تعارف سورۃ محمد (صلی اللہ علیہ وآلہ وسلم)

اس سورہ مبارکہ کے دو مشہور نام ہیں: سورۃ محمد (صلی اللہ علیہ وآلہ وسلم) اور سورۃ القتال۔ اس سورت میں چار رکوع، اڑتیس آیتیں پانچ سو اٹھاون کلمات اور دو ہزار چار سو پچھتر حروف ہیں۔ دوسری آیت میں یہ نام نامی مذکور ہے۔ یہی اس سورت کا نام بھی مقرر کیا گیا، کیونکہ انسانیت کو جن دو حصوں، مومن اور کافر میں تقسیم کیا جا رہا ہے، اس کا دارومدار اس کتاب پر ایمان لانے اور ایمان نہ لانے پر ہے جو اللہ تعالیٰ کے رسول محمد مصطفی (صلی اللہ علیہ وآلہ وسلم) پر نازل ہوئی۔ نیز اس سورت کی آیت نمبر 20 میں ’’قتال ‘‘ کا کلمہ بھی موجود ہے۔ اس کو اس سورت کا عنوان بنایا گیا۔ اس سورت میں اسلام اور کفر کے مابین جنگ کا تذکرہ اور اس کے احکام بیان کیے گئے ہیں۔

زمانہ نزول

جب مکہ کی سرزمین کفار کے ظلم و ستم کے باعث اہل اسلام کے لیے تنگ ہوگئی تو وہ اپنی دولت ایمان کو ان کی دست بردسے بچانے کے لیے اپنے گھر بار، زمینیں اور کاروبار سب چھوڑ چھاڑ کر مدینہ طیبہ پہنچ گئے۔ سب کچھ ان سے چھین گیا تھا، لیکن وہ خوش تھے کہ دامن مصطفی تو ان کے ہاتھوں سے نہیں چھوٹا۔ ان کا خیال تھا کہ اب وہ یہاں پوری دلجمعی کے ساتھ اپنے رب کے ذکر اور اس کی عبادت میں اپنے شب و روز بسر کریں گے۔ دعوت دین کا جو کام مکہ میں پوری طرح نہیں ہو سکا، یثرب کے پر امن ماحول میں بآسانی تکمیل پذیر ہوگا، لیکن اہل مکہ نے انہیں یہاں بھی آرام کا سانس نہ لینے دیا۔ ان کی مختلف ٹولیاں آتیں، میدنہ کے گردونواح میں لوٹ مار مچاتیں، اونٹ، بھیڑ بکریاں ہانک کر لے جائیں۔ اکادکا مسلمان ہتھے چڑھ جاتا، تو اس کو بھی قتل کرنے سے گریز نہ کرئیں۔

غریب الوطن مسلمانوں کے لیے انہوں نے ایسے حالات پیدا کر دیے کہ یا تو مسلمان بےحمیتی کا مظاہرہ کریں! یہاں تک کہ مکہ سے اٹھنے والی آندھیاں کسی روز اسلام کی شمع ہی کو گل کر دیں اور ان کو بھی صفحہ ہستی سے مٹا دیں اور اگر وہ اس دین، جو فرزند وزن، جان و وطن بھی زیادہ عزیز ہے، اس کے چراغ کو بجھتا نہیں دیکھ سکتے اور اپنی اہمیت کا بھی احساس ہے کہ بزم عالم کو نور ہدایت سے منور کرنے کے لئے ان کا زندہ رہنا، بلکہ شان و شوکت اور قوت وسطوت کے ساتھ زندہ رہنا ضروری ہے تو پھر انہیں سربکف میدان جنگ میں آنا ہوگا۔ انہوں نے تیرہ سال صبر کیا۔ بڑے ضبط و تحمل کے ساتھ مظالم برداشت کیے۔ اس بارے میں اب مزید صبر، خود کشی کے مترادف ہے، لیکن وہ تو اللہ تعالیٰ کے بندے اور اس کے رسول کے حکم کے پابند تھے۔ ازخود تو کچھ نہیں کر سکتے تھے، چنانچہ سورہ الحج کی آیت نمبر 3٩ میں کفار سے جنگ کرنے کی اجازت مرحمت ہوئی۔ سورہ البقرہ کی آیت نمبر 190 نے جہاد کا حکم دیا۔ ’وقاتلوا فی سبیل الله الذین یقاتلونکم ولا تعتد وان الله لایحب المعتدین‘

