تعارف سورۃ طہٰ

 اس سورہ مبارکہ کا نام طٰہٰ ہے۔ یہی وہ کلمہ ہے جس سے سورہ کا آغاز ہوا ہے۔ یہ سورہ مکہ مکرمہ میں نازل ہوئی۔ اس میں آٹھ رکوع ہیں۔ اس کی آیتوں کی تعداد ایک سو پینتیس ہے۔ یہ ایک ہزار چھ سو اکتالیس کلمات اور پانچ ہزار دو سو بیالیس حروف پر مشتمل ہے۔

زمانہ نزول

اس سورہ کو تاریخ اسلام میں ایک امتیازی شان حاصل ہے۔ مسلمان ہونے سے پہلے ایک دن حضرت عمر بڑے جوش و خروش سے گھر سے نکلے۔ ننگی تلوار گلے میں حمائل تھی۔ کسی نے پوچھا عمر کہاں کا قصد ہے؟ جواب دیا: مسلمانوں کے نبی کا سر قلم کرنے کے لئے جا رہا ہوں۔ اس نے کہا پہلے اپنے گھر کی خبر لو‘ تمہاری بہن فاطمہ اور بہنوئی سعید بن زید تو مسلمان ہو چکے ہیں اور اپنے بنی پر سو جان سے فدا ہو رہے ہیں۔ غصہ سے واپس لوٹے اور بڑی بےدردی سے بہنوئی کو مارنا شروع کیا۔ بہن مزاحم ہوئیں تو ان پر پل پڑے۔ ان کا سر پھوڑ دیا۔ جس سے خون کا فوارہ بہ نکلا۔ یہ منظر دیکھ کر سراسیمگی پیدا ہوئی اور کلام الٰہی سننے کا اظہار اپنی بہن سے کیا۔ انہوں نے غسل کرنے کا حکم دیا۔ جب آپ غسل کر چکے تو حضرت فاطمہ نے اسی سورہ کی چند پہلی آیتیں تلاوت کیں جس نے عمر کی دنیا بدل ڈالی۔ پتھر دل پسیج گیا اور آنکھوں سے آنسوؤں کا سیلاب امڈ آیا۔ اسی وقت بارگاہ رسالت میں حاضر ہو کر مشرف باسلام ہوئے۔ علامہ اقبال رحمۃ اللہ علیہ نے اسی واقعہ کی طرف اشارہ کرتے ہوئے فرمایا ہے:

نمی دانی کہ سوز قرأت تو
دگرگوں کرو تقدیر عمررا

اس واقعہ سے پتہ چلتا ہے کہ حضرت عمر کے مشرف باسلام ہونے سے پہلے یہ سورہ نازل ہو چکی تھی۔ ویسے تو اس سورہ کی ہر آیت روشنی کا ایک بلند مینار ہے لیکن چند امور خصوصی توجہ کے مستحق ہیں۔

