تعارف سورۃ البقرۃ

رسول کریم صلی اللہ علیہ وآلہ وسلم جب ہجرت کر کے مدینہ منورہ میں تشریف فرما ہوئے تو یہ سورہ نازل ہوئی۔ یہاں اسلامی دعوت کے جو مخاطب تھے وہ مکہ کے باشندوں سے مذہبی، ذہنی اور عمرانی اعتبار سے مختلف تھے۔ خود دعوت اسلامی جس مرحلہ میں داخل ہورہی تھی اس کی ضروریات اور تقاضے بھی بالکل نئے تھے۔ اس لیے ہمیں اس سورہ میں مکی سورتوں کے اعتبار سے بین اور صاف فرق معلوم ہوتا ہے۔ اس سورہ میں چالیس رکوع، دو سو چھیاسی آیتیں، چھ ہزار اکتیس الفاظ اور اس کے حروف کی تعداد بیس ہزار ہے۔

اہل مکہ مشرک و بت پرست تھے۔ وحی، نبوت اور قیامت وغیرہ کا کوئی تصور ان کے ذہن میں نہ تھا۔ قتل وغارت اور لوٹ مار میں وہ فخر اور لذت محسوس کرتے تھے۔ اس لیے مکہ میں جو سورتیں نازل ہوئیں ان میں انہی عقائدِ باطلہ اور اعمال فاسدہ کی صلاح پیش نظر تھی۔ یثرب کے اصلی باشندے گو انصار تھے لیکن قوت واقتدار یہود کے ہاتھ میں تھا۔ انصار مذہبی اور ذہنی طور پر یہود سے بہت متاثر تھے۔ یہود کیونکہ اہل کتاب تھے اس لیے وحی، رسالت، جنت، دوزخ وغیرہ پر ان کا ایمان تھا‘ لیکن بدقسمتی سے وہ اپنی قومی برتری کے نشہ میں اس حد تک مست تھے کہ وہ یہ تصور بھی نہیں کرسکتے تھے کہ ان کے علاوہ نبوت کسی اور کو بھی عطا کی جاسکتی ہے۔ عملی اعتبار سے ان کی پستی کی حالت یہ تھی کہ وہ معمولی سے دنیاوی فائدہ کے لیے تورات کی واضح آیتوں کا انکار بلکہ ان میں تحریف کرنے میں جھجک محسوس نہ کرتے۔ تجارت کی منڈیوں پر ان کا قبضہ تھا۔ یثرب کی زخیز زمینیں اور شاداب باغات ان کی ملکیت میں آچکے تھے۔ علم و دانش میں انصار کو ان سے کوئی نسبت ہی نہ تھی۔ آئینی طور پر نہ سہی لیکن عملی طور پر حکومت یہود کی تھی۔

یہ حالات تھے جب رحمتِ دوعالم صلی اللہ تعالی علیہ وآلہ وسلم نے مدینہ میں قدم رنجہ فرمایا اور یہود و انصار کو اسلام کی دعوت دی۔ یہود تو تلملا گئے، انہیں اپںی عظمت و جلال کے محلات مسمار ہوتے دکھائی دینے لگے۔ کہاں ان کی خود بینی اور خود پرستی۔۔۔ اور کہاں ایک نئے دین کے قول اور ایک نئے رسول کی اطاعت کی دعوت۔۔۔ یہود کیسے اس دین کو قبول کرلیتے؟ ان کے سامنے تو رکاوٹوں کے کئی پہاڑ تھے، ایک سے ایک بلند اور ایک سے ایک کٹھن۔ اب قرآن کا کام یہ تھا کہ ان رکاوٹوں کودور کرے اور ان فلک بوس چوٹیوں کو پیوند خاک کرے۔ اسی لیے مدینہ طیبہ میں جوپہلی سورت نازل ہوئی اس کے کئی رکوع یہود کی اصلاح کے لیے وقف ہیں۔

دوسری نئی صورت حال جس سے اسلام کو واسطہ پڑا وہ یہ تھی کہ انصار کی اکثریت کے اسلام قبول کرلینے کے بعد اور مکہ سے مسلمانوں کی ہجرت کے بعد اسلام متفرق اور منتشر افراد کا مذہب نہیں رہا تھا بلکہ جماعت اور ایک قوم کا دین بن گیا تھا اور قوم بھی ایسی جس میں ترقی اور برتری کی بےپناہ صلاحیتیں بیدار ہورہی تھیں۔ اب ضرورت اس بات کی تھی کہ ایسے مضبوط خطوط پر ان کی تنظیم کردی جائے کہ کثرت وحدت میں کھوجائے اور کوئی گوشہ ایسا نہ رہے جس میں بدنظمی اپنے قدم جماسکے۔ اس لیے اب ضرورت تھی ایسے قوانین کی جوان کے دیوانی اور فوجداری مقدمات کا فیصلہ کرے، ایسے اقتصادی نظام کی جوعدل و انصاف پرمبنی اور معاشی خوشحالی کا ضامن ہو، سیرت و اخلاق کے ایسے قالب کی جس میں ملت کا ہر فرد اپنے کردار کو ڈھالے تاکہ اس کی خوبیاں اور نیکیاں اجتماعی رنگ اختیار کرلیں، اسے ضرورت تھی ایک ایسے آئین کی جس پر ان کی عالمگیر سیاست کی بنیاد رکھی جائے۔ ان اہم ضروریات کے پیش نظر اس سورت میں قانون، آئین اور سیاست کے بیشتر قواعد و ضوابط بیان فرما دیئے گئے ہیں۔

ایک اور چیز بھی غور طلب ہے؛ مکی زندگی میں تو مسلمان کفار کے ظلم و ستم سہتے اور چپ ہو جاتے۔ مدینہ طیبہ میں جب مسلمان اکٹھے ہوگئے تو کفار نے اپنی اجتماعی طاقت سے اسلام کو مٹانے کا عظم کر لیا۔ ادھر اللہ تعالٰی نے بھی اپنے بندوں کو کفر سے ٹکر لینے کی اجازت دے دی اور انہیں یہ بتایا کہ اپنی بےکسی اور مخالف کی قوت و سطوت سے مت گھبراؤ، فتحیاب تو وہی ہوتا ہے جس کے شامل حال میری تائید اور نصرت ہوتی ہے، یقیناً وہ تم ہی غالب و منصور ہو۔

ملت اسلامیہ کے لیے قبلہ کا تعین بھی فرما دیا تاکہ ان کی توجہات کا ظاہری مرکز بھی ایک ہی ہو جائے اور ان کی عبادتیں انتشار کا شکار ہو کر اپنا جماعتی حسن نہ کھو دیں۔ اگر ان امور کو ملحوظ خاطر رکھتے ہوئے آپ سورہ بقرۃ کا مطالعہ کریں گے تو زیادہ مفید ثابت ہوگا۔