اللہ تعالیٰ کے راستہ میں ان لوگوں سے جنگ کرو جو تم سے جنگ کرتے ہیں۔ حد سے تجاوز نہ کرو۔ بےشک اللہ تعالیٰ حد دے بڑھنے والوں کو دوست نہیں رکھتا۔

حالات بےشک اس امر کا تقاضا کر رہے تھے کہ کفار کے ساتھ پنجہ آزمائی کی جائے، لیکن دیکھنا یہ ہے کہ کیا مسلمان اس پوزیشن میں تھے کہ وہ کفار کے خلاف مسلح جدوجہد کا آغاز کر سکیں۔

افرادی طاقت بہت قلیل تھی پہلے معرکے میں صرف تین سو تیرہ مجاہد شریک ہو سکے تھے۔ مدینہ کی چھوٹی سی بستی جس کے وسائل بڑے محدود تھے، کیا جنگ کی ضروریات، اسلحہ، خوراک اور سواری کے جانور مہیا کر سکتی تھی؟ کہ مدینہ کے مقابلے میں کئی گنا بڑا شہر تھا۔ وہاں کے اکثر لوگ تجارت پیشہ تھے۔ نہ دولت کی وہاں کمی تھی، نہ وسائل کی قلت۔ افرادی تعداد بھی مسلمانوں سے کئی گنا زیادہ تھی، لیکن ان ناسازگار حالات کے باوجود مسلمانوں کے لیے فیصلہ کن گھڑی آپہنچی تھی۔ یہ حالات تھے جب یہ سورہ مبارکہ نازل ہوئی۔

مضامین

اس سورت کے نزول سے تذبذب کی کیفیت ختم ہوگئی۔ کفار کی تعداد کی کثرت، وسائل کی فراوانی کے باعث مسلمانوں کو جو خدشہ تھا، وہ دور ہوگیا، ابتدائی آیتوں ہی میں واضح طور پر بتا دیا کہ کفار جو خود بھی گمراہ ہیں وہ نور حق کو پھیلنے سے بھی روک رہے ہیں، اسلام اور پیغمبر اسلام کے خلاف ان کی جدوجہد کبھی کامیاب نہ ہوگی۔ ان کی ساری محنت اور کوشش خاک میں مل جائے گی۔ اہل ایمان کی کمزوریوں کو دور کر دیا جائے گا اور کامیابی کا تاج ان کے سرپر سجایا جائے گا۔

یہ فرمانے کے بعد مسلمانوں کو حکم دیا کہ میدان جنگ میں وہ کفار کے پرخچے اڑا دیں۔ اسیران جنگ کے ساتھ جو برتاؤ انہوں نے کرنا ہے، اس کے اصول بتا دیے۔ ساتھ ہی واضح کر دیا کہ میدان جہاد میں جو مسلمان قتل ہوگا، اسے شہادت کی خلعت فاخرہ سے نوازا جائے گا۔ اسلام کے جس گلشن کی آبیاری وہ اپنے خون سے کریں گے، وہ سدا شاداب و سرسبز رہے گا اور ان کی قربانیوں کے طفیل آنے والی نسلیں بھی نور حق سے اپنے دلوں کو منور کرتی رہیں گی۔

