تعارف سورۃ الاعراف

اس سورہ پاک کا نام الاعراف ہے۔ یہ دو سو چھ آیتوں اورچوبیس رکوع پر مشتمل ہے۔ اس کے الفاظ کی تعداد تین ہزار تین سو پچیس ہے۔ یہ مکہ مکرمہ میں نازل ہوئی، اگرچہ بعض علما کی رائے یہ ہے کہ اس کہ پانچ یا آٹھ آیتیں مدنی ہیں لیکن محققین کا مختار قول یہی ہے کہ اس کی تمام آیتیں بلااستثنا مکی ہیں۔ حضرت ابن عباس رضی اللہ عنہا سے بھی بسند صحیح یہی مروی ہے۔

زمانہ نزول

سورہ الانعام اور الاعراف کا زمانہ نزول قریب قریب ہے یعنی ہجرت سے پہلے مکی دور کے آخری سالوں میں اس کا نزول ہوا۔

مضامین

اس سورہ میں بھی خطاب انہی لوگوں سے ہے جو سورہ الانعام میں مخاطب تھے یعنی مشرکین عرب؛ اس لیے انہی کے عقائدِ باطلہ کی تردید، ان کے اوہامِ فاسدہ کا بطلان، ان کی غلط کاریوں کا ازالہ اور ان کی کج فہیوں کی اصلاح پر سارا زور صرف کیا گیا ہے۔ فرق صرف اجمال اور تفصیل کا ہے؛ سابقہ سورت میں جو مسائل اجمالاً ذکر ہوئے تھے انہیں تفصیلاً بیان کر دیا گیا ہے۔ پہلے بھی بتایا گیا تھا کہ انبیاء کرام علیہم السلام نے جب اپنی اپنی قوموں کو توحید کی دعوت دی اور اس کے لیےناقابلِ تردید لائل پیش کیے تو ان میں غور و فکر کرنے کے بجائے قوموں نے ان کا مزاق اڑایا، ان کی تکذیب کی اور انہیں اذیت پہنچانے میں کوئی کسر اٹھا نہ رکھی۔ اس سورت میں متعدد انبیائے کرام نوح، ہود، صالح، لوط، شعیب علیہم الاسلام کا نام لے کر اس کے احوال بیان فرمائے اور ان کی قوموں نے جو ناروا سلوک اور معاندانہ برتاؤ اپنے مخلص، پاکباز رہنماؤں کے ساتھ کیا اس کا ذکر کیا اور اس حقیقت کو بڑی فصاحت سے آشکار کیا کہ جب مزاج بگڑ جاتا ہے اور فطرت سلمیہ مسخ ہو جاتی ہے تو اس وقت حق پذیری کی استعداد بےکار اور مفلوج ہو کر رہ جاتی ہے‘ صداقت کا آفتاب اپنی تمام تابناکیوں کے ساتھ جلوہ گر ہوتا ہے لیکن آنکھیں اس کے نور کو نہیں دیکھ سکتیں‘ دلائل کی زبان اعلان حق کر رہی ہوتی ہے لیکن کان اسے سن ہی نہیں پاتے۔

مختلف رسولوں کے احوال بتانے کے بعد حضرت موسٰی علیہ اسلام کے واقعات تفصیلاً بیان فرمائے۔ حضرت موسٰی علیہ اسلام کو دو قسم کے لوگوں سے واسطہ پڑا تھا؛ ایک فرعون اور اس کے حواری اور دوسرے آپ کی اپنی قوم بنی اسرائیل۔ پہلا طبقہ حکمران تھا جسے بےپناہ اختیارات اور مراعات حاصل تھیں، ملک کی ساری دولت و ثروت ان کی ملکیت تھی، عیش و عشرت کے سب سامان انہیں میسر تھے۔ وہ کسی قمیت پر ان سے دست بردار ہونے کے لیے تیارنہ تھے حتیٰ کہ جب ان کے مقرر کیے ہوئے معیار کے مطابق حق واضح ہوگیا۔ ان کے بلائے جادوگر معجزات نبوت کے سامنے اپنے فریب سحر کی بےسر و پائی کا اعتراف کر کے باطل سے تائب ہوگئے اور حضرت کلیم پر صدق دل سے ایمان لے آئے۔ تب فرعونی ذبنیت نے قول حق سے گریز اختیار کیا کیونکہ حضرت موسٰی علیہ اسلام پر ایمان لانے کا صاف مطلب یہ تھا کہ وہ اپنے ناجائز احتیارات اور مراحات سے محروم ہوجائیں گے، ان کی لوٹ کھسوٹ پر پابندیاں لگادی جائیں گی اور ان کی عیش و نشاط کی بساط الت دی جائے گی۔ وہ اس کے لیے کسی طرح آمادہ نہ تھے۔

