تعارف سورۃ الشوریٰ

آیت نمبر 38 میں شوریٰ کا لفظ ہے۔ یہی اس سورہ کا نام ہے۔ اس سورہ میں پانچ رکوع، ترپن آیتیں، آٹھ سو ساٹھ کلمات ور تین ہزار پانچ سو اٹھاسی حروف ہیں۔

زمانہ نزول

سورہ مومن سے الاحقاف تک یہ سات سورتیں ہیں جن کا آغاز حم سے ہوا۔ ان سب کا زمانہ نزول قریب قریب ہے۔ مضامین کی یکسانیت اس کی تائید کرتی ہے۔ اس کے مطالعہ سے پتہ چلتاہے کہ یہ سورہ اس وقت نال ہوئی جبکہ کفار کا عناد اور مخالفت اپنی انتہا کو پہنچ چکی تھی۔

مضامین

حضور سرور عالم (صلی اللہ علیہ وآلہ وسلم) نے جب نبوت کا دعویٰ کیا تو اہل مکہ سراپا حیرت و تعجب بن کر رہ گئے۔ انسان جس کا دامن ہر طرح کی آلائشوں سے آلودہ ہے، ان میں سے کسی کو منصب نبوت پر فائز کر دیا گیا ہو، یہ کیسے ہو سکتا ہے؟ ان کی اس حیرت کا ازالہ یہ کہہ کر کر دیا کہ نوع انسانی میں ظاہر ہونے والے اگر یہ پہلے نبی ہوتے، تو تم اظہار تعجب میں حق بجانب تھے، لیکن یہ سلسلہ نبوت تو آدم علیہ السلام سے شروع ہے۔ ان میں سے کسی نبی کی نبوت پر تمہیں اعتراض نہیں۔ اعتراض ہے تو اس نبی برحق پر جو تمہاری ڈوبتی ہوئی کشتی کو ساحل پر پہنچانے کے لئے آیا ہے۔

اللہ تعالیٰ کے نبی کا انکار، اللہ تعالیٰ کی توحید کا انکار اور بےشمار معبودوں کی پوجا پاٹ کا جو گھناؤنا کاروبار تم نے شرو ع کر رکھا ہے، اس کا تقاضا تو یہ تھا کہ آسمان پھٹ جاتا، نظام عالم درہم برہم ہوجاتا اور تمہارا نام ونشان بھی باقی نہ رہتا، لیکن اللہ تعالیٰ غفور رحیم ہے۔ وہ تمہیں فورا ہلاک نہیں کر دیتا، بلکہ مہلت دیتا ہے تاکہ تم غور وفکر کر سکو۔

یہ بھی بتا دیا کہ اگر اللہ تعالیٰ چاہتا تو فرشتوں کی طرح سارے انسان بھی ذکر وفکر، عبادت وطاعت میں سرگرم رہتے اور کوئی بھی سر موانحراف نہ کرنا، لیکن اس کی حکمت کا تقاضا تھا کہ انسان کو اختیار وارادہ کی نعمت سے نوازا جائے تاکہ ان بلندیوں کی طرف جانے والا راستہ اس کے لئے ہموار ہوجائے جہاں کسی اور مخلوق کی رسائی نہیں۔ جو لوگ اپنی مرضی سے عقیدہ اور عمل کی گمراہی اختیار کرتے ہیں ان کو اپنے کئے کی سزا بھگتنی پڑے گی۔

اس حقیقت سے بھی پردہ اٹھا دیا کہ جس طرح وہ تمہارا خالق اور مالک ہے، اسی طرح اسی کو یہ زیبا ہے کہ وہ تمہارے لئے ایک ایسا نظام حیات تجویز کرے جس کو اپنا کر تم دارین کی سعادتوں سے بہرہ ور ہو سکو۔ جس طرح کسی غیر کو خالق نہیں مانا جا سکتا اسی طرح اس کے بغیر اس کی مخلوق کے لئے کسی کو ضابطہ حیات مقرر کرنے کا اختیار بھی نہیں دیا جا سکتا۔

تمام انبیاء ابتدا سے ایک ہی دین کی دعوت دیتے آئے ہیں۔ انہوں نے انسانی معاشرے میں افتراق وانتشار کی کبھی تخم ریزی نہیں کی۔ البتہ ان کے بعد آنے والے اہل غرض نے اپنی سرداری کا سکہ جمانے کے لئے باہمی تفرقہ بازی کا آغاز کیا۔ آیت 15 خصوصی توجہ کی مستحق ہے جس میں دس احکام دئیے گئے ہیں۔

نبوت میرا کاروبار نہیں، اس کے ذریعے سے میں دولت کمانا نہیں چاہتا۔ میں اپنی اس دلسوزی کا تم سے کوئی اجر، کوئی معاوضہ طلب نہیں کرتا۔ ہاں میرا ایک ہی مطالبہ ہے کہ تم باہم شیرو شکر ہوجاؤ، ایک دوسرے سے محبت کرنے لگو تاکہ تمہاری یہ دنیوی زندگی ہر قسم کی بےچینیوں اور تکالیف سے محفوظ ہوجائے اور تم یکسوئی کے ساتھ اپنے رب کی عبادت اور اس کی مخلوق انجام دے سکو۔

رزق کی تقسیم وہ اپنے حکیمانہ انداز سے کرتا ہے۔ اگر ہر ایک کو رزق فراواں مل جائے تو لوگ سرکش اور باغی ہو جائیں۔ اہل ایمان کی متعدد خوبیاں پہلے بیان کیں۔ ان میں سے ایک یہ کو بی بھی بیان کی کہ وہ اپنے گھریلو، معاشی اور سیاسی تمام معاملات باہمی مشورے سے طے کرتے ہیں۔ اسلامی ریاست کا یہ وہ اصول ہے جس اگر عمل کیا جائے، تو اسلامی سوسائٹی میں آمریت مطلق العنانی اور ڈکٹیٹر شپ کا کوئی خطرہ نہیں رہتا۔

ان کی خوبیوں میں سے اس خوبی کو بطور خاص ذکر کیا (آیت نمبر 39) کہ مسلمان بےغیرت اور بےحمیت نہیں ہوتا کہ مخالف اسے جوتیاں مارتا رہے، اس پر ظلم وتشدد روا رکھے اور یہ سر جھکائے خاموشی سے اس تذلیل کو برداشت کرتا رہے، بلکہ وہ انتقام کے لئے اٹھ کھڑ ا ہوتا ہے اور جب تک بدلہ نہ لے لے، اسے چین نہیں آتا۔ دشمن پر قابو پا لینے کے بعد اس کو معاف کر دینا بھی مومن کا شیوہ ہے۔ اللہ تعالیٰ اپنے نبی کو جن مختلف طریقوں سے وحی پہنچاتا ہے ان کا ذکر بھی کر دیا تاکہ کسی کو غلط فہمی نہ رہے۔