Surah at-Tawbah with Urdu Translation

تعارف سورۃ التوبہ

اس سورہ پاک کے متعدد نام منقول ہیں لیکن ان میں سے دو زیادہ مشہور ہیں: التوبہ اور البرائۃ۔ اس سورہ میں چند مخلص اہلِ ایمان کی توبہ قبول ہونے کا ذکر ہے اس لیے اسے التوبہ کہا گیا ہے اور اس میں مشرکینِ عرب کے ساتھ سابقہ تمام معاہدات منسوخ ہونے کا ذکر ہونے کی وجہ سے اسے براءت کہا گیا ہے۔ یہ سورت سولہ رکوعوں، ایک سو انتیس آیتوں اور چار ہزار اٹھتر کلمات پر مشتمل ہے۔

نزول

باتفاقِ علماء یہ سورت مدنی ہے۔ اس میں مذکورہ واقعات کو بنظرِ غائر دیکھنے سے پتہ چلتا ہے کہ یہ سورہ 9 ہجری میں نازل ہوئی ہے کیونکہ غزوہ تبوک جس کا ذکر یہاں بڑی شرح و بسط سے کیا گیا ہے وہ ماہِ رجب 9 ہجری میں ہوا اور مشرکین سے عام بیزاری اور قطع تعلقات کا اعلان بھی اس حج کے موقع پر کیا گیا جو ذی الحجہ 9 ہجری میں ادا کیا گیا۔ اگرچہ غزوہ تبوک سے متعلقہ آیات کا نزول اعلانِ براءت والی آیات سے پہلے ہوا لیکن مؤخرالذکر کی اہمیت کے پیشِ نظر ترتیبِ قرآنی میں اسے مقدم رکھا گیا۔

اس سورہ کی ایک خصوصیت یہ ہے کہ اس سے پہلے بسم اللہ شریف نہیں لکھی جاتی۔ اس کی صحیح وجہ یہ ہے کہ کیونکہ رسول اللہ صلی اللہ علیہ وآلہ وسلم نے اس کے آغاز میں بسم اللہ لکھنے کا حکم نہیں دیا اس لیے نہیں لکھی گئی۔

مضامین

مکہ جو اب تک کفر و شرک کا ایک ناقابلِ تسخیر قلعہ بنا ہوا تھا۔ سن 8 ہجری میں مکہ فتح ہوا۔ اللہ تعالیٰ کی تائید و نصرت سے بےخانماں مہاجروں اور انصار نے پھر حرمِ خلیل میں توحید کا پرچم لہرا دیا۔ اس کا اثر یہ ہوا کہ عرب کے بیشتر قبائل خودبخود آ کر مشرف بہ اسلام ہونے لگے۔ رفتہ رفتہ اسلام کا اثر و نفوذ جزیرہ عرب کی سرحدوں کو عبور کر کے دوسرے ہمسایہ ممالک میں بھی محسوس ہونے لگا۔ عرب خصوصاً حجاز کا بےآب و گیاہ خطہ کسی فاتح کے لیے اپنے اندر کوئی دلکشی نہیں رکھتا تھا۔ اس لیے دائیں بائیں دو جابر سلطنتیں ہونے کے باوجود کسی نے اس کو زیرِنگیں کرنے کی خواہش ہی نہیں کی۔ اسی وجہ سے یہاں کے داخلی حالات میں بھی انہیں کوئی دلچسبی نہیں تھی۔ حضور رحمتِ عالمیان صلی اللہ علیہ وآلہ وسلم کی دعوت سے جو انقلاب رُوپذیر ہو رہا تھا اس کی اطلاعیں وقتاً فوقتاً قیصرِ روم تک پہنتی رہتی تھیں، لیکن اس نے کوئی توجہ نہ دی کیونکہ اسے یقین تھا کہ یہ ایک داخلی معاملہ ہے اور اس میں اتنی تاب نہیں کہ کسی دن اس کے لیے بھی خطرہ بن سکے۔ لیکن اسی اثناء میں چند واقعات ایسے رونما ہوئے جنہوں نے اسے اس نئی طاقت کی اہمیت کا احساس دلا دیا۔

