ کا نام العصر ہے جو پہلی آیت سے ماخوذ ہے۔ یہ ایک رکوع اور تین آیات پر مشتمل ہے۔ اس کے کلمات کی تعداد چودہ اور حروف کی تعداد اڑسٹھ ہے۔

زمانہ نزول

جمہور علماء کے نزدیک یہ سورہ مکہ مکرمہ میں نازل ہوئی۔ اس کا اسلوب بیان اسی قول کی تائید کرتا ہے۔

شان نزول

حضرت شاہ عبدالعزیز رحمۃ اللہ علیہ نے اس کا شان نزول یہ بتایا ہے کہ کلاہ بن اسید جس کی نیت ابو الاسدین تھی۔ عہد جاہلیت میں حضرت ابوبکر رضی اللہ عنہ سے اس کا بڑا یارانہ تھا۔ حضرت ابوبکر مشرف بہ اسلام ہوئے تو یہ ناصح مشفق بن کر آپ کو سمجھانے آیا‘ کہنے لگا کہ: اے ابوبکر! تمہاری قابلیت اور دانشمدی ہر شک و شبہ سے بالا تر تھی، کاروبار میں بھی تمہارا کوئی ہمسر نہ تھا، اپنی تاجرانہ مہارت کے باعث تمہارا ہر سودا نفع بخش ہوا کرتا تھا‘ بایں فہم و دانش تم نے اپنے آباء و اجداد کا طریقہ چھوڑ دیا؟ لات وہبل کی عبادت ترک کردی اور ان کی شفاعت سے اپنے آپ کو محروم کر دیا؟ تم سے ایسی نادانی کی توقع ہر گز نہ تھی! آخر تمہیں کیا ہوگیا ہے؟ آپ نے اس کو جواب دیا کہ جو شخص حق کو قبول کرلیتا ہے اور ثابت قدمی سے راہ راست پر گامزن ہوجاتا ہے، وہ زیاں کار نہیں ہوتا۔ اللہ تعالیٰ نے یہ سورہ نازل فرمائی جس سے حضرت ابوبکر صدیق رضی اللہ عنہ کے قول کی تصدیق ہوتی ہے۔

مضامین

یہ تین آیات ہیں یا اسرار و معارف کے ٹھاٹھیں مارتے ہوئے سمندر ہیں جن کا کنارا ناپید ہے اور ان کی گہرائی بےاندازہ ہے۔ عبارت کے ایجاز کو دیکھ کر فصحائے عرب تصویرِ حیرت بن گئے اور معانی کے شانِ اعجاز کو دیکھ کر عقلِ انسانی دنگ رہ جاتی ہے۔

علامہ ابن کثیر نے لکھا ہے کہ عمرو بن عاص ابھی مسلمان نہیں ہوئے تھے کہ ان کی ملاقات مسیلمہ کذاب سے ہوئی۔ اثنائے گفتگو میں مسیلمہ نے پوچھا کہ بتاؤ اس عرصہ میں تمہارے صاحب پر کیا نازل ہوا ہے؟ عمرو نے کہا: بڑی مختصر اور انتہائی بلیغ سورہ نازل ہوئی ہے۔ اس نے پوچھا کون سی؟ انہوں نے یہ سورہ پڑھ کر سنائی۔ چند لمحے اس نے توقف کیا پھر کہا: اسی قسم کی سورہ مجھ پر بھی نازل ہوئی ہے اور یوں پڑھنے لگا:

یا وبر یا وبر وانما انت اذنان وصدر وسائرک حضرت نقر۔.

پھر داد طلب نگاہوں سے عمرو بن عاص کی طرف دیکھنے لگا اور پوچھا بتاؤ کیسی ہے؟ انہوں نے جواب دیا کہ اے مسیلمہ! تجھے خوب علم ہے کہ میں تجھے پرلے درجے کا جھوٹا جانتا ہوں۔ وبر بلی کا ہمشکل ایک جانور ہے جس کے دونوں کان اور سینہ بہت بڑے ہوتے ہیں اور اس کا بقیہ جسم بڑا بدصورت ہوتا ہے۔ مسیلمہ کذاب نے چاہا قرآن کریم کی اس نورانی سورہ کا ایسے خرافات سے مقابلہ کرے۔ بھلا قرآن کی آیات کے مقابلہ میں اس ہذیان سرائی کی کیا وقعت ہو سکتی تھی۔ اہل ایمان تو کجا ایک ایسا شخص جو ابھی کفر و شرک کی آلائشوں سے آلودہ ہے اس کا ذوق سلیم بھی اس مجموعہ خرافات کو مسترد کرنے پر مجبور ہوجاتا ہے۔

صحابہ کرام کو اس سورہ کی معنویت و عظمت کا پورا پورا احساس تھا: چنانچہ طبرانی نے عبیداللہ بن حفص سے روایت کیا ہے کہ جب کبھی دو صحابی ایک دوسرے سے ملاقات کرتے تو رخصت ہونے سے پہلے ایک صاحب یہ سورہ پڑھ کر سنا تے۔

امام شافعی رحمۃ اللہ علییہ نے بالکل بجا کہا ہے:

لو تدبر الناس هٰذہ السورة لوسعتهم.

یعنی اگر لوگ اس ایک سورہ میں ہی غور وتدبر کریں تو ان کی فلاح دارین کے لیے یہ ایک سورہ ہی کافی ہے۔