تعارف سورۃ ق

اس کا نام سورہ ق ہے جو پہلی آیت کا پہلا حرف ہے۔ اس کے تین رکوع اور تینتالیس آیات ہیں۔ یہ تین سو ستاون کلمات اور ایک ہزار چار سو چورانوے حروف پر مشتمل ہے۔

زمانہ نزول

اگرچہ کسی مستند روایت سے اس کا سال نزول متعین نہیں ہوتا، لیکن اس کے مضامین میں غور کرنے سے پتہ چلتا ہے کہ یہ ان سورتوں میں سے ہے جو مکی عہد کے درمیانی زمانے میں نازل ہوئیں جبکہ حضور علیہ الصلوٰۃ و السلام نے کھل کر اسلام کی تبلیغ شروع کر دی تھی۔ سعادت مند روحیں دوڑ کر اس دعوت کو قبول کرنے لگی تھیں۔ مکہ کے کافرانہ معاشرے میں ایک ہلچل پیدا ہوگئی تھی اور انہوں نے حضور (صلی اللہ علیہ وآلہ وسلم) کو ناکام بنانے کے لیے طعن و تشنیع کے تیر برسانے شروع کر دیے تھے۔

مضامین

اہل عرب کے لیے حضور نبی کریم (صلی اللہ علیہ وآلہ وسلم) کی ساری دعوت ایسی تھی جس نے انہیں ورطہ حیرت میں ڈال دیا تھا، لیکن اس بات کو تو وہ ماننے کے لئے قطعا تیار نہ تھے کہ مرنے کے بعد انہیں پھر زندہ کر دیا جائے گا۔ ان کے پراگندہ اجزا اور منتشر ذروں کو پھر جوڑ دیا جائے گا۔ یہ چیز ان کے نزدیک ناممکن بھی تھی اور خلاف عقل بھی، اس لیے وہ بر ملا کہتے تھے کہ آپ کی یہ بات ماننے کے لیے کسی قیمت پر تیار نہیں۔ انہیں بتا یا جا رہا ہے کہ بےشک یہ کام ازحد و شوار اور ازبس مشکل ہے، بکھرے ہوئے ذرے جنہیں ہوا کے جھونکے کہاں سے کہاں اڑا کر پھینک آئے، ان کو اکٹھا کرنا تمہارے بس کی بات نہیں، کیونکہ تمہارا علم ناتمام اور قدرت محدود ہے، لیکن اس ذات کے لیے اس میں ذرا بھی دشواری نہیں جس کا علم کائنات کے ذرے ذرے کو اور یہاں روپذیر ہونے والی معمولی تبدیلیوں کو بھی جانتا ہے، جس نے ان کا مکمل ریکارڈ تیار کر رکھا ہے۔ اگر تم اللہ تعالیٰ کی بےپایاں قدرت کو جاننا چاہتے ہو، تو عالم بالاکی بےپایاں اور وسیع پہنائیوں کو دیکھو اور اگر اس کی کمال حکمت کا اندازہ لگانا چاہتے ہو، تو اس وسیع و عریض اور پیچیدہ عالم میں جو بےنظیر و ضبط اور ہم آہنگی پائی جاتی ہے، اس میں غور کرو، تمہیں یقین آجائے گا کہ ایسی ہستی کے لیے انسان کو موت کی نیند سلانا اور پھر اس کو عرصہ دراز کے بعد وقت مقررہ پر زندہ کر دینا قطعاً مشکل نہیں۔

جدید ماہرین فلکیات کی تحقیقات کے مطابق یہ نظام شمسی جس میں ہمارا کرہ زمین بھی ہے، یہ ایک کہکشاں (GALAXY) کا حصہ ہے۔ اس ایک کہکشاں میں ایک لاکھ ملین ستارے موجود ہیں۔ اس کہکشاں کا قطرہ دس لاکھ نوری سال ہے، اس کی موٹائی دس ہزار نوری سال ہے۔ سورج کہکشاں کے مرکز سے پچیس یا تیس ہزار نوری سال دور ہے۔ سائنسدان تسلیم کرتے ہیں کہ کائنات کی وسعتوں کا اندازہ لگانا ان کے امکان سے خارج ہے۔ ابھی تک انہوں نے کائنات کے ایک حقیر سے حصہ کا مشاہدہ کیا ہے، لیکن یہ مختصر حصہ بھی اتنا ہے کہ اگر کوئی شخص روشنی کی رفتار (ایک لاکھ چھیاسی ہزار میل فی سیکنڈ) سے سفر کرے، تو اس کی سرحد تک پہنچنے کے لیے اسے چھ ہزار ملین سال درکار ہوں گے۔

یہ کہکشاں جس سے ہمارا تعلق ہے، نسبتاً چھوٹی ہے۔ اس کے علاوہ ہزاروں ملین چھوٹی بڑی کہکشائیں ہیں۔ اس چھوٹی سی وسعت کا اندازہ لگائیے کہ زمین سے چاند دو لاکھ چالیس ہزار میل دور ہے، سورج زمین سے ساڑھے نوکروڑ میل دور ہے۔ اس کا قطر آٹھ لاکھ پینسٹھ ہزار میل ہے اور وہ زمین سے بارہ لاکھ گناہ بڑا ہے۔

آسمان اور زمین کی وسعتوں کا ذکر کرنے کے بعد فرمایا: ’تبصرہۃ وذکری لکل عبد منیب‘ کاش ! وہ امت جو حامل قرآن ہے، وہ نوجوان جو غلامی مصطفی کا دم بھرتے ہیں، وہ اہل علم طلبہ اور اساتذہ خواب خرگوش سے بیدار ہوں۔ تحقیق و تجسس کو اپنا شعار بنائیں، اسرار قدرت کی نقاب کشانی میں ہمت مردانہ کا ثبوت دیں، تو ملت اسلامیہ کا مقدر چمک اٹھے، اوباروانحطاط کا چکر ختم ہو جائے۔

منکرین قیامت کو تنبیہہ فرمائی کہ جس سرکشی اور ہٹ دھرمی کا تم مظاہرہ کر رہے ہو، اس سے پہلے بھی چند قوموں نے یہی طریقہ اپنایا تھا، انجام کارو تباہ کر دی گئیں۔ کیا تم بھی اپنا یہی انجام دیکھنا چاہتے ہو۔

اس حقیقت کی وضاحت بھی کر دی کہ اللہ تعالیٰ بندوں سے دور نہیں، بلکہ ان کی شاہرگ سے بھی وہ زیادہ ان کے قریب ہے، کسی کی کوئی حرکت نہ اللہ تعالیٰ سے مخفی ہے اور نہ کوئی شخص اللہ تعالیٰ کے قابو سے باہر ہے۔ بایں ہمہ دو فرشتے دائیں بائیں تمہارے ساتھ مقرر کر دئیے گئے ہیں جو تمہارے اقوال و اعمال کا ریکارڈ تیار کر رہے ہیں۔

سورہ کے اختتام سے پہلے فرمایا اے حبیب! آپ ان لوگوں کی یاوہ گوئیوں اور ہر زہ سرائیوں سے رنجیدہ خاطر نہ ہوا کریں، بلکہ صبر کا دامن مضبوطی سے پکڑے رہیں۔ صبح و شام ہر وقت میرا ذکر اور میری تسبیح کرتے رہیں۔ یقیناً کامیابی آپ کے قدم چومے گی۔