دوسرے بادشاہوں کی طرح حضور علیہ السلام نے بصریٰ کے حاکم شرحبیل کی طرف بھی دعوتِ اسلام دینے کے لیے اپنا مکتوب اپنے قاصد کے ہاتھ روانہ کیا، لیکن شرحبیل نے اسے قتل کر دیا۔ ذات الطلح کے باشندے مدینہ طیبہ سے پندرہ مسلمانوں کو اپنے ہمراہ اس غرض سے لے آئے کہ وہ انہیں دینِ اسلام سکھائیں گے لیکن انہوں نے بھی غدر کیا اور ان مسلمانوں کے سوائے ایک کے شہید کر دیا۔ حضور صلی اللہ علیہ وآلہ وسلم نے ان شہداء کا انتقام لینے کے لیے تین ہزار کی جمیعت حضرت زید بن حارثہ رضی اللہ عنہ کی قیادت میں روانہ کی۔ شرحبیل ایک لاکھ فوج لیکر مقابلہ کے لیے بڑھا۔ ہرقل کا بھائی تھیوڈور بھی ایک لاکھ کا لشکرِ جرار لے کر اس کی امداد کو آ پہنچا۔ تین ہزار مجاہدین کے سامنے اب دو لاکھ فوج صف بستہ تھی۔ مسلمان بھی کب ٹلنے والے تھے۔ جنگ شروع ہوئی، یکے بعد دیگرے تین مسلمان جرنیلوں زید بن ثابت، جعفر بن ابی طالب اور عبداللہ بن رواحہ رضی اللہ عنہم نے جامِ شہادت نوش کیا۔ ان کے بعد حضرت خالد رضی اللہ عنہ نے آگے بڑھ کر اسلام کا جھنڈا تھاما اور اس بےجگری اور جانبازی سے اپنے سے چھیاسٹھ گنا بڑی فوج کا مقابلہ کیا کہ ان کے دانت کھٹے کر دیئے۔ اب ہرقل کی آنکھیں کھلیں کہ عرب کے جن صحرانوردوں کو وہ خاطر میں نہیں لایا کرتا تھا ان کے بازو اتنے مضبوط اور تلواریں ایسی تیز ہیں کہ اس کی دو لاکھ فوج بھی انہیں شکست نہ دے سکی۔ انہی دنوں میں یہ واقعہ بھی ظہور پذیر ہوا کہ ہرقل کی عرب فوج کا ایک اعلیٰ افسر فروہ بن عمر جذامی مشرف بہ اسلام ہو گیا۔ ہرقل نے اسے اپنے دربار میں طلب کیا اور اسے کہا کہ یا تو اس نئے دین سے تائب ہو کر اپنا سابقہ مذہب (مسیحیت) اختیار کر لو ورنہ تمہارا سر قلم کر دیا جائے گا۔ اس نے بڑی خوشی سے جان دے دی اور اپنے ایمان سے دستکش نہ ہوا۔ ان واقعات نے ہرقل کو چوکنا کر دیا اور اس نے فیصلہ کرلیا کہ وہ آج ہی مسلمانوں کی ہر لحظہ بڑھتی ہوئی قوت کو کچل دے گا۔ چنانچہ اس نے زور و شور سے جنگ کی تیای شروع کر دی اور خود بڑھ کر مدینہ پر حملہ کرنے کے لیے پر تولنے لگا۔

رسول اللہ صلی اللہ علیہ وآلہ وسلم کی نگاہِ دور بین دور افق پر نمودار ہونے والے فتنہ و فساد کے بادلوں کو کیسے نظر انداز کر سکتی تھی۔ چنانچہ حضور صلی اللہ علیہ وآلہ وسلم نے بھی شام پر چڑھائی کا عزم فرما لیا۔ حالات بڑے ناسازگار تھے، ملک میں قحط سالی کا دور دورہ تھا، گرمی کا موسم چل رہا تھا، چلچلاتی دھوپ اور جھلس دینے والی لُو غضب ڈھا رہی تھی۔ ریتلی زمین تانبے کی طرح تب رہی تھی۔ صحابہ رضی اللہ عنہم فرماتے ہیں جب جہاد پر جانے کا حکم ہوا تو شدت کی گرمی تھی۔ باغات میں کھجوریں پک رہی تھیں۔ کھجوریں کھانے، ٹھنڈا پانی پینے، گھنے سائے میں بیٹھنے کے دن تھے۔

