تعارف سورۃ القلم

یہ سورہ دو ناموں سے زیادہ مشہور ہے۔ سورۂ "ن" اور "القلم" یہ دو رکوعوں، باون آیتوں، تین سو کلمات اور ایک ہزار دو سو چھپن حروف پر مشتمل ہے۔

نزول

باتفاق علماء اس کا نزول مکہ مکرمہ میں ہوا

مضامین

حضور سرور عالم صلی اللہ علیہ وآلہ وسلم نے دعوت و ارشاد کا سلسلہ بڑی گرمجوشی سے شروع کردیا ہے۔ قرآن کریم کی جو سورتیں یا آیات نازل ہوتی ہیں، حضور اپنے کیف آگیں لہجہ میں اس کی تلاوت کرتے ہیں اور لوگوں کو سناتے ہیں۔ احکام الٰہیہ کی خود بھی پابندی فرماتے ہیں اور دامن رحمت سے جو وابستہ ہوجاتا ہے وہ بھی سرخوشی سے ان پر عمل پیرا ہوجاتا ہے۔ سارا مکہ بھڑک اٹھتا ہے۔ ظلم وستم کا آغاز ہوجاتا ہے۔ اس کے باوجود اللہ کے بندے اپنے اللہ کے بتائے ہوئے راستہ پر بڑی جوانمردی سے گامزن ہیں۔ لوگ حضور صلی اللہ علیہ وآلہ وسلم کے اس والہانہ جوش وخروش کو دیکھ کر تصویر حیرت بن جاتے ہیں اور آخر اس نتیجے پر پہنچتے ہیں کہ یہ دیوانہ ہے، اس کا دماغ ناکارہ ہوگیا ہے۔ سود و زیاں میں تمیز کی صلاحیت باقی نہیں رہی۔ اللہ تعالیٰ قسم اٹھا کر کفار کے ان الزامات کی تردید کرتے ہیں کہ میرا محبوب دیوانہ نہیں ہے بللکہ اخلاق عالیہ کی ان رفعتوں پر فائز ہے جہاں کسی کی رسائی نہیں ہوسکتی۔ جس کا کردار اتنا بلند ہو، جس کی سیرت اتنی بےداغ اور جس کے اعمال سراپا نور ہوں، بھلا اس کو مجنون کہنا کس طرح روا ہے؟

اس کے بعد فرمایا اے حبیب وہ تو چاہتے ہیں کہ آپ ان کے ساتھ مداہنت سے کام لیں اور مصالحت کا رویہ اختیار کریں تو وہ بھی آپ کے س اتھ سختی کا سلوک ترک کردیں۔ لیکن آپ کا یہ شیوہ ہی نہیں، وہ لوگ جو اپنے معاشرہ کے رؤسا ہیں اپنے شرکیہ عقائد کے سرغنے ہیں۔ ذرا ان کے اعمال پر تو نظر ڈالو۔ ہر قسم کی اخلاق برائیوں کے وہاں ڈھیر لگے ہوئے ہیں۔ نیکی کی کوئی کرن بھی تو وہاں نظر نہیں آتی۔ تیرے جیسا مرقع دلبری وزیبائی بھلاان کی پیروی کیسے کرسکتا ہے۔ جس دولت وثروت اور جاہ ومنصب پر یہ اترا رہے ہیں، تیرے رب کی جناب میں تو اس کی کوئی وقعت نہیں۔

پھر مادہ پرستانہ اور سرمایہ دارانہ ذہنیت کی ایسی صحیح تصویر کھینچ کر رکھ دی کہ جسے دیکھ کر طبیعت میں ایسی ذہنیت سے خود بخود نفرت پیدا ہوجاتی ہے۔ جو شخص دولت کی فراوانی کے باوجود کسی گریب کو ایک حبہ تک دینے سے گریزاں ہو اس سے برا انسان اور کون ہوسکتا ہے۔ ساتھ ہی یہ بھی بتادیا کہ متقی لوگوں کے لیے جنت ہے اور ان کے ساتھ جو معاملہ کیا جائے گا وہ اس سے بالکل الگ ہوگا۔ جو معاملہ مجرموں کے ساتھ روا رکھا جائے گا۔ خواب غفلت میں بےسدھ پڑے رہنے والوں کو بتادیا کہ اب وقت ہے جبین نیاز اپنے پروردگار کے حضور جھکا لو، ورنہ قیامت کے دن تم چاہو گے کہ سجدہ کرسکو لیکن ہزار کوشش کے باوجود تم ایسا نہیں کرسکو گے۔ تمہارے پشت اور گردن اکڑ جائے گی۔ اللہ تعالیٰ آخر میں اپنے حبیب کو تسلی دے رہا ہے کہ یہ سرکش ہمیشہ دندناتے نہ پھریں گے۔ ہم انہیں یوں بربادی کے گڑھے میں دھکیل دیں گے کہ انہٰں خبر تک نہ ہوگی۔

آخر میں حضرت یونس علیہ السلام کا واقعہ بیان کر کے نبی کریم صلی اللہ علیہ وآلہ وسلم کو صبر کی تلقین فرمادی گئی۔