تعارف سورۃ النبأ

اس سورہ مبارکہ کا نام النبأ ہے جو دوسری آیت سے ماخوذ ہے۔ اس کے علاوہ اسے سورۂ عم، سورہ عم یتسائلون اور التساؤل بھی کہا جاتا ہے۔ یہ دو رکوعوں اور چالیس آیتوں پر مشتکل میں ہے اس کے کلمات کی تعداد سینتیس اور حروف کی تعداد نو سو ستر ہے۔

نزول

باتفاق علماء یہ عہد نبوت کی ابتداء مکہ مکرمہ میں نازل ہوئی۔

مضامین

حضور سرور عالم صلی اللہ علیہ وآلہ وسلم کی ہر بات ویسے تو اہل مکہ کے لیے حیرت انگیز تھی۔ وہ لوگ حضور کی باتیں سنتے اور حضور کے اعمال کا مشاہدہ کرتے تو ان پر عجیب قسم کی سراسیمگی طاری ہوجاتی۔ سب سے زیادہ جس چیز نے انہیں پریشان کر رکھا تھا وہ نبی کریم کا یہ ارشاد تھا کہ اس جہان رنگ و بو کے بعد ایک اور جہان بھی ہے۔ اس چند روزہ زندگی کے بعد ایک ایسی زندگی بھی ہے جس کی انتہا نہیں۔ قیامت کے دن انہیں اور ان کے آباؤ اجداد کو قبروں سے نکال کر رب کائنات کے سامنے پیش کیا جائے گا اور وہاں ان سے ان کے چھوٹے بڑے اعمال کا حساب لیا جائے گا اور وہاں ان سے ان کے چھوٹ بڑے اعمال کا حساب لیا جائے گا۔ ان کی عقل جس کی دقیقہ سنجی پر انہیں بڑا گھمنڈ تھا، اس بات کو تسلیم کرنے کے لیے ہر گز تیار نہ تھی۔ ہزاروں صدیوں کی پہنائیوں میں ان کی مشت غبار کے بکھرے ہوئے ذرے کون جمع کرے گا اور پھر ان میں روح کیسے پھونکی جائے گی۔ وہ اس مسئلہ پر شب و روز غور کرتے، آپس میں بحث کرتے، ان کی مجلسوں میں اس موضوع پر گرما گرم مذاکرے ہوتے، لیکن وہ کسی صورت میں وقوع قیامت کو ماننے کے لیے اپنے آپ کو تیار نہ پاتے۔ اس نہ ماننے میں ایک نفسیاتی جھجک بھی سد راہ بنی ہوئی تھی۔ اگر وہ وقوع قیامت کو تسلیم کرتے ہیں تو ان کی زندگی کا سارا نقشہ تلپٹ ہو کر رہ جاتا ہے۔ اس معاشرہ میں انہیں لوٹ کھسوٹ کی جو آزادی میسر تھی۔ عیش وطرب کی محفلین جن میں مہوش اور بدمست جوانیاں ساری رات محو رقص رہا کرتیں، بادۂ ارغوانی کے بلوریں جام مصروف گردش رہتے۔ جہاں کسی ضرورت مند کا استحصال مباح تھا۔ جہاں قرض خواہ اپنے مقروض سے من مانی شرح پر سود لیا کرتا تھا۔ اگر وہ روز حساب پر ایمان لاتے ہیں تو ان کو تمام لغویات سے دست کش ہونا پڑتا ہے جس کے لیے وہ تیار نہ تھے۔ اس سنگ گراں کوان کی راہ سے ہٹانے کے لیے قرآن ِ کریم میں متعدد بار بڑے زور شور سے بڑے زور دلائل پیش کیے گئے ہیں۔ اس سورۂ مبارکہ میں یہی موضوع زیر بحث ہے۔