جب جنگ کی تیاری کا حکم ہوا تو مردانِ وفاکیش تو ہلاتآمل تعمیل حکم کے لیے حاضر ہوگئے اور ہر ایک نے ایک دوسرے سے بڑھ چڑھ کر مالی امداد بھی کی۔ عورتوں نے اپنے کانوں کی بالیاں اور گلے کے ہار تک اتار کر پیش کر دیئے۔ حضرت عثمان رضی اللہ عنہ اور حضرت عبدالرحمان بن عوف نے ہزارہا اشرافیاں لاکر قدموں میں ڈھیر کر دیں۔ حضرت صدیق نے اپن عمر بھر کا اندوختہ اٹھا کر بارگاہِ نبوت میں حاضر کر دیا۔ ان سرفروشوں اور جانثاروں کے علاوہ کئی اور عناصر بھی تھے۔ ایک عنصر منافقین کا تھا وہ بھلا کب ان زحمتوں اور صعوبتوں کو گوارا کرنے والے تھے۔ طرح طرح کے جھوٹے اور بےسر و پا بہانے پیش کرتے اور حضور صلی اللہ علیہ وآلہ وسلم ان سے صرفِ نظر کر لیتے۔ یہ لوگ اور دوسرے مشرک دل ہی دل میں بڑے خوش تھے۔ انہیں یقین تھا کہ مسلمان اب بچ کر واپس نہیں آئیں گے بلکہ قیصر کی افواجِ قاہرہ انہیں کاٹ کر رکھ دیں گی اور اس طرح اسلام کا چراغ بجھ جائے گا۔ ان کی ساری امیدیں اس جنگ پر مرکوز ہو کر رہ گئی تھیں۔

آخر تیس ہزار کا لشکر اللہ تعالیٰ کے محبوب صلی اللہ علیہ وآلہ وسلم کی قیادت میں اپنے مولا کریم کا نام بلند کرنے کے لیے اور اسلام کی عظمت کا جھنڈا گاڑنے کے لیے موسم کی اس ناسازگاری کے باوجود سامانِ خورد و نوش کی قلت اور سواریوں کی کمیابی کے باوجود دنیا کی عظیم ترین طاقت سے ٹکر لینے کے لیے روانہ ہوا۔ عشاقِ باصفا کا یہ کاروان تپتے ہوئے ریگستانوں کو پار کر کے تبوک کے مقام پر خیمہ زن ہوا۔

قیصر کو جب اطلاع ملی کہ جن کو صفحہ ہستی سے مٹانے کے لیے وہ حملہ کی تیاریاں کر رہا تھا وہ جوانمرد اپنے فقر و فاقہ و درویشی سے مسلح ہو کر اس کی طاقت و سطوت کو اس کے اپنے ملک میں اس کے اپنے گھر میں للکارنے آگئے ہیں تو اس نے مصلحت اسی میں دیکھی کہ اپنی فوجوں کو سرحد سے ہٹا لے اور اپنے شہر میں قلعہ بند ہو جائے۔

نبی کریم صلی اللہ علیہ وآلہ وسلم نے بیس روز تک وہاں قیام فرمایا۔ اس عرصے میں اردگرد کی چھوٹی چھوٹی ریاستوں کو اپنا باجگزار بنایا۔ جرباء، اذرح اور عمان کے لوگوں نے جزیہ دینے پر صلح کی۔ ایلیہ کا مسیحی حکمران یوحنا دربارِ رسالت میں آ خر صلح کا خواہاں ہوا اور تین سو دینار سالانہ ادا کرنے پر مصالحت کی۔ دومۃ الجندل کے مسیحی حاکم اکیدر کی طرف حضرت خالد کو روانہ کیا گیا چنانچہ وہ اس کو قید کرنے اور بہت سا مالِ غنیمت لے کر واپس آئے۔ اگرچہ روم کے ساتھ جنگ نہیں ہوئی مگر اس مہم سے اسلام کی ترقی میں بڑی مدد ملی۔ سلطنتِ روم کی سرحد کے ساتھ ساتھ جتنے عرب قبائل تھے وہ یاتو مسلمان ہوگئے یا باج گزار بن گئے۔ اس عرب کی یہ سرحد دشمن کی یلغار سے محفوظ ہو گئی۔ ساتھ ہی قیصر اور اس کے اعوان و انصار کی یہ غلط فہمی بھی دور ہو گئی کہ مسلمان ایک ترنوالہ ہیں‘ جب ان کی مرضی ہوگی انہیں کچل دیں گے۔ اس کے علاوہ تمام عرب قبائل پر مسلمانوں کی ہیبت چھا گئی اور بچارے منافقین اور اسلام کے تمام بدخواہوں کی آرزوؤں پر تو پانی پھر گیا۔ بڑی مدت کے بعد امید کی جو کرن انہیں افق پر نظر آئی تھی وہ بھی مایوسی کے گھپ اندھیروں میں گم ہوکر رہ گئی۔ غزوہ تبوک کا ایک فائدہ یہ بھی ہوا جو اپنی اہمیت میں کسی سے کم نہیں کہ منافقین بےنقاب ہو گئے اور جو مراعات ان کے ساتھ پہلے روا رکھی جاتی تھیں ان سے وہ محروم کر دیئے گئے۔

