تعارف سورۃ النمل

اس سورت پاک کا نام النمل ہے جو آیت 18 میں مذکور ہے اس کی آیات کی تعداد ترانوے ہے۔ یہ ایک ہزار تین سو سترہ کلموں اور چار ہزار سات سو ننانوے حروف پر مشتمل ہے۔

زمانہ نزول

اس سورت کا تعلق بھی مکی زندگی کے درمیانی عہد سے ہے، جب کفار کی عداوت اپنے عروج پر تھی۔ غلط الزامات، طعن و تشنیع، بہتان طرازی کے طوفان برپا کرنے کے لساتھ ساتھ وہ اہل اسلام پر ظلم و ستم کی انتہا کر رہے تھے۔

مضامین

1۔ آغاز میں قرآن کریم کا تعارف کرا دیا گیا ہے کہ یہ اہل ایمان کے لیے مژدہ رحمت ہے۔ نیز یہ کسی انسان کی تصنیف نہیں جس میں قدم قدم پر زبانی اور مکانی حد بندیاں یا ماحول کے تقاضے اس کی ابدیت اور اس کی عالمگیر حیثیت کو مشکوک بنا رہے ہوں بلکہ یہ خداوند کائنات کا کلام ہے جو حکیم بھی ہے اور علیم بھی۔ جس کی حکمت اور علم پر نقص اور خامی سے بالا تر ہیں۔

2۔ یہاں اس حقیقت کو بھی واضح کیا گیا ہے کہ اسلام نے روز قیامت پر ایمان لانے کو کیوں ضروری قرار دیا۔ یہ عقیدہ انسانی زندگی کو سنوارنے میں ایک فیصلہ کن حیثیت رکھتا ہے۔ متعدد مثالیں دے کر اس حقیقت کو واضح کر دیا۔ پہلے فرعون (منکر قیامت) کا ذکر کیا گیا ہے کہ جب اسے ملک مصر کی محدود سلطنت ملی تو اس نے اپنے خالق کا ہی انکار کر دیا اور اپنی رعایا پر ظلم و ستم کی انتہا کر دی، اپنے اقتدار کو برقرار رکھنا ہی اس کی زندگی کا مقصد وحید بن گیا اور اس مقصد کے حصول کے لیے وہ ہر بہیمانہ اور وحشیانہ حرکت کرنے پر آمادہ ہوگیا۔ جب اس کے اپنے مقرر کیے ہوئے معیار کے مطابق حق واضح ہوگیا پھر بھی اس نے حق کو تسلیم کرنا اپنے لیے وجہ عار سمجھا۔ اہل حق کے بازو اور پاؤں کاٹ کر تختہ دار پر لٹکا دیا۔ اس کی ذات حجاب اکبر بن کر لوگوں کی بصیرت کے سامنے حائل ہوگئی۔ یہاں تک کہ وہ اپنے گناہوں کے بوجھ کے نیچے پس گیا۔ اور اپنے مظالم کے طوفان میں تنکوں کی طرح نہ کر فنا ہو گیا۔

اس کے بعد سیدنا سلیمان علیہ السلام کی سیرت بیان کی گئی ہے۔ آپ کی سلطنت کی حدیں فرعونی مملکت سے کہیں وسیع ہیں، ان کے حکم کے آگے جن و انس سرافگندہ ہیں۔ پرندے قطار اندر قطار اشارے کے منتظر ہیں ہوا کا وسیع کرہ بھی زیر نگیں کر دیا گیا ہے۔ ان کے درباریوں میں ایسے ایسے باکمال لوگ بھی ہیں جو ملک سبا سے ملکہ سبا کا تخت چشم زدن میں اٹھا کر قدموں میں لاکر رکھ دیتے ہیں۔ بایں ہمہ کمال و جلال کیا مجال کہ دماغ میں غرور و نخوت پیدا ہو۔

آپ غور فرمائیے! تاج و تخت، جاہ و جلال، رزو جواہر کے بھرے خزانے، حکمرانی کے وسیع اختیارات حضرت سلیمان علیہ السلام کو کیوں خدا فراموش نہ بنا سکے، ان کا دامن ظلم و تعدی کے ہر داغ سے کیوں پاک اور صاف رکھائی دے رہا ہے۔ یہ سیرچشمی کہ ملکہ سبا کے نادر اور انمول تحائف کو قبول کرنے سے صاف انکار کر دیا۔ اس کے زرنگار تخت کو اپنے سامنے دیکھ سراپا تشکر و امتنان بن گئے، اسے اپنی کسی خوبی سے منسوب نہیں کیا بلکہ برملا کہہ دیا ’ھذا من فضل ربی‘ یہ محض میرے رب کا فضل ہے۔ مزید برآں احساس ذمہ داری کا اظہار ان الفاظ سے کیا ’لیبلونی اء شکر ام اکفر‘ کہ میرا رب ان احسانات سے مجھے آزمانا چاہتا ہے کہ کیا میں شکر کرتا ہوں یا ناشکری۔ ان ساری خوبیوں کا سرچشمہ یوم قیامت پر پختہ یقین ہے۔ وہ پستی اور یہ بلندی جس عقیدہ کا نتیجہ ہو کیا انسان کی فلاح و کامرانی کے لیے اس کی اہمیت کا انکار کیا جا سکتا ہے؟

