تعارف سورۃ الماعون

اس سورہ کی آخری آیت میں ’الماعون‘ کا کلمہ مستعمل ہے۔ یہ ہی اس سورہ کا عنوان ہے۔ اس کی سات آیتیں اور ایک رکوع ہے یہ پچیس کلمات اور ایک سو پچیس حروف پر مشتمل ہے۔

نزول

عطاء اور جابر کے نزدیک یہ مدنی ہے۔ حضرت ابن عباس رضی اللہ عنہما کا ایک قول بھی یہی ہے، لیکن جمہور نے اسے مکی سورتوں میں شمار کیا ہے۔

مضامین

اس سورہ میں ان لوگوں کے اخلاق و کردار کی تصویر کشی کی گئی ہے جو روز جزاء پر ایمان نہیں رکھتے۔ اس فانی زندگی کو ہی انسانی زندگی کو ہی انسانی زندگی خیال کرتے ہیں اور اسی کو زیادہ سے زیادہ آرام دہ اور معزز بنانے کی دھن میں مگن رہتے ہیں۔ خود سوچیے جو معاشرہ در پر آنے والے خستہ حال یتیموں کو دھکے دے کر اپنے ہاں سے نکال دیتا ہے، جو غریب فاقہ کشوں پر نہ خود رحم کھاتا ہے اور نہ دوسرے لوگوں کو ان کی اعانت کی ترغیب دیتا ہے۔ از خود تو اس سے انسانی ہمدردی کے جذبہ کا اظہار نہیں ہوتا لیکن اگر کوئی چار و ناچار اس سے بھلائی صادر ہوجاتی ہے تو پھر ریا و نمود سے اس کو غارت کردیتا ہے۔ نیکی کی توفیق سے وہ اس قدر محروم ہے کہ کسی کے لیے کوئی بڑا ایثار تو رہا ایک طرف اس سے تو معمولی نیکی بھی سرزد نہیں ہوتی، وہ روز مرہ کے استعمال میں لائی جانے والی چیزیں بھی اپنے دوستوں اور پڑوسیوں کو استعمال کے لیے نہیں دیتا۔ جس شخص کا کردار یہ ہو اس سے زیادہ بدبخت کون ہوسکتا ہے؟ قرآن کریم کا ہم پر یہ کتنا بڑا احسان ہے کہ اس نے ہمیں ذلت و رسوائی اور خست کے اس گڑھے سے نکلنے اور بلندیوں پر آشیاں بند ہونے کا درس دیا۔