اہل ایمان کو صاف لفظوں میں بتا دیا کہ اگر تم نے سچے دل سے اپنی پوری قوت اور توانائیوں کو بروئے کار لاتے ہوئے دین اسلام کی مدد کی، تو کفر کے تندوتیز ریلے کے سامنے اللہ تعالیٰ تمہیں تنہا نہیں چھوڑے گا، بلکہ اس کی نصرت تمہاری پشت پناہی کرے گی۔ آسمان کے فرشتے تمہارے دوش بدوش کفار سے نبردآزما ہوں گے اور اس کی تائید تمہیں نازل حالات میں بھی ثابت قدم رکھے گی۔ کفار کی ظاہری سج دھج کو دیکھ کر مت گھبراؤ، کفر کا انجام تباہی اور نامرادی ہے۔ اس کی وجہ یہ ہے کہ تم اگرچہ کمزور و بےنوا ہو، لیکن تمہارا مدد گار اللہ تعالیٰ ہے جو بڑی قوت و طاقت کا مالک ہے، کفار کو تائید الٰہی نصیب نہیں اور یہ کھلی ہوئی حقیقت ہے کہ کامیاب وہی ہوتا ہے جس کی مدد خدا کرتا ہے۔

اس ضمن میں منافقین کے ایمان کا حال بھی آشکار ا کر دیا جو جہاد کے حکم کے نزول سے پہلے بڑی ڈینگیں مارا کرتے تھے، اپنی بہادری اور جاں نثاری کے لمبے چوڑے دعوے کیا کرتے تھے۔ کہتے ہم بڑی بےتابی سے اس گھڑی کا انتظار کر رہے ہیں جب ہمیں کفار کے ساتھ جنگ کرنے کا اذن ملے گا۔ اس کے بعد دنیا دیکھے گی کہ ہم کس طرح شمع اسلام پر پروانوں کی طرح جان قربان کرتے ہیں۔ اب جہاد کے نقارے پر چوٹ لگ گئی ہے، ان کی حالت قابل دید ہے۔ یوں پتہ چلتا ہے جیسے موت کی غشی طاری ہوگئی ہو، آنکھیں پتھراگئی ہیں، چہرے کی رنگت زرد ہوگئی ہے۔ کیا اللہ تعالیٰ پر سچے دل سے ایمان لانے والوں کی آزمائش کی گھڑیوں میں یہ حالت ہوا کرتی ہے۔

اسلام کے جانباز اور غیور سپاہیوں کو آیت نمبر 35 میں ایک خصوصی حکم دیا کہ جنگ میں حالات کتنے ہی روح فرسا کیوں نہ ہوں، کمزوری مت دکھاؤ، صلح کی درخواست مت کرو۔ اگر اتم نے کمزوری کا مظاہرہ کیا یا صلح کے لئے اپنی بےتابی کا اظہار کیا، تو دشمن جری ہو جائے گا۔ تمہاری اس پیش کش کو کمزوری اور بزدلی پر محمول کرے گا۔ تم خوب جانتے ہو کہ اس کا انجام کتنا خطرناک ہوتا ہے۔ سن لو! تم ہی سربلند ہوگے، کیونکہ خود اللہ تعالیٰ تمہارے ساتھ ہے۔ تمہاری محنت اور کوشش کو وہ ضائع نہیں ہونے دے گا۔

آخر میں مالی جہاد کی طرف متوجہ کیا۔ اگر اسلام کو تمہارے مال کی ضرورت پڑے تو بڑی دریا دلی سے اس کو پیش کرو۔ اگر تم نے مال خرچ کرنے میں بخل سے کام لیا، تو اس سے اللہ تعالیٰ کو تو کوئی نقصان نہیں پہنچے گا، البتہ تمہارا ستیاناس ہو جائے گا اور تمہاری جگہ یہ عزت کسی اور کو بخش دی جائے گی۔ پھر تم ہاتھ ملتے رہ جاؤ گے۔ اللہ تعالیٰ کے دین کا علم کو لہراتا ہی رہے گا۔ اگر کوئی قوم اس کو اٹھانا بوجھ سمجھے گی، تو دوسری قوم شوق سے یہ خدمت بجا لانے کے لیے اپنے آپ کو پیش کر دے گی۔