قوم ثمود اور قوم لوط کے حالات بیان کرکے اس حقیقت کو بھی واضح کر دیا کہ جس سوسائٹی میں آخرت پر ایمان نہیں ہوگا۔ وہاں انفرادی اور اجتماعی کردار ان غلاظتوں سے آلودہ ہو جاتا ہے جن کے قصور سے ہی انسان کا دم گھٹنے لگتا ہے۔ حق پذیری کی صلاحیت اس حد تک مفلوج ہوجاتی ہے کہ اگر کوئی خیر اندیش محض ان کی خیرخواہی کے لیے انہیں ان رذالتوں سے باز آنے کی تلقین کرتا ہے تو وہ آپے سے باہر ہو جاتے ہیں۔ کبھی وہ انہیں شہر بدر کرنے کی دھمکی دیتے ہیں۔ ’اخرجوا آل لوط من قویتکم انھم اناس یتطہرون‘ (آیت: 58) اور کبھی شبخون مار کر اس کو اور اس کے اہل و عیال کو تہ تیغ کرنے کی سازش کرتے ہیں۔ انہیں اپنے معاشرہ پر پورا بھروسا ہوتا ہے کہ جب وہ صرف زبانی اپنی صفائی پیش کریں گے تو سب مطمئن ہو جائیں گے اور ان سے باز پرس کی زحمت تک گوارا نہیں کی جائے گی۔ ’تقاسموا باللہ لنبیتنہ واہلہ ثم لنقولن لولیہ ما شھدنا ذلک اہلہ وانا لصدقون‘ (آیت: 49)

قرآن کریم کو یہ گوارا نہیں ہے کہ اس کے دامن عاطفت میں پروان چڑھنے والی امت کا دامن ایسے بدنما داغوں سے آلودہ ہو۔

3۔ مکہ کے باشندے تجارت پیشہ تھے ان کا ذہن کاروباری قسم کا تھا جو سودوزیاں کی گتھلیاں ہی سلجھاتا رہتا۔ دنیاوی لحاظ سے زیرک و دانا ہونے کے باوجود وہ پتھر اور لکڑی کے گھڑے ہوئے مجسموں کو خدا یقین کرتے۔ پانچویں رکوع میں شرک کے بطلان پر ایسے مسکت اور دندان شکن دلائل پیش کیے گئے جن کا ان کے پاس کوئی جواب نہ تھا۔ اور شرک میں مبتلا ہونے والی کسی قوم کے پاس آج بھی ان کا جواب نہیں۔

4۔ آخر میں اللہ تعالیٰ اپنے محبوب کریم (صلی اللہ علیہ وآلہ وسلم) کو یہ فرما کر تسلی دے رہا ہے کہ ان کفار و مشرکین میں حق پذیری کی استعداد ہی نہیں۔ اگر اندھا سورج کی روشنی کو نہیں دیکھ سکتا تو یہ اس کی بدنصیبی ہے۔ نہ سورج کی روشنی کا قصور ہے اور نہ اس کی فیاضی میں کوئی کمی ہے۔

5۔ سردار ان مکہ کی اس غلط فہمی کا بھی ازالہ کر دیا جس غلط فہمی میں آج بھی کئی رؤساء اور نامور لوگ مبتلا ہیں۔ وہ یہ سمجھتے تھے کہ اگر ہم نے اسلام قبول کر لیا تو یہ ہمارا خدا و رسول پر بڑا احسان ہوگا۔ اور اگر ہم نے اسلام کی دعوت کو رد کر دیا تو اس سے خدا کی خدائی میں کوئی کمی آجائے گی یا آفتاب نبوت کی ضیا پاشیاں مدھم پڑجائیں گی۔ سب کو فرما دیا: ’فمن اھتدی فانما یھتدی لنفسہ‘ (آیت: 92) یعنی یہ تمہاری خوش نصیبی ہے۔ اگر تم اس دعوت کو قبول کر لو تو تمہارے دونوں جہاں سنور جائیں گے اور اگر تم نے ایسا نہ کیا تو یہ تمہاری اپنی بد نصیبی ہوگی۔