تعارف سورۃ الرحمن

اس مبارک سورت کا پہلا کلمہ الرحمن ہے، یہی اس کا نام ہے۔ نیز اس سورہ میں اللہ تعالیٰ کی شان رحمانیت کی تجلیاں ہر سو جلوہ طراز ہیں۔ اس لیے اس سورت کے مضامین سے یہ نام بڑی مناسبت رکھتا ہے۔ حضرت سیدنا علی کرم اللہ وجہہ سے اس کا نام عروس القرآن بھی مروی ہے۔ اس میں تین رکوع، چھہتر یا اٹھہتر آیتیں، تین سو اکیاون کلمے، ایک ہزار چھ سو چھتیس حروف ہیں۔

نزول

اگرچہ چند حضرات نے اسے مدنی سورتوں میں شمار کیا ہے لیکن اکثر علمائے تفسیر کی یہی رائے ہے کہ اس کا نزول مکہ مکرمہ میں ہوا۔ اس کے مضامین بھی اس کی تائید کرتے ہیں۔ اس کے علاوہ روایات صحیحہ میں بھی اس کی صراحت موجود ہے۔ علامہ قرطبی اس سورت کے ابتدائیہ میں لکھتے ہیں۔

’’حضرت عروہ ابن زبیر سے مروی ہے کہ ایک روز صحابہ کہنے لگے کہ قریش نے آج تک قرآن کو نہیں سنا، بغیر سنے اس کی مخالفت کرتے رہتے ہیں۔ اگر کوئی صاحب ہمت کرے اور بلند آواز سے ان کو قرآن حکیم سنائے تو کتنا اچھا ہو۔ حضرت ابن مسعود نے کہا یہ سعادت میں حاصل کروں۔ صحابہ نے کہا کہ تمہارا سنانا نہیں۔ ایسا نہ کہ وہ تمہیں کمزور اور ضعیف سمجھ کر زد و کوب کریں کسی ایسے آدمی کو یہ فریضہ انجام دینا چاہیے جس کا قبیلہ زور آور ہوتا کہ اس کے خوف سے کوئی کافر اس پر دست درازی نہ کر سکے لیکن ابن مسعود نے ان کی ایک نہ سنی۔ اُٹھے مقام ابراہیم کے پاس جا کر کھڑے ہو گئے اور اپنی سریلی آواز سے بلند آواز میں سورہ الرحمن کی تلاوت شروع کر دی۔ قریش جو اپنی اپنی مجلسیں جمائے بیٹھے تھے، پہلے تو انہوں نے کوئی توجہ نہ دی۔ بعد میں جب انہیں پتہ چلا کہ یہ قرآن کی تلاوت کر رہے ہیں تو اٹھ کھڑے ہوئے اور ان کے قریب آ کر انہیں مارنا شروع کیا۔ بڑی بیدردی سے انہیں پیٹا، یہاں تک کہ ان کا چہرہ زخمی ہو گیا‘‘۔ اس سے معلوم ہوا کہ یہ سورت مکہ مکرمہ میں اس واقعہ سے پہلے نازل ہو چکی تھی۔

نخلہ کے مقام پر جب جنات کا ایک گروہ حضور علیہ الصلوۃ والسلام کے پاس سے گزرا تو اس وقت حضور صلی اللہ علیہ وآلہ وسلم صبح میں اسی سورت کی تلاوت کر رہے تھے اور یہ واقعہ بھی ہجرت سے پہلے مکی زندگی کا ہے۔ ان روایات صحیحہ کے بعد اس کے نزول کے بارے میں شک و شبہ کی کوئی گنجائش نہیں رہتی۔

مضامین

اسمائے حسنیٰ میں الرحمن کیساتھ اس سورت کا آغاز ہو رہا ہے۔ الرحمن رحمت و لطف کی ان وسعتوں اور بلندیوں کو شامل ہے، جن کا تصور کرنا ہمارے حیطہ امکان سے باہر ہے۔ ان کو اس نے پیدا فرمایا، اس میں ایسی صلاحیتیں ودیعت کیں اور ایسی استعدادوں کی تخم ریزی کی، جن میں سے بعض کا تعلق اس کی روحانی بالیدگی اور ارتقاء سے ہے اور بعض کا تعلق اس کی مادی زندگی کی نشوونما سے ہے۔

پہلے اس نعمت کو بیان کیا جس کا تعلق اس کے قلب و روح سے ہے، یعنی قرآن کریم کا علم اور اس کے اظہار و بیان کی قوت۔ اس کے بعد آسمانی اور زمینی ان نعمتوں کا ذکر کیا جو انسان کی غذا اور اس کی صحت کے لیے ناگزیر ہیں۔ اس کے ضمن میں چند احکامات بھی ارشاد فرمائے۔ ساتھ ساتھ اپنی شان کبریائی کا بھی تذکرہ کر دیا۔

نوع انسانی کے ساتھ ایک دوسرے نوع کا بھی ذکر یہاں خصوصیت سے کیا گیا ہے جسے جن کہا جاتا ہے۔ ان دونون کے مادہ تخلیق میں جو فرق ہے۔ وہ بھی بتا دیا اور فبای الا ربکما تکذبان کے بار بار تکرار سے اس حقیقت سے بھی آگاہ کردیا کہ قرآن کے مخاطب صرف انسان ہی نہیں بلکہ جنات بھی ہیں اور جب وہ قرآن کے احکام پر عمل کرنے کے مکلف ہیں تو واضح ہو گیا کہ وہ حضور نبی رحمت صلی اللہ علیہ وآلہ وسلم کے امتی ہیں اور حضور صلی اللہ علیہ وآلہ وسلم جن و انس دونوں کے نبی ہیں۔

دوسرے رکوع میں جن و انس میں سے جو سرکش افراد ہیں ان کے انجام کے بارے میں بڑی وضاحت سے بتا دیا اور آخری رکوع میں بڑے روح پرور انداز سے ان انعامات اور احسانات کا تذکرہ کیر دیا جو مولائے کریم جن و انس میں سے اپنے نیک اور فرماں بردار بندوں پر فرمائے گا۔

اللہ تعالیٰ ہمیں اپنی نافرمانی سے بچائے اور اپنے ہر قسم کے عذاب سے پناہ دے، اپنے پیارے حبیب علیہ الصلوۃ والسلام کی غلامی کی توفیق مرحمت فرما دے اور محبت کی دولت سے مالا مال کر دے۔ اور اپنے ان سعادت مند بندوں میں شامل کرے جن پر وہ راضی ہے۔

اللهم نسئلک وانت اکرم المسئولین بجاه حبیبک رحمة للعالمین۔.