دوسراطبقہ جس سے آپ کو واسطہ پڑاتھا وہ آپ کی اپنی قوم بنی اسرائیل تھی جومدتِ دراز سے غلامی کی زندگی گزار رہی تھی۔ ان کی ہمتیں ٹوٹ اور ولولے سرد ہو چکے تھے۔ ذلت کی پستیوں میں پڑے رہنے میں وہ بڑی لذت محسوس کرتے تھے۔ اس کی تن آسانی کا یہ عالم تھا کہ عزت کی بلندیوں تک پہنچنے کے لیے وہ کسی جدوجہد کے لیے آمادہ ہی نہ تھے، وہ چاہتے تھے کہ لڑے بغیر فتوحات کے دروازے ان پر کھول دیئے جائیں۔ انہیں کھانے پینے کے لیے بھی ہاتھ پاؤں ہلانے نہ پڑیں بلکہ آسمان سے پکا پکایا کھانا ان کے دسترخوانوں پر چن دیا جائے۔ ان کی تعمیری قوتیں اتنی فرسودہ اور افسردہ ہو چکی تھیں کہ جدتِ فکر اور ندرتِ عمل کا ان کے ہاں تصور تک نہ تھا، دوسروں کی تقلید اور پیروی کے لیے وہ ہر لمحہ آمادہ تھے۔ چنانچہ جب حضرت موسٰی علیہ اسلام کی برکت سے وہ فرعون کی غلامی سے آزاد ہو کر وادئ سینا میں پہنچے اور وہاں کے بت پرستوں کو دیکھا تو حضرت موسٰی علیہ لسلام سے اپنے لیے ایسا ہی بت بنانے کی فرمائشیں شروع کر دیں اور آپ کی سرزنش پر بظاہر تو خاموش ہو گئے لیکن جب آپ چلہ کشی کے لیے کوہ طور پر تشریف لے گئے تو خدا وندِ حی و قیوم کو چھوڑ کر فوراً سامری کے بنائے ہوئے بچھڑے کی پرستش شروع کردی۔

ان تمام واقعات سے یہ حقیقت واضح ہوجاتی ہے کہ احکام الٰہی سے دانستہ اور پہیم سرکشی، بےپناہ قوت و احتیار کا خمار اور غلامانہ زندگی افراد و اقوام کے ذہنوں کو بکاڑ دیتی ہے۔ انبیاء کرام کی بعثت کا مقصد ہی یہ ہوتا ہے کہ ان بگڑی ہوئی ذہنیتوں کی اصلاح کیجائے تاکہ ایک ایسا معاشرہ معرضِ وجود میں آجائے جو طاقتور ہونے کے باوجود انصاف پرست ہو، نظم و ضبط کا پا بند ہونے کے باوجود غلامانہ بےبسی کا شکار نہ ہواور اس میں حقوق و فرائض ترازو کے دونوں پلڑے برابر ہوں۔ جو بد نصیب اللہ کے پیغمبروں کی مشفقانہ پند و نصائح کو قبول نہیں کرتا اور اپنی گمراہی پر بضد رہتا ہے تو مکافاتِ عمل کا قانون اسے پیس کر رکھ دیتا ہے اور اس کا نام دنشان تک صفحہ ہستی سے مٹا دیا جاتا ہے۔

نوع انسانی کے عہد طفولیت میں ہر قوم کی طرف الگ الگ نبی معبوث ہوئے جو وقتی اور مقامی ضروریات کے پیش نظر اصلاح احوال کے لیے کوشاں رہے لیکن آخر میں وہ نبی مکرم اور رسول معظم صلی اللہ علیہ وآلہ وسلم تشریف لایا جس کی دعوت زمان و مکان کی حد بندیوں سے ناآشنا تھی۔ وہ تمام انسانوں کا قیامت تک کے لیے ہادی و مرشدبن کر حلوہ افردز ہوا تھا۔ اس لیے اس نے کھلے الفاظ میں اعلان فرما دیا ’یاایھا الناس انی رسول اللہ الیکم جمیعا‘ اے لوگو! میں تم تمام کی طرف اللہ کا رسول بن کر آیا ہوں۔ اس مقام پر ان عظیم مقاصد کا ذکر بھی کر دیا گیا ہے جن کی تکمیل کے لیے اس نبی کریم صلی اللہ تعالی علیہ و آلہ وسلم کو مبعوث فرمایا گیا تھا۔