پہلے تو دو ٹوک الفاظ میں یہ بتا دیا کہ تمہارے انکار سے حقیقت نہیں بدل سکتی۔ قیامت ضرور برپا ہوگی تم خود اپنی آنکھوں سے اس کا مشاہدہ کروگے اور اس کا اعتراف بھی کرو گے لیکن اس وقت تمہارا قیامت پر ایمان لانا تمہیں جہنم سے بچا نہ سکے گا۔ پھر ان کے اس اعتراض کا جواب دیا کہ ان کے منتشر ذروں کو کیسے جمع کیا جائے گا۔ بتایا کہ ان ذروں کو جمع کرنے والا وہ قادر مطلق اور حکیم وعلیم خدا ہے جس کی قدرت اور حکمت کے جلوے قدم قدم پر اس کی کبریائی کی گواہی دے رہے ہیں جو ایسے محیر العقول کام سر انجام دے سکتا ہے اس کے لیے تمہیں از سرِ نو زندہ کرنا قطعاً مشکل نہیں ہے۔

اس کے بعد قیامت برپا کرنے کی حکمت بتائی کہ یہ کیسے ہوسکتا ہے کہ ایک انسان ساری عمر لوگوں پر ظلم وستم کرتا رہے۔ غریبوں کو لوٹتا رہے، داد عیش دیتا رہے، اپنے خالق کی نافرمانی کرتا رہے۔ اپنے رب کریم کی اطاعت سے سرِ مو انحراف نہ کرے۔ ان دو شخصوں کے عملوں میں اتنے سنگین تفاوت کے باوجود اس کا نتیجہ یکساں رہے۔ ا س سے بڑی نا انصافی اور کیا ہوسکتی ہے۔ بتادیا کہ قیامت برپا کرنے میں حکمت الٰہی یہ ہے کہ بدکاروں کو ان کی بدی کی سزا دی جائے اور نیکوں کو ان کی نیکی کا اجر عظیم مرحمت فرمایا جائے۔

آخر میں اس غلط فہمی کا بھی ازالہ کردیا جس میں اکثر کفار مبتلا تھے۔ وہ کہا کرتے کہ اگر قیامت آبھی گئی تو اس روز بھی اللہ کی نعمتیں ہمیں ہی ملیں گی۔ ہمیں جو عزت اور سرفرازی اس دنیا میں نصیب ہے۔ قیامت کے دن بھی یہ ہمیں نصیب ہوگی۔ ہمارے جاں نثار خدام اور وفادار ملازم اس وقت ہمارے ارد گرد حلقہ زن ہوں گے۔ اگر کسی فرشتہ نے ہماری طرف دست تعدی دراز کیا تو ہمارے درجنوں جواں سال اور بہادر بیٹے ان کو مزا چکھا دیں گے اور یہ ہمارے بت جن کی ہم پرستش کرتے ہیں قیامت کے دن ہماری شفاعت کریں گے۔ اس لیے ہمیں دوزخ کا کوئی اندیشہ نہیں۔ ان کم نگاہوں کو بتادیا کہ اس قسم کی خام خیالیوں کو اپنے دل سے نکال دو۔ وہاں کسی کی مجال نہ ہوگی کہ دم مار سکے۔ شفاعت کے لیے وہی زبان کھول سکے گا جس کو رحمٰن و رحیم نے منصب شفاعت پر سرفراز کیا ہوگا۔ تمہارے یہ بت اس روز خود دوزخ کا ایندھن نہیں بنیں گے۔ تمہاری نجات کا انہیں کب خیال ہوگا۔ آخر میں تنبیہ فرمادی کہ آج راہ حق اختیار کرلو۔ اس فرصت کو غنیمت جانو، ورنہ قیامت کے روز تمہاری حالت اتنی ناگفتہ بہ ہوگی کہ تم اپنی زندگی سے بےزار ہوگے اور بصد حسرت یہ کہہ رہے ہوگے۔ یلیتنی کنت ترابا۔ کاش کہ میں مٹی ہوجاتا۔