تعارف سورۃ النور

اس سورہ پاک کا نام ’النور‘ ہے جس اس سورت کی آیت 35 ’اللہ نور السموت والارض‘ سے ماخوذ ہے۔ اس کی آیات کی تعداد 64 ہے۔

نزول

اس بات پر تو اتفاق ہے کہ سانحہ افک غزوہ بنی مصطلق کے بعد پیش آیا اور اس سورہ کا نزول اس واقعہ کے بعد ہوا، لیکن اس میں اختلاف ہے کہ غزوہ بنی مصطلق کس سن میں ہوا۔ نیز اس امر میں بھی اختلاف ہے کہ غزوہ بنی مصطلق غزوہ خندق سے پہلے ہوا یا بعد میں۔ مؤرخین کے مختلف اقوال ہیں۔ لیکن اکثریت کہ رائے یہ ہے کہ غزوہ خندق شوال سنہ 5ھ میں ہوا اور غزوہ بنی مصطلق سعبان سنہ 6ھ میں ہوا۔ اگرچہ غزوہ خندق کے متعلق ایک روایت یہ بھی ہے کہ وہ سنہ 4ھ میں ہوا۔ ابن خلدون نے اسی کو اصح کہا ہے، لیکن ابن اثیر، ابن کثیر رحمۃ اللہ علیہ اور ابن قتیم رحمۃ اللہ علیہ نے شوال سنہ 5ھ میں ہی غزوہ خندق کے واقع ہونے کو ترجیح دی ہے۔ ابن خلدون نے اس اعتراض کا جواب بھی دیا ہے کہ اگر غزوہ بنی مصطلق غزوہ خندق کے بعد ہوتو پھر حدیث افک میں سعد بن عبادہ اور سعد بن معاذ کے درمیان جو گفتگو روایات میں مذکور ہے وہ درست نہیں ہوگی۔ کیونکہ سعد بن معاذ کا انتقال غزوہ خندق کے فوراً بعد ہوگیا تھا۔ اس شبہ کا ازالہ ابن خلدون نے یہ کہہ کر کر دیا کہ سعد (رض) بن عبادہ کی سعد (رض) بن معاذ سے گفتگو نہیں ہوئی تھی بلکہ اسید بن حصین سے گفتگو ہوئی تھی اور جن روایات میں سعد بن معاذ کا نام ہے یہ راوی کا وہم ہے ’وھو وھم ینبغی التئبیہ علیہ انما المقاول لسعد بن عبادۃ انما ھو اسید بن حصین‘۔

مضامین

1۔ خانگی کے احکام: گھر معاشرہ کی خشت اول ہے۔ گھر کے ماحول کو پاکیزہ اور مسرت بخش بنائے بغیر ایک پاکیزہ اور صحت مند معاشرہ کی تشکیل کا خواب کبھی شرمندہ تعبیر نہیں ہوسکتا۔ اسلام جس کا مقصد ہی انسان کے سر پر تاج کرامت رکھنا اور اس کے دامن کو سچی مسرتوں کے گلہائے رنگ رنگ سے بھر دینا ہے، وہ معاشرہ کی اس بنیادی وحدت کو کیونکرنظر انداز کر سکتا ہے۔

ذاتی راحت و آرام، انفرادی منفعتوں اور وقتی مصلحتوں کی سنہری زنجیریں انسانی عقل و فہم کو جس آسانی سے اپنا صید زبوں بنا لیا کرتی ہیں یہ تاریخ انسانی کا ایک خونچکاں المیہ ہے۔ ان کی قربان گاہوں پر ہی معصوم جانیں، بہار آفریں قابلیتیں اور زندگی سے بھرپور جوانیاں بری سرد مہری اور انتہائی بےدردی سے ذبح کی جاتی رہیں۔ اس لیے گھر کو مستحکم بنایادوں پر قائم کرنے کی ذمہ داری صرف عقل کے سپرد نہیں کی جاسکتی۔ اس لیے ضروری تھا کہ قرآن کی فروزاں کی ہوئی قندیل سے ہی زندگی کے اس اہم گوشہ کو منور کیا جاتا۔ ایک اچھی چیز کی خواہش بڑی قابل تعریف بات ہے۔ لیکن جب تک اس کے حصول کے لیے ٹھوس عملی تدابیر اختیار نہ کی جائیں وہ اچھی چیز معرض وجود میں نہیں آسکتی۔ اسلام اپنے ماننے والوں کے گھروں کو پر بہار اور مسرت بخش دیکھنا چاہتا ہے۔ اس لیے اس نے ارشادات و ہدایات کے ساتھ ساتھ اوامر و نواہی کا ایک ایسا مربوط نظام پیش فرمایا جس کی بدولت یہ مقصد اپنی جملہ زیبائیوں اور برکتوں کے ساتھ ظہور پذیر ہو سکتا ہے۔ یہ سورہ جو انسان کی خانگی زندگی کے متعلق واضح ہدایات اور احکامات پر مشتمل ہے۔ اس کا نام اللہ تعالیٰ نے النور پسند فرمایا جو اس بات کی طرف رہنمائی کر رہا ہے کہ جس معاشرہ میں یہ نظام پوری طرح نافذ کیا جائے گا وہاں کا ہر گھر سچی مسرتوں کے انوار سے جگمگا رہا ہوگا۔

