تعارف سورۃ الصافات

سورہ الصافات ہے جو پہلی آیت میں مذکور ہے۔ اسمیں پانچ رکوع، ایک سوبیاسی آیتیں اور آٹھ سو ساٹھ کلمات اور تین ہزار آٹھ سو چھبیس حروف ہیں۔

زمانہ نزول

یہ سورہ مکہ مکرمہ میں نازل ہوئی۔ مضامین میں غور و فکر کرنے سے اندازہ ہوتا ہے کہ یہ مکی دور کے اس حصہ میں نازل ہوئی جب اسلامی دعوت نے اہل مکہ کو چوکنا کردیا تھا اور انہوں نے تعصب کا سہارا لیتے ہوئے اس کو تسلیم کرنے سے صاف انکار کر دیا تھا۔ اسلامی دعوت اور داغی برحق علیہ الصلوہ والسلام پر آوازے لنے شروع کردیے تھے۔ یہ سورہ مکی زندگی کے درمیانی دور کے آخرمیں نازل ہونے والی سورتوں سے واضح مشابہت رکھتی ہے۔

مضامین

کفار عرب شرک کی لعنت میں بری طرح گرفتار تھے۔ آیات 36-35 میں بتایا گیا ہے کہ اگر انہیں ’لاالہ الا اللہ‘ پر ایمان لانے کی دعوت دی جاتی تو وہ ازراہ غرور و نخوت اس دعوت کو مسترد کر دیتے اور کہتے ایک شاعر و مجنون کی بات مان کر ہم اپنے خداؤں کی خدائی کے عقیدہ کو ہرگز نہیں چھوڑیں گے۔ بھلا کائنات کا یہ وسیع اور پیچیدہ کارو بار ایک خدا انجام دے سکتا ہے؟ ناممکن۔

سورہ کا آغاز عقیدہ توحید کو دلوں میں جاگزیں کرنے کے لیے تین قسمیں کھا کر فرمایا جا رہا ہے کہ تمہارا خدا بس ایک خدا ہے اس کا کوئی شریک نہیں۔ آسمانوں اور زمین اور جو کچھ ان میں ہے سب کا وہی پرور دگار ہے۔

قیامت کے بارے میں بھی ان کا نظریہ یہ تھا کہ ایسا ہونا ناممکن ہےعقل اس کو تسلیم نہیں کرتی۔ اسکے بارے میں بھی دوٹوک انداز میں فرما دیا: ’قل نعم و انتم داخرون‘ ہاں قیامت ضرور آئے گی اور تمہیں ذلیل و رسوا کر کے حشر کے میدان میں کھڑا کر دیا جا ئے گا۔

قیامت کے دن منکرین قیامت جس طرح آپس میں الجھیں گے اور ایک دوسرے پر الزام تراشی کریں گے اس کا ذکر بھی کر دیا تا کہ لوگ عبرت حاصل کریں۔

حضور نبئ رحمت صلی اللہ تعالی علیہ وآلہ وسلم اور حضور کے جاں نثار غلام بڑے زہرہ گداز حالات سے دوچار تھے۔ لحظہ بہ لحظہ مصائب و آلام کے اندھیرے گہرے ہوتے جا رہے تھے۔ ان کی تسلی کے لیے انبیاء کرام کے ایمان افروز حالات بیان فرما دیے کہ مخالفت اور عداوت سے انہیں بھی واسطہ پڑا تھا۔ مشکلات کے پہاڑ ان کے راستہ میں بھی حائل ہوئے تھے لیکن انہوں نے صبہ کا دامن مضبوطی سے پکڑے رکھا، اپنے خدا پر توکل کیا اور مصروف جہاد رہے۔ آخر کار فتح و نصرت کا کبھی نہ مر جھانے والا سہران کے سرپر باندھ دیا گیا۔ ساتھ ہی فرمادیا جو بھی انبیاء کرام کے نقش قدم پر چلے گا، اسلام کا علمبردار بنے گا وہی ہمیشہ غالب رہے گا۔

اہل مکہ کو تنبیہ فرمادی کہ آج جس کو تم کمزور سمجھ رہے ہو، سارے عرب پر اس کا پرچم لہرائے گا اور سارے عالم کو اسی کے دامن رحمت میں جگہ ملے گی۔