دوسرا اہم واقعہ جس کا ذکر اس سورہ میں کیا گیا ہے وہ مشرکین اور کفار کے ساتھ کیے گئے معاہدوں کی تنسیخ ہے۔ حضور صلی اللہ علیہ وآلہ وسلم نے ہمیشہ کوشش فرمائی کہ تمام غیرمسلم قوموں کے ساتھ صلح و سلامتی سے رہیں۔ اسی مقصد کے لیے ان ساتھ صلح کے معاہدے کے گئے لیکن فریقِ ثانی نے ان کو پورا کرنے کی کوشش نہیں کی۔ جب کبھی موقع ملا عہد شکنی کر دی۔ اسی سال ماہِ ذی قعد میں مسلمانوں کا ایک قافلہ حج کے لیے روانہ ہوا۔ امیرالحج حضرت صدیق اکبر رضی اللہ عنہ تھے۔ اس قافلہ کی روانگی کے بعد اس سورہ کی ابتدائی آیتیں نازل ہوئیں کیونکہ مجمع عام میں ان کا اعلان کرنا ضروری تھا اور حج کے موقع پر عرب کے اطراف و اکناف سے لوگ جمع ہونے والے تھے اس لیے حضور صلی اللہ علیہ وآلہ وسلم نے حضرت علی کرم اللہ وجہہ الکریم کو پیچھے روانہ فرمایا تاکہ حج کے روز یہ اعلانِ عام کر دیا جائے۔ یاد رہے کہ تمام کفار سے کیے گئے معاہدوں کی تنسیخ نہیں کی جا رہی بلکہ ان قوموں کے معاہدوں کی تنسیخ کا اعلان کیا جا رہا ہے جنہوں نے پہلے عہد شکنی کی تھی۔ چناچنہ آیت 4 میں اس کی تصریح موجود ہے۔

اب جبکہ عرب کے طول و عرض میں اسلام کا پرچم لہرا تھا تو ضروری تھا کہ کعبہ سے کفار کی تولیت ختم کر دی جائے اور اہلِ ایمان کو اس کا متولی بنایا جائے۔ چنانچہ یہ حکم بھی فرما دیا کہ آج کے بعد مسلمان ہی کعبہ اور مسجدِ حرام کی خدمت انجام دیا کریں گے۔

ابھی تک مشرکین حرمِ کعبہ میں آکر اپنی سابقہ مشرکانہ رسوم ادا کیا کرتے تھے۔ اب یہ کیونکر مناسب تھا کہ اسلام کے برسرِ اقتدار آ جانے کے بعد بھی اس حریمِ قدس میں مشرکانہ رسوم ادا ہوں جسے اس کے تعمیر کرنے والے نے محض اس لیے تعمیر کیا تھا کہ اس میں خدائے واحد کی عبادت کی جائے۔ اس لیے اس سال سے اس کی بھی ممانعت کر دی گئی۔ انہی امور کے متعلق ضمنی بحثیں اور بھی ہیں۔ اپنے اپنے مقام پر ان کی وضاحت کی جائے گی۔ ان شاءاللہ تعالیٰ۔