تعارف سورۃ یٰسین

اس سورہ مبارکہ کا نام یٰسین ہے جو اس کی پہلی آیت ہے، اس میں پانچ رکوع، تراسی آیات، کلمات سات سو انتیس اور حروف تین ہزار ہیں۔

ترمذی کی حدیث شریف میں ہے کہ ہر چیز کے لئے قلب ہے اور قرآن کا قلب یٰسین ہے۔ ابو داؤد کی حدیث میں ہے سید عالم (صلی اللہ علیہ وآلہ وسلم) نے فرمایا اپنے اموات پر یٰسین پڑھو، اسی قرب المرگ اور حالت نزع میں مرنے والے کے پاس یٰسین پڑھی جاتی ہے۔

زمانہ نزول

مضامین میں غور کرنے سے پتہ چلتا ہے کہ یہ سورہ اس وقت نازل ہوئی جب اہل مکہ بڑی شدت اور پوری قوت سے اسلام کی تعلیمات سے انکار کرنے لگے تھے اور اسلامی دعوت اپنے فطری حسن و جمال کے باعث سعادت مند روحوں کو اپنی طرف تیزی سے کھینچنے لگی تھی۔ اسلام کی روز افزوں مقبولیت سے مشرکین گھبرا گئے تھے۔

مضامین

اس میں اسلام دعوت کے تین بنیادی اصولوں پر ایمان لانے کی دعوت دی گئی ہے یعنی توحید، رسالت اور قیامت۔ سب سے پہلے حضور (صلی اللہ علیہ وآلہ وسلم) کی رسالت کو قرآن کی قسم کھا کر بیان کیا گیا اور یہ بھی بتا دیا کہ آپ صراط مستقیم پر ہیں۔

مدت دراز سے سرزمین عرب نورِ نبوت سے محروم چلی آرہی تھی۔ صدیاں بیت گئی تھیں اس علاقہ میں کوئی نبی مبعوث نہیں ہوا تھا۔ عرصہ دراز تک گمراہ رہنے کے باعث فہم و فکر کی قوتیں بانجھ ہو گئیں، اس لئے انہوں نے حضور (صلی اللہ علیہ وآلہ وسلم) پر ایمان لانے سے انکار کر دیا۔ ان کو خواب غفلت سے بیدار کرنے کے لئے ایک تباہ شدہ بستی کا حال انہیں سنایا گیا۔ انہیں بتایا کہ اس بستی کے رہنے والوں نے اپنے رسولوں کو جھٹلایا تھا اور وہ برباد ہوگئے تھے، تم ان کی روش اختیار نہ کرنا۔ اس ضمن میں ایک بندہ مومن کا تذکرہ بھی آگیا ہے جس کی قوت ایمانی اور جذبہ جانفروشی آج بھی ہمارے مردہ دلوں کو نئی زندگی بخش رہا ہے۔

اس کے بعد اپنی توحید، اپنی قدرت اور حکمت پر تکوینی دلائل پیش فرمائے۔ بنجر زمین پر کون مینہ برساتا ہے؟ کس کے حکم کے غذائی اجناس اور رنگ برنگے پھل بکثرت پیدا ہوتے ہیں؟ سورج اور چاند کے طلوع وغروب اور ان کی مقررہ رفتار کی طرف متوجہ کیا اور بتایا کہ سب اپنے اپنے مدار میں محو خرام ہیں نہ کبھی باہمی ٹکر ہوئی ہے اور نہ کوئی اپنے مقررہ وقت سے ایک لمحہ بھر لیٹ ہوا ہے اور نہ کبھی کسی نے آگے گزرنے کی کوشش کی ہے۔ یہ پیچیدہ نظم ونسق اس عمدگی سے کس کی تدبیر سے مصروف عمل ہے؟ دریاؤں اور سمندروں میں کشتیاں کس کے حکم سے سامان اور مسافروں کو اٹھائے ہوئے ایک ملک سے دوسرے ملک کو جا رہی ہیں؟

انسان‘ جس کی تخلیق ایک قطرہء آب سے کی گئی ہے وہ کس ڈھٹائی سے قیامت کا انکار کرتا ہے اور وقوع قیامت پر شبہات واعتراضات کے انبار لگاتا ہے، وہ پوچھتا ہے کہ ان بوسیدہ ہڈیوں کو کون زندہ کرے گا۔ اے حبیب (صلی اللہ علیہ وآلہ وسلم) ! آپ اس ناہنجار کو بتا دیجئے وہی جس نے انہیں پہلے زنگی بخشی تھی، وہی جس کے امر کن سے یہ جہان رنگ وبومعرض وجود میں آگیا، وہی جس کے دست قدرت میں زمین وآسمان کی حکومت ہے جو ہر چیز کا جاننے والا ہے، وہی قیامت کے روز تمہیں قبروں سے زندہ کر کے اٹھائے گا اور جواب دہی کے لئے اپنی عدالت میں پیش کرے گا۔

اس سورہ میں دو چیزیں آپ کی خصوصی توجہ کی مستحق ہیں۔ آیت 47 میں سرمایہ دارانہ ذہنیت کو بےنقال کیا گیا ہے کہ جب انہیں اپنے ان ضرورت مندر بھائیوں کی ضرورتیں پوری کرنے کی دعوت دی جاتی ہے تو کہتے ہیں کہ جن کو اللہ تعالیٰ نے رزق نہیں دیا ہم کون ہیں ان کو رزق دینے والے اور ان کی ضرورتوں کو پورا کرنے والے۔ درحقیقت ان کا یہ جواب محض اپنی کنجوسی اور بخل پر پردہ ڈالنے کی ایک بھوندی کوشش ہے۔ اگر وہ ایسے ہی بقضا ہیں تو پھر کیوں کسب معاش میں وہ کسی ضابطے اور قانون کی پابندی کو بھی گراں سمجھتے ہیں۔ دولت کے لالچ میں تمام حدود کو روندتے چلے جاتے ہیں۔ انہیں بھلا ایسی بات کرنے کا کیسے حق پہنچتا ہے؟ ان کے دلوں میں اپنی دولت کی اتنی محبت ہے کہ وہ اس سے بچھڑنا نہیں چاہتا اور کسی محروم کی محرومی پر انہیں ذرا ترس نہیں آتا۔ کسی یتیم اور بیوہ کی حالت زار کو دیکھ کر ان کے دل میں رحم کا جذبہ نہیں ابھرتا۔

دوسری بات یہ ہے جس کا ذکر آیت 69 میں کیا گیا ہے بتا دیا کہ میرے نبی کریم (صلی اللہ علیہ وآلہ وسلم) کے علوم ومعارف کا ماخذ خیال آفرینی، مبالغہ آرائی اور شعراء کی کذب بیانی بلکہ ان کا سرچشمہ وہ کتاب مقدس ہے جو اللہ تعالیٰ کا کلام ہے جسے اس نے اپنے حبیب مکرم (صلی اللہ علیہ وآلہ وسلم) پر نازل فرمایا ہے تاکہ ہر اس شخص کو بروقت خبردار کر دے جس میں انسانیت کی زندگی کا کچھ نہ کچھ اثر موجود ہے۔