اس سورہ کا اکثر حصہ خانگی زندگی کے متعلق واضح ہدایات اور احکامات پر مشتمل ہے۔ اس میں ہر مومن مراد اور مومن عورت کو اس بات کا ذمہ دار قرار دیا گیا ہے کہ وہ خود اپنے دامن عصمت کو ہر آلودگی سے پاک و صاف رکھیں۔ اس کا طریقہ یہ بتایا کہ ہر مومن مرد اور مومن عورت اپنی نگاہیں نیچی رکھے اور یہ ایک حقیقت ہے کہ آنکھوں میں جب تک شرم و حیا ہوتی ہے انسان کے دل کی دنیا فاسد خیالات اور ناپاک نظریات کی یورش سے محفوظ رہتی ہے، جذبات میں سکون و اعتدال پایا جاتا ہے۔ کسی کی آبرو کی طرف ہاتھ بڑھانا تو کجا آنکھ اٹھانے کی سکت بھی پیدا نہیں ہوتی۔ لیکن جب آنکھیں نور حیا سے محروم ہو جاتی ہیں، جب شرم کا پردہ چاک ہو جاتا ہے تو پھر پرسکون جذبات میں ایک آگ سی لگ جاتی ہے، خبیث خیالات کا ایک سیلاب امنڈ کر آجاتا ہے جو بڑے بڑے انسانوں کو تنکوں کی طرح بہا کر لے جاتا ہے۔ حتیٰ کہ انہیں اپنے ظاہری تقدس کی پروا بھی نہیں رہتی۔

بے حیا شخص صرف دوسروں کو ہی اپنے تیرہوس کا نشانہ نہیں بناتا بلکہ وہ اپنے گھر کی فصیل میں خود شگاف ڈال کر لوگوں کو دعوت دیتا ہے کہ وہ بھی آکر اس کی آبرو کو خاک میں ملائیں۔

2۔ پردہ: پردہ کے ابتدائی احکام سورہ الاحزاب میں مذکور ہیں۔ یہاں اسلام پردہ کے قواعد و ضوابط کو پوری شرح و بسط سے ذکر فرما دیا گیا تاکہ گوہر عصمت کی آب و تاب کو ماند کرنے کی کوئی کوشش اسلامی معاشرہ میں پروان نہ چڑھ سکے۔ اس کی تفصیل متعلقہ آیات کے ضمن میں ملاحظہ فرمائیں۔

3۔ حدِ زنا: یہ مسئلہ اتنا اہم اور نازک ہے کہ صرف ہدایات و اشارات پر اکتفا نہیں کیا جا سکتا بلکہ جو بےحیا حد اعتدال سے تجاوز کرے گا اس کے لئے عبرتناک سزا کا قانون نافذ کیا کہ اس نابکار کو سرعام کوڑے لگائے جائیں اور شادی شدہ زانی کے لیے سنت نبوی میں سنگسار کرنے کی سزا تجویز ہوئی۔ قتل کی سزا قصاص ہے لیکن اگر مقتول کے وارث چاہیں تو وہ دیت لے کر قاتل کو موت سے بچا سکتے ہیں۔ قرآن کی نظر میں زنا کا جرم اتنا سنگین ہے کہ اس میں نہ تو فریقین صلح کر سکتے ہیں اور نہ معاف کر سکتے ہیں بلکہ مجرموں کو سزا دی جائے گی اور برسر عام دی جائے گی، تاکہ ساری دنیا کو معلوم ہو جائے کہ قرآن عصمت و ناموس کو انسانی زندگی سے بھی زیادہ اہمیت دیتا ہے۔ جو شخص کسی کی عصمت پر حملہ آور ہوگا وہ خداوند عالم کا مجرم ہے اور خلافت الٰہیہ کے سربراہ پر لازم ہے کہ وہ اس مجرم کو سزا دے اور اس میں کسی شفقت اور نرمی کو روا نہ رکھے۔

اس مقصد کے لیے یہ حکم بھی دیا کہ اسلامی معاشرہ میں جو غیر شادی شدہ مرد اور غیر شادی شدہ عورتیں ہیں، ان کی شادی کا اہتمام کیا جائے، کیونکہ اگر ایسے لوگ کسی سوسائٹی میں کافی تعداد میں پائے جائیں گے تو ان کا وجود ہر وقت اختلاقی نظام کے لیے ایک خطرہ ہوگا۔ کسی وقت بھی ضبط و احتیاط کا بند ٹوٹ سکتا ہے۔ رکے ہوئے جذبات جب بےقابو ہوں گے تو کوئی پندو نصیحت کام نہیں آئے گا۔ اس لیے اسلامی معاشرہ میں ایسے عنصر کی حوصلہ افزائی نہیں کی گئی جو کسی وقت بھی بلائے بےدرماں ثابت ہوسکے۔

