تعارف سورۃ القصص

اس سورہ مبارکہ کا نام القصص ہے۔ اس کی آیات کی تعداد اٹھاسی ہے، رکوع نو، کلمات چار سو اکتالیس اور حروف پانچ ہزار آٹھ سو ہیں۔ یہ بھی مکی زندگی کے درمیانی عہد میں نازل ہونے والی سورتوں میں سے ایک سورہ ہے۔

مضامین

ویسے تو قرآن کریم کی تمام آیات کی طرح اس سورت کی ہر آیت بھی روشنی کا مینار ہے جس سے عرصہ حیات جگمگارہا ہے۔ تین امور کی طرف خاص طور پر توجہ دلائی گئی ہے:

1۔ استعماری طاقتوں، نور ایمان سے محروم جابر حکمرانوں کا ہمیشہ سے یہ دستوررہا ہے کہ وہ اپنے اقتدار کو بر قرار رکھنے کے لیے اپنی رعایا کے مختلف طبقات میں منافرت پیدا کرتے رہتے ہیں ان کی ساری ڈپلومیسی باہمی عداوت کی آگ بھڑکانے میں وقف ہوجاتی ہے۔ انہیں اس سے کوئی غرض نہیں ہوتی کہ منافرت و عداوت کی جو آگ وہ اپنی رعایا میں بھڑکا رہے ہیں کئی جوانیاں اس میں بھسم ہو جائیں گی۔ کئی سہاگ لٹ جائیں گے، کئی ہنستی مسکراتی بستیاں اجڑ جائیں گی۔ ملک کی ترقی رک جائے گی۔ ان کے سامنے نقطہ اپنے ایوان اقتدار کو مستحکم بنانا ہوتا ہے۔ اگر ان کی رعایا و اتفاق پیدا ہو جائے تو وہ ایک دن کے لیے بھی ان کی اس ظالمانہ حکومت کو برداشت نہ کر سکیں۔ یہ لوگ اس خطرہ سے بخوبی آگاہ ہیں۔ قرآن کریم نے اس سورت میں فرعونی سیاست کے خدوخال کو اچھی طرح بےنقاب کر دیا ہے تاکہ کوئی شخص ان کے بلند بانگ دعووں سے دھوکا نہ کھائے اور رخ ہمچو ماہ تاباں دل ہم چو سنگ خارا قسم کے حکمرانوں سے ہوشیار رہیں۔

2۔ دوسری چیز جو اس سورت میں تفصیل سے بیان کی گئی ہے وہ ایک سرمایہ دار کے ذہن کا تجزیہ ہے۔ قارون کے پاس دولت کی افراط ہے۔ اس کے خزینوں اور دفینوں میں سمیٹی ہوئی دولت کا شمار آسان نہیں۔ صرف اس سے اندازہ لگائیے کہ اس کے تالوں کی چابیوں کا گچھا اتنا وزنی ہے کہ اسے ایک تنومند جماعت بھی آسانی سے نہیں اٹھا سکتی۔ دولت کی اس ریل پیل کے باوجود دل اتنا سخت اور سینہ اتنا تنگ ہے کہ اگر اس کو کلیم اللہ جیسا رسول نصیحت کرتا ہے کہ احسن کما احسن اللہ الیک تو وہ اسے خاطر میں لانے کے لیے تیار نہیں بلکہ بڑی بےحیائی سے اپنے کریم رازق کی کرم گستری کا انکار کر دیتا ہے اور بربلا کہتا ہے کہ مجھے سیم و زر کے یہ انبار خدانے نہیں دئیے بلکہ یہ میری ذہانت، معاملہ فہمی اور کاروباری مہارت کا ثمر ہے۔ جب ذہن میں یہ چیز سما جائے تو اسے کیا پڑی ہے کہ وہ اپنی دولت کو خلق خدا کی امداد کے لیے صرف کرے۔ ایسے ہی اہل ثروت کے شبستانوں کے سایوں میں انسانیت سسکتی رہتی ہے۔ ایسے ہی دولت مند شرف انسانی کی قبا کو تار تار کرتے ہیں۔ انہی کے عشرت کدوں میں گناہ اور رذالتوں کا تھوک بیوپار ہوتا ہے۔ یہیں غربت و افلاس کے پنجوں میں پھنسے ہوئے انسانوں کو ٹھوکریں ماری جاتی ہیں اور آخر کار یہی ٹھوکریں ان راکھ کے ڈھیروں میں انتقام کی چنگاری کو سلگاتی ہیں جو دہک دہک کر جہنم زار بن جاتی ہیں۔ جب ضبط و تحمل کے بند ٹوٹ جاتے ہیں تو سرخ سیلاب بن کر ہر چیز کو زیرو زبر کر دیتے ہیں۔ اہل ثروت کی سنگدلی، کنجوسی اور سرد مہری سے جو بربادیاں جنم لیتی ہیں، قارون کے رویے پر ملامت کرتے ہوئے حضرت کلیم علیہ السلام نے ان کی طرف واضح اشارہ فرما دیا ’لا تبغ الفساد فی الارض‘ یعنی اپنے اس طریقہ کار سے تو ملک میں فساد برپا نہ کر۔ یہ الفاظ اہل ذکر کے لیے اپنے دامن میں پندو موعظت کی ایک دنیا سمیٹے ہوئے ہیں۔

3۔ آیت 57 میں اسلام کے نظام معاشیات، اسلام کے نظام قانون، اسلام کے نظام اخلاق کو رائج کرنے میں کوتاہ نظر اعیان حاکم کو جو خدشے اور خطرے دکھائی دیتے ہیں ان کا ازالہ فرما دیا۔ یہ سمجھا جاتا ہے کہ اکیسویں صدی میں اگر چودہ سو سالہ پرانا نظام جاری کر دیا تو دنیا کی ترقی یافتہ قومیں ہم سے آنکھیں پھیر لیں گی اور ہم تنہا وہ جائیں گے۔ اس آیت میں غور کرنے سے یہ تمام فہمیاں کافور ہو جائیں گی۔