مضامین

1۔ اس سورہ کے نزول کا زمانہ وہ تھا جب کفار کی اسلام دشمنی اپنے عروج پر پہنچ چکی تھی۔ دلآزاری اور بہتان تراشی کی انہوں نے انتہا کر دی تھی۔ حضور سرور کائنات کا شبانہ روز محنت کے باوجود صرف چند روحیں ایسی تھیں جنہوں نے اس دعوت حق کو قبول کیا تھا۔ قوم کی یہ ہٹ دھرمی دیکھ کر حضور کے قلب نازک پر کیا گزرتی ہوگی اور اسلام قبول کرنے والوں کے دلوں میں اپنی اس دعوت کے مستقبل کے متعلق کیسے کیسے خدشات پیدا ہوتے ہوں گے۔ اس لیے ابتدائی آیات میں حضور کریم (صلی اللہ علیہ وآلہ وسلم) کو تسلی دی جا رہی ہے کہ یہ قرآن اس قادر مطلق نے نازل فرمایا ہے جس کی کبریائی کے سامنے کائنات کی ہر چیز سرافگندہ ہے۔ اس نے یہ قرآن آپ پر اس لیے نازل نہیں کیا کہ آپ رنج و مشقت میں مبتلا ہو جائیں۔ یقیناً آپ کا دین پھیلے گا اور کامیابی آپ کے قدم چومے گی۔ اس کے بعد بڑی تفصیل کے ساتھ حضرت موسیٰ کا ذکر کیا گیا کہ انہیں کس طرح موسم سرما کی ایک تاریک اور خنک رات میں وادی طور کے ایک گوشے میں بلا کر خلعت نبوت سے سرفراز فرمایا گیا اور اس کے بعد انہیں ایک ایسے ظالم بادشاہ کو دعوت حق دینے کا حکم دیا گیا جس کا دامن بیشمار معصوم بچوں کے بیدریغ خون سے لت پت تھا۔ حکم ملا جاؤ اور خدائی کے جھوٹے دعویدار کے سامنے اس کے بھرے دربار میں میری توحید کا اعلان کرو اور اسے حکم دو کہ وہ بنی اسرائیل کو اپنی غلامی کی زنجیروں سے آزاد کر دے ورنہ اس کا انجام بڑا دردناک ہوگا۔ ساتھ ہی فرما دیا کہ اس کی دست درازی سے خائف نہ ہونا۔ میں تمہارے ساتھ ہوں گا۔

تعمیل ارشاد الٰہی میں فرعون کے پاس تشریف لے گئے اور وہ جامع خطبہ ارشاد فرمایا جسے سن کر فرعون کے اوسان خطا ہوگئے اور اسے اپنی خدائی کا محل مسمار ہوتا ہوا نظر آنے لگا۔ اس نے فوراً آپ پر یہ الزام لگا دیا کہ آپ جادو کے زور سے ہماری حکومت کا تختہ الٹنے آئے ہیں اور صرف اپنی سیاسی اغراض پر پردہ ڈالنے کے لیے خدا، قیامت اور دین کا نام لے رہے ہیں چنانچہ اس نے اپنے ملک بھر کے ماہر جادو گر آپ کے مقابلہ کے لیے بلائے اور انہیں گرانقدر انعامات کا لالچ دیا لیکن حق کے سامنے باطل کی کیا مجال ہے کہ وہ دم مار سکے۔ وہ ساحر موسیٰ کی صداقت کو دیکھ کر مجبور ہوگئے کہ تمام عواقب ونتایج سے بےنیاز ہوکر آپ پر ایمان لانے کا اعلان کر دیں۔ اس واقعہ کی تفصیلات پڑھنے سے پتہ چلتا ہے کہ ایمان کی قوت سب سے بالا ہے۔

2۔ اس کے بعد سامری کا ذکر کرکے بنی اسرائیل کی کم فہمی اور کوتاہ اندیشی کا پردہ بھی چاک کرد یا۔

3۔ آخر میں آدم علیہ السلام کا واقعہ بیان فرمایا۔ جس سے یہ حقیقت بھی عیاں ہو جاتی ہے کہ غلطی کرنا اور پھر اس پر اکڑنا اور اکڑے رہنا انسان کو ہلاک کر دیتا ہے جس طرح کہ فرعون اور ابلیس کے واقعہ سے ظاہر ہے لیکن غلطی کرکے نادم ہونا اور پھر توبہ کرنا انسان کو مقبولیت کے مقام پر فائز کر دیتا ہے جیسا آدم علیہ السلام کے واقعہ سے معلوم ہوا۔

اس لیے اے غلامان مصطفی! خدا کی نافرمانی سے بچنے کی ہر ممکن کوشش کرو۔ لیکن اگر کسی بشری کمزوری یا وقت جوش سے کوئی لغزش ہو جائے تو اپنے باپ آدم علیہ السلام کی طرف فوراً شک ندامت بہا کر طلب مغفرت کرو‘ بخش دئیے جاؤ گے۔

سورہ کو ختم کرنے سے پہلے چند حقائق کو بڑے مؤثر اور دلنشین پیرائے میں بیان کر دیا تاکہ انسان کسی قسم کی غلط فہمی کا شکار ہو کر وہم و گمان کی دیواروں میں بھٹکتا نہ رہے۔