4۔ اس کے علاوہ اسلام نے گھر کی چار دیواری کا بڑا احترام ملحوظ رکھا ہے۔ گھر میں بسنے والوں کے راحت و آرام کو بڑی اہمیت دی ہے۔ بغیر اطلاع دئیے اور اجازت حاصل کیے کسی کے گھر کے اندر قدم رکھنا بلکہ اندر جھانکنا بھی ممنوع قرار دے دیا گیا ہے اور کسی کے ہاں جانے کے پورے پورے آداب سکھائے گئے ہیں تاکہ ہر شخص اپنے گھر میں آرام کر سکے اور اپنے پروگرام کے مطابق کام کر سکے۔

مسلمانوں کو یہ بھی ہدایت فرمائی کہ صاحب خانہ تمہیں اجازت نہ دے تو غصہ سے لال پیلے نہ ہو جاؤ اور اس شخص پر برسنا شروع نہ کر دو بلکہ بڑی کشادہ دلی ہے اس کی معذوری کو تسلیم کرو اور خوشی خوشی واپس چلے آؤ۔

5۔ اس سورہ میں عہد رسالت کے ایک تہائی المناک اور روح فرسا المیہ کا ذکر بھی کیا گیا ہے جو تاریخ میں واقعہ افک کے نام سے مشہور ہے۔ اسلام کے دشمن اسلام کی روز افزوں ترقی اور شاندار فتوحات اور کامیابیاں دیکھ دیکھ کر آتش زیر پا ہو رہے تھے۔ کھل کر مقابلہ کرنے کی ہمت سلب ہو چکی تھی ان کی باطنی خباثت ہر روز نئے فتنے جگا کر مسلمانوں کو پریشان کرتی رہتی تھی۔ ان کے سرغنہ عبد اللہ بن ابی نے اب ایسی چال چلی جس نے قیامت برپا کر دی۔ اسلامی معاشرہ کا عضو عضو درد سے چیخ اٹھا۔ ساری فضا میں شکوک و شبہات کا ایک اندھیرا چھا گیا۔ ان ظالموں نے اس پاک ہستی کو اپنی بہتان تراشی کا ہدف بنایا جس کا براہ راست تعلق پیغمبر اسلام سرور عالم رحمت عالمیاں (صلی اللہ علیہ وآلہ وسلم) کی ذات سے تھا، جس کی گرد راہ بھی رہبروان جادہ ہدایت کے لیے نور افشاں تھی۔ اللہ تعالیٰ نے خانوادہ رسالت کی عصمت و طہارت کی شہادت اپنی زبان قدرت سے دی اور اس سورہ پاک میں وہ آیتیں نازل فرمائیں جن سے یہ فتنہ ہمیشہ کے لیے ختم ہوگیا اور منافقین کو یقین ہوگیا کہ ان کا کوئی منصوبہ اور ان کی کوئی سازش اسلام کے شجرہ طیبہ کو اب اکھیڑ نہیں سکتی اس واقعہ کی تفصیل بھی متعلقہ آیات کے ضمن میں بیان کی گئی ہے۔

6۔ آیت 35 ’اللہ نور السموت والارض الآیۃ‘ جس سے اس سورہ کا نام ماخوذ ہے وہ اپنی معنویت اور جلالت شان کے باعث بڑی اہمیت کی حامل ہے اور آپ کی خصوصی توجہ اور مطالعہ کی مستحق ہے۔

7۔ آخر میں اس وعدہ کا ذکر فرمایا گیا جو عرش و فرش کے پروردگار نے ہر اس قوم سے کیا ہے جو اس ضابطہ حیات کو اپنائے اور ایک ایسا معاشرہ تشکیل کرے جس کا تفصیلی خاکہ یہاں پیش کیا گیا ہے۔ تاریخ عالم گواہ ہے کہ جب غلامان مصطفی (صلی اللہ علیہ وآلہ وسلم) نے اس نظام کو اپنایا تو اللہ تعالیٰ نے یہ وعدہ پورا فرمایا۔ وعدہ خداوندی آج بھی جوں کا توں موجود ہے۔ اگر ہم آج بھی صدق دل اور حسن نیت سے اس کو پورا کریں گے جس طرح ہمارے اسلاف نے اسے پورا کیا تھا تو خداوند قدوس بھی اپنا وعدہ یقیناً پورا فرمائے گا۔ اس کا تو صاف صاف اعلان ہے: ’اوفوا بعھدی اوف بعھدکم‘ تم نے جو میرے ساتھ وعدہ کیا ہے تم اس کو پورا کرو۔ جومیں نے تمہارے ساتھ وعدہ کیا ہے وہ میں پورا کروں گا۔