تعارف سورۃ الشعراء

اس سورہ کا نام الشعراء ہے۔ کیونکہ اس کی آیت 224 میں یہ لفظ مذکور ہے اس لیے اسی لفظ کو اس سورہ کا عنوان مقرر فرمایا گیا ہے۔ اس سورت میں گیارہ رکوع اور دو سو اٹھائیس آیتیں ہیں۔ یہ ایک ہزار دو سو اُناسی کلمات اور پانچ ہزار پانچ سو چالیس حروف پر مشتمل ہے۔

نزول

یہ سورت مکہ مکرمہ میں نازل ہوئی۔ حضرت ابن عباس کے ایک قول سے پتہ چلتا ہے کہ سورہ طہٰ کے بعد سورہ الواقعہ نازل ہوئی اور اس کے بعد الشعراء کا نزول ہوا۔ بعض علماء کا خیال ہے کہ اس سورہ کی چار آخری آیتیں جو ’والشعرا یتبعھم‘ سے شروع ہوتی ہیں وہ مدینہ طیبہ میں نازل ہوئیں۔

مضامین

نبی رؤف رحیم (صلی اللہ علیہ وآلہ وسلم) شب و روز تبلیغ اسلام میں مصروف ہیں۔ دن بھر اپنی قوم کو سمجھاتے ہیں۔ ان کو شکوک کا ازالہ اور ان کے اعتراضات کا جواب دیتے ہیں۔ قرآن کریم کی آیات پڑھ پڑھ کر انہیں سناتے ہیں۔ جب رات کی تاریکی پھیل جاتی ہے اور ہر طرف سناٹا چھا جاتا ہے تو یہ رسول مکرم بارگاہ الٰہی میں حاضر ہوتے ہیں۔ کبھی دست بستہ کھڑے ہوکر اور کبھی سربسجود ہوکر بڑے سوزوگداز سے اپنی قوم کی ہدایت کے لیے التجائیں کرتے ہیں۔ جب زبان مصروف دعا ہوتی ہے تو آنکھوں سے آنسو ٹپ ٹپ گرنے لگتے ہیں۔ یوں معلوم ہوتا ہے کہ آمین آمین کہہ رہے ہیں۔

یوں دن بسر ہو رہے ہیں، یوں راتیں گزر رہی ہیں۔ لیکن کفار کی ہٹ دھرمی اور بہتان تراشی میں اضافہ ہی ہوتا چلا جا رہا ہے، جس سے طبیعت اداس رہتی ہے اور خاطر عاطر پر غم کے بادل چھائے رہتے ہیں۔ اللہ تعالیٰ تسلی دیتے ہوئے فرماتے ہیں۔ ’’اے مصطفی (صلی اللہ علیہ وآلہ وسلم)! تم یوں رنجیدہ خاطر اور ملول کیوں رہتے ہو‘ آپ نے اپنا فرض ادا کر دیا، یہ ان کی عقل کا قصور ہے کہ وہ حق کو قبول نہیں کر رہی۔ تمہارا شفیق دل تو یہی چاہتا ہے کہ ان میں سے کوئی بھی گمراہ نہ رہے، سب ہدایت یافتہ ہو جائیں اور ایسا کرنا ہمارے لیے کوئی مشکل نہیں۔ ہم انہیں ایسی نشانی دکھانے پر قادر ہیں جن کو دیکھ کر ان کی گردنیں جھک جائیں اور اسلام قبول کرنے کے سوا ان کے لیے کوئی چارہ کار نہ رہے۔ لیکن جبرو اکراہ سے انہیں راہ حق پر گامزن کرنا ہماری حکمت کے بھی خلاف ہے اور شرف انسانی بھی اس کا تقاضا نہیں کرتا۔

اس کے بعد سات جلیل القدر انبیاء اور ان کی قوموں کے حالات کو بڑی شرح و بسط سے بیان فرمایا کہ حضور (صلی اللہ علیہ وآلہ وسلم) کو تسلی ہو اور کفار و مشرکین ان نافرمان قوموں کے دردناک انجام سے باخبر ہو کر اپنی بروقت اصلاح کر لیں۔

آخری رکوع میں بتا دیا کہ جس قرآن کو یہ کلام الٰہی ماننے سے انکار کر رہے ہیں یہ وہ کلام ہے جسے رب العلمین نے نازل کیا ہے۔ اسے لے کر آنے والا روح الامین ہے۔ جس کے قلب پاک پر یہ نازل ہوا وہ نذیر للعالمین ہے۔ اس کے ذکر خیر سے پہلے انبیاء کرام کی کتابیں بھری پڑی ہیں۔ اس کے متعلق یہ کہنا کہ یہ کسی شیطان کا کلام ہے یا کسی شاعر کا طبع زاد ہے انتہائی حماقت اور نادانی ہے۔ کہاں شیاطین کی لایعنی باتیں اور کہاں اس کتاب مقدس کا اعجاز بیان اور حسن و جمال، کچھ سوچو، ان میں کوئی ادنی سی مناسبت بھی ہے۔